Досегашниот играч на Црвена Звезда,Никола Калиниќ, е ново засилување на кошаркарскиот клуб Барселона.

Искусниот крилен кошаркар со каталонскиот клуб потпиша двегодишен договор и според информациите ќе заработува 1.3 милиони евра по сезона.

30-годишниот Калиниќ минатата сезона во Евролигата просечно постигнуваше 12.6 поени, 4 скока и 3.4 асистенции. Српскиот кошаркар во 2017 со Фенербахче ја освои Евролигата.

Манчестер Сити е заинтересиран за потписот на дефанзивецот на Јувентус, Матијс де Лихт, кој е во сферата на интерес на Баерн Минхен, Челзи и Ливерпул.

Де Лихт му се приклучи на Јувентус во 2019 година од Ајакс за 85,5 милиони евра. До денес, холандскиот дефанзивец постигна седум гола и даде три асистенции на 117 натпревари. Договорот меѓу двете страни истекува по сезоната 2023/2024. Во 2017 година, Де Лихт го направи своето деби за репрезентацијата на Холандија и досега има одиграно 38 средби на кои постигна два гола и три асистенции.

Претходно се дозна дека напаѓачот на Манчестер Сити Рахим Стерлинг е блиску до преселба во Челзи и веќе ги поминал медицинските прегледи во новиот тим.

Тренерот на Рома Жозе Мурињо изјави дека е загрижен бидејќи римскиот клуб во досегашниот преоден рок доведе само тројца играчи, пренесуваат италијанските медиуми.

Рома досега ги ангажира Немања Матиќ, Миле Свилар и Зеки Челик. Италијанските медиуми пренесуваат дека двајца од овие тројца нови фудбалери пристигнаа во Рим без обештетување.

Екипата на Рома минатата година беше освојувач на Лигата на конференции.

Шпанската Ла Лига или Примера Сантандер, наскоро ќе добие ново име, а тоа ќе се случи од сезоната 2023/24 кога ќе добие ново име.

Банката Сантандер нема повеќе да биде прв спонзор на најсилната фудбалска лига во Шпанија. Новото име ќе биде откриено во август, кога ќе биде потпишан спонзорски договор.

Во изминатите пет години Примера значително ги подигна приходите од своите спонзори. Пред пет години добиваше 50 милиони, а сега лигата инкасира 155 милиони евра годишно. Двојно беа зголемени и примањата од телевизиските права за екипите. Во 2017 година ТВ правата се продаваа за 825 милиони, а моментално за 1,6 милијарда евра.

Напаѓачот на Ремс, Хуго Екитике, начелно се согласил да премине во Пари Сен Жермен. 20-годишниот фудбалер веќе се договорил со парижаните за трансферот.

Тој беше многу посакуван од англискиот Њукасл, а тимот од Островот понуди 36 милиони евра и дополнителни 10 милиони евра како бонуси за неговите услуги, но тој одби таков трансфер.

Причината е неговата желба да игра во Пари Сен Жермен.

Младинскиот репрезентативец на Франција минатата сезона постигна 11 гола и даде четири асистенции на 27 натпревари во сите натпреварувања. Тој е оценет како еден од најталентираните напаѓачи на негова возраст во Европа.

Поранешниот германски репрезентативец Месут Озил после 18 месеци несогласувања и турбуленции го раскина договорот со Фенербахче.

Иако уште додека беше член на Арсенал, Озил форсираше трансфер во Фенербахче, сепак после година и пол тој побара раскин на договорот со турскиот клуб поради конфликт со раководството на истиот. Тој ќе го напушти Фенербахче две години пред истекот на договорот и сега е слободен играч.

Во дресот на Фенер, Озил одигра 36 натпревари, постигна осум гола и забележа три асистенции.

Колумбискиот играч за врска Хамес Родригез може да биде ново засилување за италијанската екипа Рома, пишува „АС“.

Фудбалерот моментално е дел од катарскиот Ал Рајан, но клубот се обидува да го продаде. Играчот неодамна одби две понуди од Јужна Америка бидејќи сака да игра во Европа. Родригез има 30 години и верува дека се уште може да биде добар во Европа, каде што веќе играше за Порто, Реал Мадрид, Баерн (Минхен) и Евертон.

За него Рома е идеална опција, бидејќи повторно ќе работи под водство на португалскиот стручњак Жозе Мурињо, со кого е во добри односи.

Милан не упатил понуда до аргентинскиот напаѓач Пауло Дибала, чиј договор со Јувентус истече на крајот на јуни. Ова го објави новинарот Николо Шира на Твитер. Според изворот, италијанскиот шампион не ни размислувал да потпише договор со 28-годишниот фудбалер.

Од 2015 година Дибала настапуваше за Јувентус каде на 293 натпревари постигна 115 голови и 48 асистенции. Двете страни не можеа да се договорат за продолжување на соработката, па Пауло Дибала го напушти Торино како слободен играч.

Беше објавено дека Интер, Наполи, како и неколку клубови во Англија би можеле да потпишат со Дибала. Претходно се дозна дека Дибала планира да добива 6 милиони евра по сезона во новиот тим.

Бразилскиот интернационалец Андреас Переира потпиша четиригодишен договор со тимот на Фулам кој оваа сезона повторно се врати во Премиер лигата.

Переира настапува во најдобрата англиска лига од 2014 година кога пристигна во редовите на Манчестер Јунајтед. Меѓутоа во клубот од Олд Трафорд одигра само 45 натпревари и постигна два гола. Остатокот од договорот со Јунајтед го помина на позајмица во Гранада, Лацио, Валенсија и Фламенго.

Фулам за услугите на Переира плати 10 милиони фунти, со потенцијални бонуси од дополнителни 3 милиони фунти.

Откако станува јасно дека Челзи ја губи трката за потписот на Рафиња кој е се поблиску до трансфер во Барселона, клубот од Стенфорд Бриџ ќе се насочи кон ангажирање на Серж Гнабри од Баерн Минхен.

Доколку Челзи тргне во купување на Гнабри, се очекува цената која Баерн би ја побарувал за играчот да изнесува околу 45 милиони фунти.

Актуелниот договор на 26-годишниот фудбалер со тимот од Минхен истекува во јуни 2023 година. Гнабри има претходно искуство со настапи во Премиер лигата бидејќи во минатото има играно за екипата на Арсенал.