Како што јавуваат медиумите во Германија и Англија, еден од најдобрите фудбалски дефанзивци во светот, 22-годишниот Матијс де Лихт ќе го напушти Јувентус ова лето.

Според објавите, Де Лихт ги договорил личните услови со гигантот Баерн Минхен. Сега останува само Баварците да постигнат договор со Јувентус околу висината на обештетувањето. 

Клубот од Торино за Де Лихт бара 90 милиони евра, а Баерн се надева дека ќе успее да ја намали цената за фудбалерот чиј договор со бјанконерите му истекува за две години.

Познатиот новинар Фабрицио Романо излезе со информација дека Тотенхем е на чекор до договор со играчот на Барселона Клемент Ленгле.

Францускиот дефанзивец се очекува да потпише договор за едногодишна позајмица во тимот предводен од тренерот Антонио Конте.

Личните услови помеѓу фудбалерот и Барса се договорени, а сега само се очекува дефинирање на договорот помеѓу двата клуба.

Продолжува сагата околу потенцијалниот трансфер на Левандовски во Барселона. Играчот кој влегува во последната година од договорот со Баерн Минхен сака да си замине, но Баварците немаат голема желба толку лесно да го пуштат. Но од Барселона не се предаваат и веќе испратија нова официјална понуда.

Оваа информација ја потврди и првиот човек на Барселона, Жоан Лапорта.

„Испративме понуда и чекаме одговор. Се надеваме дека одговорот од Баерн ќе биде позитивен“, истакнува Лапорта.

Според добро упатени извори висината на понудата изнесува околу 35 милиони евра плус пет милиони во бонуси

Напаѓачот на Лил, Едом Жегрова може да ја продолжи кариерата во Арсенал, пренесуваат медиумите на Островот.

Арсенал испратил понуда за 23-годишниот репрезентативец на Косово, кој до јануари играше за Базел.

Скаутите на „топџиите“ го следат веќе подолго време и се убедени дека одлично ќе се вклупи во тимот на Артета.

Фудбалерот на Манчестер Јунајтед Бруно Фернандеш во новата сезона ќе носи дрес со друг број на грбот.

Како што објави клубот на социјалните мрежи, Португалецот во наредната сезона ќе го носи дресот со број 8.

Во претходниот период Фернандеш за Јунајтед настапуваше со број 18, а осумката му припаѓаше на Хуан Мата. Сега откако Мата ја напушти екипата, неговиот број е слободен и му припадна на Фернандеш.

Бруно во Манчестер Јунајтед е од јануари 2020 година. Минатата сезона тој постигна 10 гола и запиша 13 асистенции.

Централниот дефанзивец Александар Ристевски е најновото засилување на Брегалница за престојната сезона во Првата македонска фудбалска лига.

30-годишниот Ристевски изминатава година настапуваше во редовите на косовскиот прволигаш Приштина, од каде сега доаѓа во редовите на Брегалница засилувајќи ги дефанзивните позиции во тимот.

Ристевски има богата прволигашка кариера зад своето име настапувајќи за Металург, Скопје, Победа, Пелистер, Ренова, Струга ТЛ и Работнички во македонскиот шампионат, како и за екипата на Влазнија во албанското првенство.

Низ досегашниот преоден рок Брегалница се засили и со досегашниот фудбалер од средниот ред на Академија Пандев, Адис Хаџановиќ од БиХ, Белгиецот Фајсел Касми, поранешниот македонски репрезентативец Горан Силјановски, долгогодишниот капитен на Борец, фудбалерот од средниот ред Ѓорѓи Ѓорѓиев, левокрилниот дефанзивец Александер Борха Кордоба како и црногорскиот голман Немања Шчекиќ.

Јувентус е подготвен да му плаќа на сенегалскиот дефанзивец од Наполи Калиду Кулибали 7 милиони евра годишно, објави познатиот инсајдер Николо Шира на социјалната мрежа.

Според новинарот, Јувентус веќе испратил официјална понуда до Сенегалецот. Клубот од Торино му нуди на играчот договор до 2025 година. Од тимот очекуваат дека тој ќе може да го замени дефанзивецот на холандската репрезентација Матијс де Лихт, кој има голема веројатност да го напушти клубот.

Договорот на Калиду Кулибали со Наполи истекува на крајот од сезоната 2022/23. Претходно италијанските медиуми објавија дека Сенегалецот поради лојалноста кон клубот сака да ја заврши кариерата во Наполи и сака да го продолжи договорот. Тој веќе ги одбил понудите на Барселона и Јувентус.

Милан започна преговори со Оливие Жиру за нов договор. 35-годишниот напаѓач пристигна од Челзи за скромна сума од 1 милион евра, но одлично се вклопи во тимот на Стефано Пиоли и даде придонес за титулата со 11 голови. Двете страни се задоволни од нивната соработка и сакаат таа да продолжи.

Се очекува францускиот репрезентативец повторно да потпише до 2025 година. Неговиот актуелен договор истекува следното лето, но газдите на „росонерите“ се подготвени со понуда за продолжување на истиот.

Сепак, Милан сака да добие уште еден напаѓач во лицето на Шарл Де Кетелар. Голгетерот на Клуб Бриж е трансфер цел и на Лидс. Англискиот клуб упати поповолна понуда од онаа на Милан, но планираат во евентуална зделка да вклучат двајца свои играчи – младите Андреас Јунгдал и Емил Робак.

Нов член на премиерлигашот Лидс е десното крило од Колумбија, Луис Синистера. Лидс за фудбалерот кој пристигна од Феенорд плати 21,4 милиони фунти.

Договорот со Колумбиецот е потпишан на пет години, и се очекува токму Синистера да биде замена за Рафиња кој се очекува наскоро да ја напушти екипата.

Синистера во минатата сезона одигра 49 натпревари за Феенорд и постигна 23 гола и 14 асистенции.

Дрис Мертенс нема да остане во Наполи. На белгискиот ветеран му истече договорот и нема индикации дека клубот ќе се обиде да го задржи.

Претседателот на Наполи Аурелио Де Лаурентис сака да го намали буџетот за плати, а Мертенс е еден со највисоките примања.

Претставниците на напаѓачот веќе бараат нов тим. Една од опциите е 35-годишниот фудбалер да потпише со Олимпик Марсеј. Шефот на францускиот клуб Пабло Лонгорија е голем фан на Мертенс, кој сака годишна плата од 2,5 милиони евра.

Лацио и Ројал Антверпен се другите клубови кои ги разгледуваат понудите за репрезентативецот на Белгија. Тој помина 9 сезони во Наполи и е стрелец број 1 во историјата на оваа екипа.