Фудбалскиот клуб Манчестер Јунајтед нема да го стопира трансферот на Кристијано Роналдо од клубот.

Португалецот изрази желба да го напушти Јунајтед и се чини дека челниците на клубот ја прифатија неговата одлука и нема да го спречат неговото заминување.

Клубот од Олд Трафорд за Роналдо ќе бара 15 милиони евра, сума која е приближна со онаа која беше платена на Јувентус за неговото доаѓање во Јунајтед.

Кристијано Роналдо не може да се помири со фактот дека треба да настапува во Лига Европа, и најверојатно за многу скоро ќе потпише за друг клуб. Најсериозен кандидат за негов ангажман во моментов е тимот на Челзи.

Аталанта финализираше два договори за неколку часа. Клубот од Бергамо го испрати Матео Песина на позајмица во Монца и како негова замена го зеде играчот од средниот ред на Салернитана, Едерсон.

Тимот од Бергамо за Едерсон ќе плати 14 милиони евра, а сумата може да се зголеми на 21 милион со бонусите вклучени во договорот. Во Салерно замина и дефанзивецот Матео Ловато, кој пролетва играше како позајмен во Каљари.

Аталанта најави и разделба со Матео Песина. Италијанскиот репрезентативец оди во дебитантот во Серија А, Монца. Ќе биде позајмен, но со опција за откуп за 15 милиони евра. 50% од оваа сума оди во Милан, од каде беше привлечен Песина во 2017 година.

Доскорешниот играч на Челзи, Андреас Кристенсен и официјално е претставен како нов играч на Барселона.

Кристенсен својата официјална промоција ја имаше пред навивачите на Блауграна, а со каталонскиот клуб потпиша договор до 2026 година.

Данскиот репрезентативец во Барселона пристигна како слободен играч, откако му истече договорот со премиерлигашот Челзи.

Пауло Дибала се уште нема нов клуб, но тоа би можело да се промени многу брзо. Според „Ла Република“, голема е веројатноста аргентинскиот интернационалец да потпише со Атлетико Мадрид. Таква е желбата на Диего Симеоне, кој инсистира на ангажман на својот сонародник во составот на Атлетико Мадрид.

Дибала стана слободен играч на крајот од минатата сезона кога му истече договорот со Јувентус. Се очекуваше веднаш да потпише со Интер, но преговорите меѓу двете страни се одолговлекуваа. Во Интер не можат да си ја дозволат платата на Аргентинецот ако прво не продадат барем еден играч.

Манчестер Јунајтед е исто така опција за Дибала доколку „црвените ѓаволи“ се разделат со Кристијано Роналдо. За 28-годишниот напаѓач се зборува и за интерес од Наполи, Милан, па дури и новајлијата Монца во Серија А.

Мемфис Депај најверојатно ќе ја напушти Барселона ова лето бидејќи е ставен на трансфер листа.

Депај минатото лето се пресели на „Камп Ноу“ како слободен играч и добро ја започна сезоната, меѓутоа Чави не е симпатизер на неговата игра и му порачал да си бара нов клуб.

Притоа, клубот има финансиски проблеми, па сака да го продаде Холанѓанецот, а најсилен интерес за него покажува Тотенхем.

„Спарси“ го договорија трансферот на Ленгле, па сакаат да го доведат и Депај и се спремни да платат 20 милиони евра за неговиот потпис. Тотенхем е исклучително активен на трансфер пазарот и веќе ги донесе Перишиќ, Ричарлисон, Бусуфа и Ленгле, а Депај најверојатно ќе биде следниот.

Фудбалерот на Манчестер Сити Рахим Стерлинг ги договори личните услови со Челзи околу неговиот трансфер на Стенфорд Бриџ.

Тренерот на Челзи Томас Тухел го назначи Стерлинг за приоритет во летниот преоден рок. Договорот на англискиот репрезентативец со Сити истекува следното лето, а актуелниот шампион на Премиер лигата не сака да го спречи неговото заминување и желбата за поголема минутажа.

Стерлинг во Премиер лигата има настапувано за Манчестер Сити и Ливерпул, одигра вкупно 468 натпревари и постигна 285 гола.

Холандскиот репрезентативец Стивен Бергвајн е на медицински прегледи пред реализација на неговиот трансфер од Тотенхем во Ајакс, објави Фабрицио Романо.

Двата клуба веќе се договорија за зделката која е вредна 30 милиони евра. Бергвајн го напушта Тотенхем по две и пол сезони поминати со нив и се враќа во својата татковина. Во јануари 2020 година тој беше купен од ПСВ Ајндховен за иста сума од 30 милиони евра.

Напаѓачот најнапред беше дел од младинската школа на Ајакс, по што се пресели во ПСВ Ајндховен.

Фудбалерот на Ливерпул, Дарвин Нуњез , кој играше за Бенфика минатата сезона, ја освои наградата за играч на сезоната 2021/22 во португалската Примеира.

„Тој беше најдобар стрелец, беше во идеалниот тим на сезоната и сега е прогласен за МВП на првенството. Оваа награда оди кај Дарвин Нуњез!“, стои на Твитер профилот на лигата.

Нуњез постигна 34 гола и даде четири асистенции на 41 натпревар во сите натпреварувања за португалска екипа Бенфика минатата сезона во 2021/2022 година. Уругвајскиот напаѓач беше во клубот од септември 2020 година.

Во октомври 2019 година, Нуњез го направи своето деби за репрезентацијата на Уругвај, постигнувајќи два гола на 11 натпревари. На 14 јуни оваа лето беше најавен трансфер во англискиот Ливерпул.

Досегашниот фудбалер на Ајакс, Себастијан Алер потпиша четиригодишен договор со екипата на Борусија од Дортмунд. Тој во новиот тим ќе го носи дресот со број девет, и ќе биде замена за Ерлинг Халанд кој замина во Манчестер Сити.

Алер во минатата сезона одигра 42 натпревари за Ајакс, постигна 34 гола и девет асистенции. Со своите 11 погодоци во Лигата на шампионите беше третиот најдобар стрелец после Бензема и Левандовски.

За 28-годишниот фудбалер ова ќе биде второ враќање во Бундеслигата каде во периодот од 2017 до 2019 година играше за Ајнтрахт од Франкфурт.

Искусниот фудбалер за врска Аксел Витсел официјално е претставен како нов играч на Атлетико Мадрид.

33-годишниот репрезентативец на Белгија е првото засилување за шпанскиот клуб во овај преоден рок. Тој во Мадрид доаѓа како слободен играч од Борусија Дортмунд и потпиша договор до јуни 2023 година.

Својата кариера Витсел ја започна во Стандард, а потоа го носеше дресот на Бенфика, Зенит, кинескиот Тјанџин, и Борусија Дортмунд. За репрезентацијата на Белгија има одиграно 124 натпревари и постигнато два гола.