Фудбалската репрезентација на Македонија го одигра првиот натпревар од новиот циклус во Лигата на нации. Црвено-жолтите одиграа нерешено 1:1 на гостувањето против селекцијата на Бугарија. Македонија беше подобар противник на теренот, но немаше среќа во реализацијата на своите шанси кои ќе ја донесеа победата.

Свое видување за натпреварот даде и еден од подобрите играчи на теренот, Елиф Елмас.

„Натпреварот го игравме во период после краткиот одмор што беше причина да немаме ритам во играта. Беше очигледно дека квалитетно сме подобар тим од Бугарија, и сме една класа над нив, но немавме среќа да ја оствариме посакуваната победа. Се надевам дека на следните натпревари ќе влеземе подобро подготвени и ќе оствариме победи“, изјави Елмас.

Емерик Лапорт сака да го напушти англискиот шампион, а кариерата би можел да ја продолжи во Серија А. Поранешниот дефанзивец на Билбао сака да ја промени средината и да се пресели во клуб каде ќе има поголема минутажа.

Во Сити го изгуби првотимскиот статус и побарал од раководството да му биде дозволен трансфер. Ситуацијата ја следи Јувентус, кој е силно заинтересиран за Лапорт бидејќи во него гледа идеален наследник за Киелини.

Граѓаните“ се спремни да го продадат, но за неговата слобода бараат 60 милиони евра, што може да биде проблем за „бјанконерите“.

Француските спортски медиуми пренесуваат дека напаѓачот на Арсенал, Александре Лаказет се враќа во својот поранешен тим Олимпик Лион.

Веста ќе биде потврдена што е можно поскоро, бидејќи договорот на Лаказет со „топџиите“ истече и тој нема да биде обновен, а фудбалерот веќе се договорил со францускиот клуб за висината на неговата плата.

31-годишниот Александре Лаказет се враќа во Олимпик Лион пет години откако го напушти тимот и направи трансфер во Арсенал. За лондончани одигра 158 натпревари на кои постигна 54 гола.

Челниците на фудбалскиот состав Лидс се блиску до трансфер на дефанзивецот на РБ Салцбург, Расмус Кристенсен.

Според изворот, тренерот на англискиот тим, Џеси Марш, добро ги знае квалитетите на 24-годишниот Данец од неговиот престој во австрискиот клуб и сака да го привлече во Лидс.

Преговорите се во напредна фаза и се очекува трансферот да биде околу 10 милиони фунти. Расмус Кристенсен минатата сезона за РБ Салцбург постигна 10 гола и направи 8 асистенции на 44 натпревари.

Шпанскиот весник АС пишува дека аргентинскиот играч за врска на Атлетико Мадрид, Родриго Де Пол е трансфер цел на Рома.

Според информациите, тренерот на Рома Жозе Мурињо инсистира да го привлече 28-годишниот фудбалер за да го засили тимот после успехот со освојувањето на Лигата на конференциите. 

За Де Пол интерес покажуваат и калчолигашите Милан и Наполи.

Аргентинецот минатата сезона за Атлетико постигна 4 гола и 2 асистенции на 48 натпревари. Неговиот договор со клубот од  Мадрид е до 30 јуни 2026 година.

Мемфис Депај увери дека нема намера да ја напушти Барселона ова лето.

Тој е на списокот за продажба, бидејќи клубот мора да се раздели со барем неколку играчи.

„Сезоната не помина како што очекував, ниту ја очекував разделбата со Меси“, изјави Депај.

„Долго се опоравував од повреда, ми требаше време да се опоравам. Тренирав многу напорно, ја држев устата затворена и успеав да ги докажам своите квалитети. За среќа, добив уште една шанса и повторно почнав да постигнувам голови. Дали ќе останам во Барселона? Да, без сомнеж“, заклучи Холаѓанецот.

Силвио Берлускони, сега претседател на Монца, потврди дека разговарал со напаѓачот на Адана, Марио Балотели за неговото можно враќање во клубот. Тимот доби промоција во елитата и ќе има потреба од засилувања.

„Можеме да ја направиме Монца супер тим. Сакам влегувањето во Серија „А“ да биде само почеток. Добро е да го славиме овој успех, но веќе размислуваме за иднината. Сите играчи во тимот добро се разбираат. Мислам дека никој не планира да си замине. Балотели? „Да. Го замолив да се врати и да игра за нас“, изјави Берлускони.

Балотели беше дел од Монца помеѓу декември 2020 и мај 2021 година.

Монца за првпат во својата историја избори промоција во елитата и од следната сезона ќе игра во Серија А.

Медиумите во Турција информираат дека гигантот Бешикташ е блиску до трансфер на Џенк Тосун од Евертон.

30-годишниот фудбалер е еден од милениците на навивачите на Бешикташ, бидејќи Тосун беше дел од Бешикташ во периодот 2014-2018 година и му помогна на тимот да ја освои титулата во турската Супер лига, како и да направи пласман во Лигата на шампионите. Потоа беше продаден на Евертон за 22 милиони евра. 

Договорот на Џенк Тосун со англискиот клуб истекува и нема да биде продолжен. Напаѓачот веќе постигнал договор со раководството на Бешикташ за негово враќање во Истанбул. Се очекува напаѓачот со Бешикташ да потпише тригодишен договор.

Јувентус е блиску до комплетирање на трансферот на Филип Костиќ од Ајнтрахт Франкфурт, пренесува „Билд“.

Преговорите меѓу двата клуба траат подолго време, а клубот од Торино му даде 15 милиони евра на српскиот крилен напаѓач, додека Ајнтрахт притиска за 20 милиони. Самиот Костиќ изрази желба да игра во италијанската Серија А.

Филип Костиќ е прогласен за најдобар играч во Лига Европа, кој го освои неговиот клуб Ајнтрахт. Кариерата на 29-годишниот фудбалер започна во Раднички Крагуевац, а потоа се пресели во Гронинген во Холандија и германски Штутгарт и Хамбургер пред да заигра за Ајнтрахт.

Англиската асоцијација на професионални фудбалери (ПФА) на социјалната мрежа „Твитер“ ги објави имињата на сите претенденти за наградата најдобар играч на сезоната која заврши во шампионатот на Англија.

Меѓу претендентите беа тројца претставници на Ливерпул – Вирџил ван Дајк , Мохамед Салах и Садио Мане. Меѓу другите номинирани за наградата се и белгискиот играч од средниот ред на Манчестер Сити, Кевин де Бруин и напаѓачите Кристијано Роналдо (Манчестер Јунајтед) како и Хари Кејн (Тотенхем). Добитникот на наградата ќе биде објавен следниот четврток, 9- јуни.

Да напоменеме дека последните две сезони Кевин де Бруин стана победник во оваа номинација, а претходно победија Вирџил ван Дајк и Мохамед Салах.