Репрезентативецот на Македонија, Енис Барди, во отсуство на Стефан Ристовски ќе биде капитен  на екипата, на стартот од новиот циклус од Лигата на нации против селекцијата на Бугарија.

„Имаме искуство, подготвени сме да играме паметно и кога сме фаворити. Имаме победнички менталитет. Многу ни е важно добро да стартуваме. Имаме освежувања во тимот, но физички и психички сме подготвени за предизвикот. 

Чест ми е да сум капитен, но секогаш велам дека сите сме капитени и сите во одредени моменти можеме да дадеме дополнителна вредност. Успехот на селекцијата ни е најважен. Последен пат кога бев капитен дадов три гола и не би било лошо да продолжам така“, изјави Енис Барди.

Натпреварот помеѓу Бугарија и Македонија се игра денес во 18 часот на стадионот во Разград.

Дуелот помеѓу шампионите на Европа и Јужна Америка наречен Финалисима, му припадна на Аргентина која со резултат 3:0 ја совлада селекцијата на Италија.

Спектакл натпреварот се одигра на стадионот Вембли во Лондон, местото каде Италија минатото лето се закити со титулата шампион на Европа.

Капитенот на Аргентина, Лионел Меси одигра извонреден натпревар, забележувајќи две асистенции. Првата кога го проигра Лаутаро Мартинез кој го постигна голот за водство од 1:0, а втората асистенција беше кон Дибала кој го совлада Донарума во судиското надокнадување за конечни 3:0. Вториот гол за Аргентина го постигна Ди Марија.

Играчот од средниот ред на Лестер, Јури Тилеманс е главна трансфер цел на Арсенал.

 Според новинарот Фабрицио Романо, лондонскиот клуб продолжува да преговара околу ангажманот на 25-годишниот белгиски репрезентативец.

Според информациите „топџиите“ за реализација на трансферот се подготвени да платат околу 50 милиони евра.

Тилеманс сезонава одигра 46 натпревари, постигна 7 гола и 4 асистенции. Неговиот договор со Лестер истекува во јуни 2023 година.

Англиските портали објавија декас луѓето од Манчестер Јунајтед полека ги финишираат преговорите со фудбалерот на Вилјареал, Пау Торес.

Агентите на 25-годишниот дефанзивец неколку недели водат интензивни разговори за негов ангжман на – „Олд Трафорд“. Торес во последнава сезона одигра 33 мечеви со ефект од 5 голови и 1 асистенција.

За Шпанија има реализирано 17 натпревари и постигнато 1 гол. Во моментов нема конкретни информации за висината на трансферот.

Мохамед Салах нема да има проблем да го напушти „Енфилд“ и да се пресели во друг клуб од Премиер лигата, пренесува „Атлетик“.

Египќанецот речиси една година преговара за нов договор со челниците на клубот, но засега не е постигнат договор, иако Салах влезе во последната година од договорот.

Салах одлучил доколку не се договори со Ливерпул во следните неколку дена, да почне да преговара со други клубови, пред се од Премиер лигата, пренесе „Атлетик“.

Тој смета дека како слободен играч, без обештетување следното лето ќе може да добие многу подобри финансиски услови од друг клуб.

Нголо Канте би можел да го напушти Челзи ова лето.

Лондонскиот клуб и 31-годишниот играч за врска со месеци преговараат за условите за нов договор. Актуелниот договор меѓу Французинот и Челзи истекува во летото 2023 година.

Канте е среќен во Челзи, но неговата иднина останува неизвесна бидејќи многу клубови имаат понуди до Челзи за него.

За Канте беше објавено дека е најзаинтересиран Манчестер Јунајтед.

Легендарниот Португалец, Жорж Жезус, е нов тренер на турскиот гигант Фенербахче. 

Договорот на Жезус и Фенербахче е потпишан на една година. Со овој избор клубот од Истанбул сака да ја прекине долгата серија без освоена титула, и да се врати на старите победнички стази.

Португалскиот тренер е познат по своите успеси во водењето на Бенфика и Спортинг од Лисабон.

Фудбалерот на Реал Мадрид и репрезентативец на Велс, Герет Бејл, соопшти дека дефинитивно го напушта гигантот од Мадрид. Неговиот договор со клубот истекува до крајот на јуни, и денес тој преку социјалните мрежи се збогува со Европскиот шампион.

„Неверојатно искуство, кое нема никогаш да го заборавам. Сакам да му се заблагодарам на соиграчите, тренерите, стручниот штаб и целиот персонал за големата поддршка. Овде стигнав пред девет години и ја исполнив желбата да играм за Реал. Сакав да го носам совршениот бел дрес со грбот на Реал на своите гради, да играм на Сантијаго Бернабеу и да освојувам трофеи“, напиша Бејл.

Велшкиот репрезентативец стигна во Реал од Тотенхем во 2013 година за 101 милион евра. Со „кралскиот клуб“ тој беше три пати шампион на Шпанија, и пет пати првак во Лигата на шампиони.

Англискиот фудбалски состав Брајтон сака да го доведе напаѓачот на Барселона, Мартин Брајтвајт.

Данецот кој за неколку дена ќе наполни 31 година ќе биде ставен на трансфер-листата а „галебите“ ќе се обидат да го  купат , пишува – „Мундо Депортиво“.

Фудбалерот кој се соочуваше со повреди и одигра само 4 натпревари на кои постигна 2 гола. Информациите од „Камп Ноу“ велат дека искусниот фудбалер не влегува во плановите на тренерот, Чави и сигурно ќе си замине.

Пол Погба денес и официјално го напушти Манчестер Јунајтед. На францускиот репрезентативец му истече договорот со екипата од Олд Трафорд.

Јунајтед од фудбалерот се збогува преку порака на социјалните мрежи, со која му се заблагодарија на неговите услуги.

Пол Погба на вкупно 233 натпревари за „црвените ѓаволи“постигна вкупно 39 гола и 51 асистенција. Тој веќе започна преговори за враќање во редовите на Јувентус од каде и пристигна во Манчестер Јунајтед.