Садио Мане може да ја продолжи кариерата во француската Лига 1. Пари Сен Жермен е заинтересиран за услугите на 30-годишниот крилен напаѓач, тврдат медиумите од Франција.

Според нив, парискиот клуб ќе биде фаворит за потпис на Сенегалецот доколку тој реши да го напушти Ливерпул. Поради сериозниот интерес на ПСЖ и евентуалната висока плата, Мане се сомнева дали треба да го продолжи договорот со Ливерпул.

Да потсетиме, Садио Мане се пресели во Ливерпул од Саутемптон во 2016 година. 30-годишниот сенегалски фудбалер оваа сезона забележа 49 настапи за Ливерпул во сите натпреварувања. Постигна 22 гола и имаше две асистенции. Неговата вредност се проценува на 80 милиони евра.

Екипата на Манчестер Сити, продолжува со инвестирање во играчи кои настапуваат во одбраната. Тренерот Гвардиола не е задоволен со моменталните сили во дефанзивата. За таа цел клубот ќе се обиде да го доведе централниот дефанзивец на Интер, Алесандро Бастони.

Медиумите во Англија пренесуваат дека од Сити веќе доставиле понуда до нероазурите во висина од 60 милиони евра која наводно е одбиена. Но по се изгледа тоа не е крај, и се очекува зголемување на понудата во наредниов период.

Фудбалерот на Кристал Палас, Лука Миливојевиќ, ова лето ќе ја напушти Премиер лигата и ќе се врати во редовите на грчки Олимпијакос.

31-годишниот бивш репрезентативец на Србија, договорил тригодишна соработка со црвено-белите од Пиреја. Ова значи дека Миливојевиќ ќе се врати во клубот за кој настапуваше до 2017, и од каде замина за Англија и Кристал Палас.

Фудбалерот од одбраната на Севиља, Жил Кунде, ќе биде првото засилување за Челзи после продажбата на клубот.

Екипата од Стенфорд Бриџ на лето ќе остане без двајца од своите стандардни првотимци. Антонио Рудигер заминува во Реал Мадрид, а Андреас Кристенсен најверојатно ќе направи трансфер во Барселона, па така на Челзи му е неопходно доведување на нов квалитетен штопер.

Според информациите, 23-годишниот Кунде веќе постигнал усмен договор за премин во Челзи ова лето. Севиља за реализација на трансферот се очекува да бара околу 59 милиони фунти.

Албанската влада прогласи национален празник следната среда, кога во Тирана ќе се игра финалето на Лигата на конференциите меѓу Рома и Феенорд.

„Главниот град ќе биде пешачка зона како дел од мерките за најпримерно да се организира еден од најголемите настани во Албанија“, изјави албанскиот министер за внатрешни работи, Бледи Чучи.

На натпреварот се очекува да присуствуваат до 100.000 италијански и холандски навивачи. Секој клуб доби по 4.000 влезници за финалето на третото европско клупско натпреварување.

Капацитетот на Националната арена во Тирана е 20.000 седишта.

„Ги преземаме сите мерки да го направиме денот празник за сите, не само за италијанските и холандските навивачи“, додаде Чучи

Фудбалската федерација на Македонија информира дека бараж натпреварот за Првата фудбалска лига помеѓу екипите на Тиквеш и Воска ќе се одигра на 22. мај на стадионот Младост во Струмица.

Ваквата одлука е донесена после заеднички состанок на Комисијата за безбедност и натпреварување при ФФМ, со Министерството за внатрешни работи.

Претходно имаше најава дека баражот ќе се одигра во Прилеп или на Националната Арена во Скопје.

Повредата на дефанзивецот на Ливерпул Џо Гомез не е толку сериозна како што првично изгледаше по вчерашниот натпревар со Саутемптон.

24-годишниот Англичанец на крајот на првото полувреме го истегна зглобот, а на негово место влезе Џордан Хендерсон, кој на теренот се појави на почетокот на вториот дел. По мечот, Гомез носеше заштита на ногата и се движеше со патерици.

Денес, сепак, дефанзивецот беше подложен на скенирање, кое покажа дека нема сериозно оштетување на скочниот зглоб, а според Тајмс во Ливерпул сега се уверени дека тој ќе биде на располагање за финалето од Лигата на шампионите против Реал Мадрид.

Финансиските проблеми на Интер немаат крај и клубот и ова лето ќе мора да продава некои од своите најдобри фудбалери.

За клубот да функционира нормално му е потребен приход од 70 милиони евра и затоа ова лето повторно се очекува заминување на некоја од ѕвездите.

Италијанските медиуми пренесуваат дека Интер одлучил да го стави на продажба Алесандро Бастони и ќе го продаде ако добие понуда од 60-70 милиони евра.

Интерес за младиот дефанзивец покажуваат Манчестер Сити и Баерн Минхен, а Интер ќе се согласи на продажба ако пристигне понуда повисока од 60 милиони евра.

„Газета дело Спорт“ открива дека во тој случај „нероаѕурите“ ќе се насочат кон капитенот на Милан, Алесио Ромањоли, во кого гледаат евтина замена за Бастони, бидејќи му завршува договорот и може да пристигне без обештетување.

Раководството на Болоња најверојатно преговара со тренерот на украински Шахтјор, Роберто де Зерби, за преземање на тимот следната сезона.

Според италијанските новински агенции, актуелниот тренер на италијанскиот клуб Синиша Михајловиќ може да ја напушти функцијата поради здравствени проблеми. Де Зерби е подготвен да го заземе неговото место, со плата од најмалку 2 милиони евра годишно.

Јувентус има две опции како евентуални наследници на Џорџо Киелини во дефанзивата на тимот за следната сезона. Станува збор за двајца дефанзивци од Арсенал и Наполи кои се позиционирани како потенцијални засилувања на стоперската позиција. Станува збор за младиот 24-годишен дефанзивец на Арсенал, Габриел, како и на далеку поскапиот и поатрактивен дефанзивец на Наполи, Калиду Кулибали.

Киелини го одигра последниот меч пред навивачите на Јувентус во претпоследното коло на Серија А и најави дека ја завршува долгогодишната кариера во еден од најпопуларните италијански клубови