Весникот „Билд“ објави дека Eрлинг Халанд ќе има клаузула во Манчестер Сити во висина од 140 милиони евра која може да биде активирана доколку фудбалерот посака да замине од англискиот состав.
Норважанецот пред неколку денови потпиша за „граѓаните“ а неговиот сегашен тим Борусија Дортмунд ќе добие 75 милиони евра.
21- годишниот фудбалер иако се поврзуваше со Реал Мадрид, сепак се определи да замине на „Етихад“.
Фудбалерите на Арсенал доцна синоќа загубија на теренот на Тотенхем со 3-0 а нивниот тренер, Микел Артета, не крие дека е разочаран од судењето.
Домаќините прво добија сомнителен пенал а потоа по искулучувањето на Холдинг имаа и човек повеќе на теренот. Токму тоа не му се допадна на Артета.
„Ако кажам што мислам ќе бидам суспендиран на шест месеци. Викнете ги судиите, тие нека ги коментираат одлуките“, потенцираше тренерот на Арсенал.
Англискиот “Скај спорт“ повикувајќи се на извори во Германија, пренесува дека полскиот напаѓач Роберт Левандовски, им кажал на челниците на неговиот актуелен клуб Баерн Минхен, дека не сака да го продолжи неговиот договор кој истекува во јуни 2023 година. Тој исто така изразил желба ова лето да биде продаден во Барселона.
Во информациите се наведува дека мотивите за заминување на Левандовски не се од финансиска причина, туку тој сака нов предизвик во својата кариера, настапувајќи во Ла Лига.
33-годишниот Левандовски е член на Баерн од 2014 година, и има постигнато 343 голови во сите натпреварувања.
Тренерот на Борусија Дортмунд, Марко Розе потврди дека 33-годишниот играч од средниот ред Аксел Витсел ќе го напушти тимот на крајот од оваа сезона.
„Витсел е одличен играч, одигра многу големи натпревари за Борусија. Сепак, решивме да не го продолжиме договорот со него“, изјави Розе.
Аксел Витсел за германскиот клуб настапува од 2018 година. Белгискиот играч за врска постигна 13 гола и даде шест асистенции на 144 натпревари за Борусија Дортмунд. Во Германија, Витсел го освои Купот и Суперкупот на Германија. Од 2008 година, играчот од средниот ред е повикан во белгиската репрезентација.
Напаѓачот на Реал Мадрид, Карим Бензема, беше стрелец во натпреварот од 36.коло на шпанското првенство, против екипата на Леванте.
Кралскиот клуб славеше на домашен терен со 6:0, а Бензема го запиша својот 27. гол на 31 натпревар во Примера оваа сезона.
34-годишниот Французин по бројот на постигнати голови во дресот на Реал Мадрид, се изедначи со Раул, и сега двајцата имаат по 323 погодоци.
Најдобар стрелец на Реал Мадрид на сите времиња останува Кристијано Роналдо со 450 гола.
Еден ден откако по 36-ти пат стана холандски шампион, Ајакс го објави името на новиот тренер на тимот, а тоа е Алфред Шредер. Тој доаѓа на местото на Ерик тен Хаг, кој стана менаџер на Манчестер Јунајтед.
„Ајакс, Бриж и Алфред Шредер се договорија за трансфер на тренерот во клубот. Шредер ќе потпише договор кој започнува по завршувањето на оваа сезона и ќе заврши на 30 јуни 2024 година. Договорот има опција за дополнителна трета година“ се вели на официјалниот сајт на клубот од Амстердам.
Шредер многу добро го познава Ајакс, бидејќи му беше прв асистент на Ерик тен Хаг од јануари 2018 до 2019 година.
Шредер ја започна својата кариера како асистент во Витесе, потоа премина во Твенте, Хофенхајм, асистент во Ајакс, помошник на Роналд Куман во Барселона, а од јануари 2022 година беше тренер на Бриж.
Точно луѓе. На денешен ден во 2012 година бевме сведоци на најголемото финале на која било сезона во историјата на фудбалот. На сити му требаше победа за да ја освои својата прва титула во Премиер лигата.
Манчестер Сити ја освои титулата на драматичен начин во последната минута со погодокот на Агуеро…
Голманот на Ливерпул, Алисон, не крие дека е генерално задоволен како финишира фудбалската сезона за неговиот тим.
„Црвените“ се во мртва трка со Манчестер Сити за титулата во Премиер-лигата, на крајот на месецов ги чека финалето во Лигата на шампионите против Реал Мадрид додека в сабота ќе го одиграат финалето во Фа Купот против Челзи.
„Нашиот тим игра со страст и тоа ни дава дополнителна енергија. Сакаме да го освоиме Купот. Тоа беше една од нашите цели од почетокот на сезоната и сега стигнавме до финалето“, вели Бразилецот.
Претседателот на УЕФА Александар Чеферин го објасни принципот на распределба на билетите за финалето на Лигата на шампионите, во кое се пласираа Ливерпул и Реал Мадрид.
Двата тима добиваат по само 19.618 влезници, со оглед на тоа што стадионот има капацитет од 75.000. Менаџерот на Ливерпул, Јирген Клоп изрази збунетост поради овој факт, а Чеферин го објаснил принципот и договорните односи со спонзорите не дозволуваат УЕФА да ја промени распределбата. „Пред неколку дена му го објаснив истото на еден од тренерите на тимовите кои стигнаа до финалето. Сега ќе го повторам тоа. Ми требаше подолго време бидејќи ги прегледав сите бројки. Од сите приходи од финалето, УЕФА добива 6,5%.додека 93,5% добиваат клубовите. Од сите други натпревари 100% одат за клубовите. Навивачите на двата тима добиваат по 20.000 билети. Ако спонзорите кои обезбедуваат повеќе од 100 милиони евра, од кои 93,5% одат за клубовите, добиваат билети, тоа е затоа што ние сме обврзани да го направиме тоа според договорите со нив. Ако влезниците се 10 евра нема да смени многу кај нас, но ќе смени многу за самите клубови. Навистина многу“, коментираше Чеферин.
Пријателскиот натпревар меѓу јужноамериканските фудбалски гиганти Бразил и Аргентина, закажан за во јуни во Австралија е откажан.
Натпреварот беше планиран како дел од подготовките на двете селекции за Светското првенство во Катар, но координаторот на Бразилската фудбалска конфедерација Жунињо Паулиста изјави дека нивните аргентински колеги одлучиле да го откажат мечот.
Аргентинската фудбалска федерација не даде коментар за ова прашање, но се претпоставува дека откажувањето на натпреварот најверојатно е диктирано од одлуката на ФИФА да се преигра квалификацискиот натпревар за Светското првенство меѓу Бразил и Аргентина. Натпреварот меѓу двете селекции во септември минатата година беше прекинат набргу откако здравствените служби влегоа на терен, бидејќи дел од играчите во Аргентина ги прекршиле протоколите за ковид-19.
