Напаѓачот на Ливерпул, Дивок Ориги е една од трансфер целите на Наполи за летниот преоден рок. 

Калчолигашот веќе покажа интерес за белгискиот репрезентативец  во јануари, но посериозни разговори со Ливерпул никогаш не се одржаа. Сепак во последниов период, се зачестиле контактите помеѓу претставниците на Наполи и менаџерите на играчот.

Според тренерот Спалети, Дивок Ориги би бил совршена алтернатива за Виктор Осимен во нападот на екипата.

Бразилскиот фудбалер, Нејмар, откри дека сакал да се врати во Браселона пред Лео Меси да ги напушти Каталонците и да му се приклучи во редовите на ПСЖ.

Познато е дека Французите платија рекордни 222 милиони евра во 2017 да го откупат договорот на брзоногиот играч.

„Се обидов да се вратам во Барса. Тоа  сепак беше невозможно. Сега сум среќен што Лео дојде бидејќи тој ми е пријател и добро се согласуваме“ – вели Бразилецот кој во сезонава има само 16 настапи. Тој постигна 4 голови и направи 4 асистенции.

Фудбалските федерации на Полска, Шведска и Чешка со заедничко соопштение бараат промена на планираните натпревари во Русија од плејофот за СП во Катар 2022.

На 24 март во Москва е закажан натпревар меѓу репрезентацијата на Русија и Полска, а истиот ден во Стокхолм, Швеѓаните ќе играат со Чешка. Доколку победат Русите, на 29 март ќе му гостуваат на победникот од другиот меч. Подобриот од овој дуел ќе се пласира во финалето во Катар. Полска, Шведска и Чешка изразија загриженост за безбедноста поради војната со Украина.

Поради оваа причина тие ги повикаа ФИФА и УЕФА да понудат други опции за местото на одигрување на овие натпревари. Во Шведска велат: Фудбалски натпревар со Русија е речиси незамислив.

35-годишниот уругвајски напаѓач Единсон Кавани е подготвен да ја разгледа понудата од популарниот бразилски клуб Ботафого.

Според порталот „Goal“, двете страни веќе оствариле првичен контакт, но не ги прецизирале деталите за можниот договор, како и за потенцијалната плата на играчот.

Од Ботафого се сериозни во своите намери за засилување со Кавани, кој моментално е играч на Манчестер Јунајтед но неговиот договор истекува на лето. Веројатноста да остане на Олд Трафорд е минимална и покрај тоа што привремениот тренер Ралф Рангник му порача да не брза со својата одлука за заминување.

Напаѓачот на Челзи, Ромелу Лукаку, најверојатно ќе го напушти клубот по завршувањето на тековната сезона.

Белгиецот игра во разочарувачка форма после неговото доаѓање на „Стемфорд Бриџ“, и никако да се вклопи во системот на игра кој го форсира тренерот Тухел.

Според информациите кои доаѓаат од Лондон, Лукаку не крие дека направил грешка што ја прифатил понудата од Челзи. Постојат две варијанти кои се споменуваат во однос на неговата фудбалска идинина. Првата е негово повторно враќање во Интер каде настапуваше пред да премине во Челзи, а втората солуција е негов трансфер во Тотенхем кај Антонио Конте.

ФФМ ја сподели објавата на нашиот фудбалски репрезентативец, Ѓоко Зајков, кој во моментов е во Украина во Полтава.

„Градот Полтава каде што се наоѓаме не беше цел на напад. Во овој момент сме безбедни. Од клубот има најава за странците кои сме тука да се организира превоз со мини бус и евентуално да бидеме спроведени до некоја граница. Но, мора да се создадат услови. Во моментот воздушниот простор е затворен а нема ниту возови. Ги чекаме инструкциите од клубот. Во градот моментално работат само маркети и многу мал број на ресторани. Доколку има некои нови информации ќе се обидам да пренесам”, стои во објавата на Зајков по денешниот напад од страна на Русија на територијата на Украина.

Фудбалскиот шампионат на Украина е прекинат откако Претседателот Володимир Зеленски и официјално прогласи воена состојба во целата земја поради нападот од страна на Русија.

Милан и Интер се заинтересирани за плејмејкерот на Реал Мадрид, Дани Себаљос.

Себаљос минатото лето се врати во Реал од позајмицата во Арсенал, но до сега има само три настапи и јасно е дека Анчелоти не смета на него.

Реал Мадрид го стави Шпанецот на трансфер листа, а миланските клубови сакаат да ја искористат таквата ситуација и да го доведат во своите редови.

Интерес за Себаљос покажува и Бетис, но Шпанецот преферира преселба во Серија А и неговиот агент веќе е во контакт со миланските гиганти.

Ѕвездата на Манчестер Јунајтед, Кристијано Роналдо, верува дека неговиот тим ќе успее на свој терен да слави над Атлетико Мадрид и ќе се пласира во следната фаза од Лигата на шампиони.

На натпреварот кој се одигра во Мадрид, конечниот резултат беше 1:1,а стрелци на головите беа младите Жоао Феликс за Атлетико и Еланга за Јунајтед.

„ Одлично е чувството да се вратиш во Мадрид, кој е еден од ретките градови на светот кој можам да го наречам свој дом. Прекрасни чувства, одлични играчи и супер натпревар, тоа е Лигата на шампиони. Мајка на сите натпреварувања“, истакна Роналдо на социјалните мрежи.

„Сега имаме можност да ја завршиме работата на својот стадион и да им покажеме на сите зошто Олд Трафорд е познат како “театар на соништата“.

Реванш натпреварот е закажан за 15.март.

На вчерашниот меч во Лигата на шампионите меѓу Бенфика и Ајакс кој заврши 2-2, фудбалерот на холанѓаните, Себастијан Халер, влезе во историјата.

Тој погоди за предност на неговиот тим од 2-1 и стана петтиот фудбалер кој постигнал повеќе од седум голови во серија во елитната конкуренција на Европа.

Воедно напаѓачот на „копјаниците“  е првиот што постигнал најмалку 11 гола во дебитантската сезона во елитното европско клупско натпреварување.

Дефанзивецот на Атлетико Мадрид, Хозе Хименез, по нерешените 1-1 со Манчестер Јунајтед во првото осмина–финале од Лигата на фудбалските шампиони, вели дека резултатот не е реален на прикажаното на теренот.

„Мислам дека требаше да победиме. Добро се браневме, имавме напади, создававме ситуации, двапати ја погодивме пречката, но, Манчестер Јунајтед е многу добар тим и погоди од контра-напад откако ја загубивме топката“, вели Хименез.

Реваншот меѓу шпанскиот тим и „црвените ѓаволи“ ќе биде одигран во Англија на „Олд Трафорд“ на 15 март.