Англискиот клуб Вест Хем се договори со калчолигашот Сасуоло околу купувување на италијанскиот репрезентативец Џанлука Скамака.

Целиот трансфер се очекува да достигне сума од 36 милиони евра плус дополнителни бонуси кои ќе зависат од настапите на напаѓачот во неговиот нов клуб Вест Хем.

Интерес за италијанскиот фудбалер покажуваше и францускиот шампион ПСЖ, меѓутоа најповолна финансиска понуда испрати премиерлигашот од Лондон.

Фудбалскиот клуб Интер му наложи на својот напаѓач Ромело Лукаку да започне нов режим на исхрана и да применува медитеранска диета, за да се врати на пристојна килажа.

Белгискиот голгетер се врати во Милано на позајмица од Челзи каде настапуваше една сезона. Пред заминувањето во Лондон тој имал 101 килограм, а сега неговата килажа била значително поголема.

На Лукаку му е наложено во наредниот период да конзумира риба, салати, пилешко и ширатаки паста, а забрането му е да јаде компир, пржена храна, и не смее да пие пијалоци кои содржат шеќер и алкохол.

Лукаку во претстојната сезона за Интер ќе игра како позајмен играч на Челзи.

Тотенхем од почетокот на летото е доста активен на трансфер пазарот. Досега Спарс главно се фокусираа на засилување на својот тим, доведувајќи ги Ричарлисон, Ив Бисума, Иван Перишиќ, Клемент Ленглет, Фрејзер Форстер и Џед Спенс. Сега клубот почнува посериозна работа на излезните трансфери, со цел во наредните денови да се раздели барем со неколку свои актуелни играчи, кои не се дел од плановите на Антонио Конте, пишува „Стандард“.

Најпрво се работи на продажбата на Џафет Танганга, Брајан Хил и Џовани Ло Селсо. Во моментов клубот активно бара купувачи. Доброто е што има интерес за секој од нив, па дури има и преговори со други клубови.

Танганга е предмет на интерес од Милан. „росонерите“ дури веќе преговараат за негово привлекување. Интерес за 23-годишниот играч има и од Саутемптон и Борнмаут, но италијанскиот шампион е чекор пред конкурентите.

Брајан Хил го бараат Реал Сосиедад и Сампдорија, а не е ни чудо што Валенсија се обиде да го врати во своите редови по силниот настап на „Местаља“ на позајмица.

Португалецот Кристијано Роналдо е подготвен да ја намали платата за 30% за да го напушти Манчестер Јунајтед овој летен преоден рок, објавија неколку медиуми во Англија.

Со ваква информација, агентот на Португалецот, Жорже Мендеш им се обраќа на врвните клубови кои се потенцијално заинтересирани за услугите на Португалецот.

Познато е дека Кристијано е сериозно заинтересиран за враќање во Шпанија и преселба во Атлетико, но самиот клуб не е подготвен за овој чекор. Во моментов Атлетико нема финансиска можност за трансфер на Португалецот.

Да потсетиме дека Роналдо играше за Реал Мадрид од 2009 до 2018 година, по што се пресели во Јувентус, за кој настапуваше до 2021 година. Истата година, португалскиот напаѓач се пресели во Манчестер Јунајтед.

Неговиот договор со клубот е до 2023 година. Минатата сезона Роналдо одигра 38 натпревари за Манчестер Јунајтед во сите натпреварувања, на кои постигна 24 гола и направи три асистенции.

Менаџерот на Астон Вила, Стивен Џерард подготвува чистка во тимот. Тој изјави дека моментално има премногу играчи и некои од нив ќе мора да бидат продадени или позајмени на клубови каде што ќе добијат шанса да играат редовно.

Тимот од Бирмингем веќе се раздели со Мет Таргет и Трезеге, но се чини дека ќе има уште заминувања.

„Нашиот тим во моментов е преполн во однос на бројот на играчи. Мораме да донесеме некои одлуки и да испратиме одредени играчи во други клубови каде што ќе можат редовно да играат бидејќи овде тоа не може да се случи. Се трудиме да бидеме апсолутно искрени со сите нив и ние ги информиравме за нашите намери“, призна Џерард.

Украинскиот фудбалер Олександр Зинченко е нов играч на Арсенал.

25-годишниот фудбалер во Арсенал доаѓа од редовите на актуелниот англиски шампион Манчестер Сити, и потпиша повеќе годишен договор во трансфер вреден 32 милиони фунти.

Зинченко за Сити настапуваше од 2016 година, и одигра вкупно 128 натпревари за клубот, додека за репрезентацијата на Украина има 52 натпревари.

Германскиот весник Билд тврди дека новиот фудбалер на Барселона, Роберт Левандовски, уште не е регистриран како играч на каталонскиот клуб, па поради тоа тој нема право на играње на официјални натпревари.

За информација, професионалната шпанска фудбалска лига има строги правила во врска со регистрација на играчите. Шпанските клубови не смеат неконтролирано да купуваат нови фудбалери.

Според Билд, Барселона засега ги нема регистрирано ни Рафиња, Кеси и Кристенсен, па така новите фудбалери можат да играат само на пријателски натпревари.

Барселона мора прво да продаде неколку играчи за да ги реши проблемите со финансиите и платите на фудбалерите, и затоа каталонскиот клуб планира да се раздели со Френки де Јонг и Мемфис Депај. Барселона има долг поголем од милијарда евра, а примањата на фудбалерите во минатата сезона ги намали од 347 на 97 милиони евра.

Дефанзивецот на Баерн, Бенџамин Павард е предмет на интерес на неколку европски гиганти.. Иднината на 26-годишниот Французин е прилично неизвесна откако Германците потпишаа договор со Матијас де Лихт од Јувентус. Се погласно се зборува дека може да биде продаден, а кандидати за неговиот потпис не недостасуваат.

Според информациите, Јувентус, Челси, Атлетико Мадрид и Манчестер Јунајтед будно ја следат ситуацијата околу дефанзивецот и се подготвени да влезат во битка за неговиот потпис. И самиот фудбалер е свесен за интересот за себе и сериозно размислува за својата иднина.

Павард беше донесен во Баерн од Штутгарт во 2019 година за 35 милиони евра. Досега за Баварците има 119 настапи, 5 гола и 11 асистенции. Покрај тоа, тој е француски интернационалец со 45 натпревари и два гола, а со „петлите“ ја освои светската титула во 2018 година.

Медиумите од Англија објавуваат дека клубот Вест Хем испратил понуда до Ајнтрахт Франкфурт за ангажман на фудбалерот Филип Костиќ.

Српскиот фудбалер веќе подолго време се поврзува со заминување од Бундеслигата, а досега како најсериозен кандидат за негов трансфер се споменуваше Јувентус, кој очигледно се откажа од оваа намера.

Премиерлигашот Вест Хем во Костиќ гледа идеален кандидат за засилување на левата бековска линија на екипата. Минатата сезона Костиќ со Ајнтрахт беше освојувач на трофејот во Лига Европа, откако во финалето славеше над Глазгов Ренџерс. 

Македонскиот фудбалски репрезентативец Бојан Миовски и официјално пристигна во својот нов клуб Абердин.

Миовски ја заврши процедурата околу добивањето на работна дозвола за Велика Британија, и му се стави на располагање на стручниот штаб на шкотскиот клуб.

Претходно македонскиот напаѓач ги одработи припремите со своите соиграчи кои се одржаа во Шпанија, по што чекаше завршување на постапката околу добивањето на виза.

Своето деби во Абердин, Миовски ќе го има во недела  на куп натпреварот против Реит Роверс.