Ливерпул планира да потроши сериозна сума на пари за една од своите трансфер цели. Станува збор за голгетерот на Ајнтрахт Франкфурт, Омар Мармуш.

„Црвените“ сакаат да го имаат офанзивниот фудбалер во својот состав уште во јануари, а во Англија тврдат дека клубот од „Енфилд“ е подготвен да понуди 60 милиони фунти за египетскиот интернационалец.

Многумина потегот на Ливерпул го протолкуваа како обид да се најде замена за Мохамед Салах, чиј договор истекува на крајот од сезоната и во моментов нема индикации дека ќе биде обновен.

Мармуш има импресивна сезона во Бундеслигата, а напаѓачот постигна 13 гола на 15 натпревари од почетокот на сезоната.

Египќанецот може да игра и како централен напаѓач и на десното крило на нападот, што би било одлична опција за тренерот на „црвените“, Арне Слот.

Победата на Реал Мадрид против Осасуна со 4-0 ќе го чини Карло Анчелоти скапо, бидејќи Едер Милитао ја заврши сезоната. Бразилецот повторно заработи тешка повреда, ги скина предните вкрстени лигаменти, а исто така и менискусот, што ќе бара нова операција и пауза од минимум девет месеци.

Милитао ја доживеа истата повреда и минатото лето, па се врати на теренот дури на крајот од минатата сезона, што ја прави оваа вест најлоша можна и за него и за Реал Мадрид.

Во моментов, Карло Анчелоти располага со само еден здрав стопер, а тоа е Антонио Рудигер, бидејќи Давид Алаба сè уште не е опоравен од идентичната повреда и ќе се врати дури на крајот од годината.

Фудбалерите на Брајтон го совладаа Манчестер Сити со резултат 2-1 (0-1) во 11. натпревар од англиската Премиер лига.

Она што сега стана главна вест во европскиот фудбал е четвртиот последователен пораз на Манчестер Сити во сите натпреварувања.

По Тотенхем во Лига купот (1:2), Бурнемаут во Премиер лигата (1:2), Спортинг во Лигата на шампионите (1:4), сега Брајтон го зазеде скалпот на тимот на Пеп Гвардиола.

А тоа секако ќе запали многу црвени светла во таборот на четирикратниот последователен шампион на Англија.

И се чинеше дека нема да биде така, бидејќи Ерлинг Халанд ја затресе мрежата на домаќините во 23. минута.

Со тоа Халанд собори уште еден рекорд, но тоа нема да биде преголема утеха за него бидејќи заедно со целата екипа доживеа уште еден удар во вториот дел.

Поточно, во самиот финиш, откако Брајтон погреши и Едерсон одбрани се, мораше два пати да ја вади топката од својата мрежа.

Најпрвин капитулираше во 78. минута кога израмни Бразилецот Жоао Педро, а потоа О’Рајли по голема гужва во шеснаесетникот ја смести топката во мрежата за конечни 2-1.

Преговорите меѓу Ливерпул и десниот бек Трент Александер-Арнолд за продолжување на неговиот договор, кој завршува во летото 2025 година, се заглавени.

Според изворот, англискиот клуб не сака значително да ја зголеми платата на 26-годишниот фудбалер и да го направи поскапо платен тимски играч од напаѓачот Мохамед Салах и централниот дефанзивец Вирџил ван Дајк, со кои исто така се преговара за продолжување на нивните договори со клубот.

Претходно беше објавено дека Реал Мадрид и ПСЖ покажуваат интерес за Александар-Арнолд, но фудбалерот се уште нема донесено конечна одлука за својата иднина.

Раководството на Рома започна преговори со Роберто Манчини. Во недела се очекува клубот да го ослободи досегашниот тренер Иван Јуриќ, кој не ги оправда очекувањата откако го презеде тимот на почетокот на сезоната.

Според „Газета дело Спорт“, Јуриќ ќе биде сменет од функцијата без разлика на резултатот против Болоња во недела.

Јуриќ во досегашните единаесет натпревари на чело на Рома забележа четири победи, три нерешени и четири порази.

Роберто Манчини од неодамна е без работа, откако беше отпуштен од Саудиска Арабија, каде беше селектор н анационалниот тим. Еден од условите кои специјалистот ги постави пред раководството на Рома е да добие договор на минимум две години.

Олимпик падна во резултатска криза. Навивачите се незадоволни по поразот на домашен терен од Оксер 1-3, а тренерот Роберто де Зерби понуди да си замине.

Поразот од Оксер е трет во последните шест натпревари, во кои беа забележани и две победи и едно реми.

„Не ми зборувајте за второ, трето или четврто место. Дојдов овде да дадам, да пренесам. Живеам за нешто надвор од фудбалот. И затоа, ако има проблем со мене, подготвен сум да заминам. Парите не ме интересираат, тоа што го барам е да бидам задоволна од мојата работа. Ако велам дека тоа е моја одговорност, тоа е затоа што навистина се чувствувам така“, изјави Де Зерби.

Олимпик и понатаму е втор на табелата, сега со шест бода помалку од ПСЖ, со натпревар помалку. Тимот од Марсеј има натпревар повеќе од Монако со кој има ист број на бодови.

Баерн Минхен е решен следното лето да ја ангажира ѕвездата на Баер Леверкузен, Флоријан Вирц, со неколку опции како да го направи тоа.

Според „Билд“, Баварците се подготвени да го вклучат во зделката еден од нивните најголеми таленти – Паул Ванер.

18-годишниот офанзивен играч за врска, кој моментално е на позајмица во Хајденхајм, им се допаѓа на „фамацевтите“ и од Алијанц Арената планира да го искористи овој факт. Челниците на Баерн се подготвени да го понудат Ванер како средство за договарање во зделката, а згора на тоа да додадат и сериозна сума на пари.

Паул Ванер одлично ја започна сезоната, откако веќе постигна пет гола во сите натпреварувања. За него е заинтересиран и РБ Лајпциг.

Желбата на Флоријан Вирц е да се пресели во Баерн, а не во Реал Мадрид кој исто така е заинтересиран за него. Во исто време, Баер не сака да го засили директниот конкурент во Бундеслигата, но може да се предомисли доколку Ванер биде вклучен во зделката.

Барселона наскоро ќе ратификува договор со производител на спортска опрема врз основа на кој ќе заработи огромна сума, потврдија Каталонците.

Претседателот на клубот Јоан Лапорта, во петокот, одржа состанок со членовите на Управниот одбор на кој беше одобрена нова долгорочна соработка со американскиот производител на спортска опрема „Најки“.

Барселона и споменатата компанија веќе имаат долгорочна соработка, според претходниот договор кој важи до 2028 година, а врз основа на новиот договор меѓу двете страни соработката е продолжена до 2038 година.

Според формулацијата на актуелниот договор (до 2028 година), Барсеона добива 48 милиони евра, а кога ќе се официјализира соработката до 2038 година, тоа ќе значи дека каталонскиот гигант ќе добие загарантирани 100 милиони евра за тој период.

И тоа не е се, Барселона треба да смета и на дополнителните 100 милиони кои следуваат како бонус поради продолжување на соработката.

Нема веќе непоразени екипи во Првата македонска фудбалска лига, откако досегашниот лидер Работнички попладнево загуби на гостувањето кај шампионот Струга.

Вардар ја прекина четиригодишната серија без победа против Шкупи во ефикасен и натпревар со резултатски пресврти одигран на „Тодор Проески“.

Резултати од 14. коло:

Гостивар – Воска 4-0

Шкендија – Брера 4-3

Силекс – Пелистер 1-0

Струга Трим Љум – Работнички 1-0

Тиквеш – Беса 0-0

Вардар – Шкупи 3-2

Табела: Шкендија 27 бодови, Гостивар 27, Силекс 27, Работнички 25, Струга 25, Шкупи 16, Пелистер 16, Брера 15, Беса 13, Воска 11, Вардар 11, Тиквеш 10.

Мамс Тејлор, промоторот на организацијата „Мисфитс бокс“ најави пресметка во рингот меѓу Златан Ибрахимовиќ и Вејн Руни.

Веќе некое време се шпекулира дека Златан би можел да се испроба во боксот, а сега стигна и потврдата.

„Разговарав со Златан за борбата. Јас сум добар пријател со неговиот менаџер и ние тројца разговаравме на ова тема. Беше многу интересно бидејќи Златан гледаше многу борби во нашата организација и знае за што се работи. Тој би бил одличен боксер“, рече Тејлор, а потоа го откри името на ривалот:

„Како што стојат работите, противник на Златан ќе биде Руни. Имаше разговори за тоа и мислам дека е само прашање на време. Има и други имиња, но тие не се толку големи како овие двајца”.

Засега не се знае кога советникот во Милан и тренерот на Плимут би можеле да си ги одмерат силите. Руни е познат како голем љубител на боксот, но засега не се огласил по повод можната борба.

Двајцата играа заедно во Манчестер Јунајтед каде ја освоија Лига Европа, Лига Купот и Комјунити Шилд.