Веднаш штом Рубен Аморим стана нов тренер на Манчестер јунајтед, јасно беше дека во јануарскиот рок ќе се обиде максимално да го прилагоди ростерот на сопствената визија што значи дека некои играчи ќе го напуштат клубот, особено оние на кои договорите им истекуваат на крајот од сезоната.

Германскиот инсајдер Флоријан Платенберг тврди Јунајтед нема да му понуди нов договор на Кристијан Ериксен, што значи дека во јануари ќе се обидат да го продадат за клубот да добие барем некаков вид компензација.

Аморим сака освежување на сите позиции во средниот ред , наводно го сака во тимот Даглас Луиз. Бразилецот е незадоволен во Јувентус, бидејќи не успева да се снајде во системот на Тијаго Мота.

Ериксен пристигна во Јунајтед летото 2022 година, една година откако доживеа срцев удар на ЕП, а во меѓувреме половина сезона ја мина во Брентфорд, каде му се врати на фудбалот.

Англискиот фудбалски шампион Манчестер сити размислува да ги ангажаира играчите од средниот ред Мартин Субименди или Едерсон во следниот преоден рок.

Според „Телеграф“ клубот ги гледа овие играчи како потенцијални замени за освојувачот на Златната топка во 2024 година, Родри, кој има скинати вкрстени лигаменти.

Дваесет и петгодишниот Субименди игра за Реал Сосиедад. Оваа сезона Шпанецот има 18 натпревари за клубот во сите натпреварувања, еден гол и една асистенција. „Трансфермаркт“ ја проценува пазарната вредност на играчот од средниот ред на 60 милиони евра.

Едерсон (25) е играч на Аталанта и е во клубот од 2022 година. Оваа сезона Бразилецот одигра 17 натпревари за клубот, на кои постигна два гола и една асистенција.

„Трансфермаркт“ ја проценува вредноста на играчот на 40 милиони евра.

Комисијата за натпревари во рамки на Фудбалската федерација на Македонија попладнево донесе одлука за одложување на натпреварите од 17. коло во Првата македонска фудбалска лига. Според распоредот натпревари требаше да се одиграат утре, 1 декември (недела) со почеток во 13:00 часот.

-Одлуката е донесена согласно препораките на Министерството за Внатрешни работи поради неодамнешните случувања и настани и спречување на било каков вид на насилство и недолично однесување на спортските натпревари, соопшти ФФМ.

Комисијата за натпревари ги презакажа одложените натпревари за 3 декември (вторник) со почеток во 13:00 часот.

Мохамед Салах, најдобриот фудбалер на Ливерпул, минатата недела, по победата над Саутемптон (3-2) во која постигна два гола, на новинарите им откри дека не добил никаква понуда за продолжување на договорот. На „Сент Мери“ стадионот разочарано им кажа на новинарите дека големи се шансите да го напушти клубот по завршувањето на сезоната.

Изјавата на Салах ги разочара навивачите на Ливерпул и го вклучи алармот кај големите клубови. Салах е еден од најдобрите во светот, плус тој без оштета може да го напушти Ливерпул.

Наводно, интерес за Салах има кај ПСЖ, Барселона и Баерн, а медиумите во Италија тврдат дека челниците на Интер веќе подготвиле конкретни чекори.

За да му понудат финансиски услови кои нема да може да ги одбие, Интер наредното лето ќе стави на продажба тројца напаѓачи, станува збор за Марко Арнаутовиќ, Хоакин Кореа и Мехди Тареми.

Сериозен удар за Ливерпул ќе биде отсуството на централниот дефанзивец Ибрахима Конате. Дефанзивецот на социјалните мрежи објави порака во која потврди дека е повреден. Неговата повреда е на коленото и настанала по контакт со играчот на Реал Мадрид, Ендрик.

„Многу е фрустрирачки да се повредите на самиот крај од еден одличен натпревар во средата навечер. Сега го започнуваме процесот на опоравување, но едно нешто што можам да ветам е дека ќе се вратам и повторно ќе бидам најдобар. Ви благодариме за уникатната поддршка на „Енфилд“, стои во дел од пораката на Ибрахима Конате.

Очекувањата се дека дефанзивецот ќе отсуствува цел месец декември, а првичната прогноза е помеѓу 5 и 8 недели.

Валенсија во последните години стана тим од кој младите фудбалери брзо заминуваат, па така нема некој квалитет како што беше некогаш кога шпанскиот тим беше дел од Лигата на шампионите, своевремно играше и финале во ова натпреварување.

Сега клубот за сума од 30 милиони евра би можел да го напушти Кристијан Москеро.

Станува збор за одличен стопер на кого Валенсија се обиде да му даде договор до 2026 година, но шпанскиот стопер веројатно ќе го промени клубот.

Најмногу интерес засега според медиумите покажал Милан кој е спремен да ги плати споменатите 30 милиони евра.

Москеро беше дел од репрезентацијата на Шпанија на Олимписките игри летово каде што го освои златниот медал.

Зинедин Зидан би можел да го замени Луис Енрике на кормилото на ПСЖ.

ПСЖ има очајни резултати оваа сезона во Лигата на шампиони и раководството е разочарано.

„Светците“ после синоќешниот пораз значително ги намалија шансите за пласман во нокаут фазата.

Поради тоа ПСЖ размислува за тренерска смена, а главна цел е Зинедин Зидан, кој веќе три години е без ангажман.

Драган Стојковиќ ќе остане селектор на фудбалската репрезентација на Србија. Ова го потврди генералниот секретар на Фудбалскиот сојуз на Србија, Бранко Радујко.

„Разговаравме со Драган Стојковиќ и уште еднаш потврдивме дека останува селектор на А репрезентацијата. Согласно овој и важечкиот договор, ја продолжуваме соработката со заеднички интерес. Понудите се составен дел од тренерската работа, исто како што е природно секоја сериозна организација да има навремени и адекватни решенија во случај на промени. Не сакаме да се занимаваме со шпекулации туку со конкретни теми. Не чека ждрепката за Светското првенство, во март има плеј-оф дуели со Австрија, па многу брзо ќе имаме за што да разговараме кога е А репрезентацијата во прашање“, изјави Радујко.

Пред неколку дена се појави информација дека Пикси добил милион доларска понуда од Азија и дека е блиску до заминување од селекторската функција на Србија, како и дека функцијата ќе ја напушти на почетокот на 2025 година.

Англискиот тренер Френк Лампард е новиот менаџер на Ковентри Сити, официјално соопштија од клубот. 46-годишниот тренер потпиша договор на 2,5 години до јуни 2027 година. Негови помошници ќе бидат Џо Едвардс и Крис Џонс.

Поранешниот тренер на Дерби Каунти, Евертон и Челзи ќе дебитира на чело на Ковентри веќе во сабота, кога тимот ќе му гостува на Кардиф.

Ковентри се наоѓа на 17. место во Чемпионшип со само 17 бодови.

Челзи во наредните месец дена нема да може да смета на услугите на капитенот Рис Џејмс. Десниот бек се повреди, а по деталните прегледи потврдено е дека има истегнување на мускулот и ќе мора да паузира четири недели. Џејмс нема среќа со повредите, а сезонава одигра само четири натпревари.

„Мислам дека е најдобро за неговиот случај да не коментираме многу. Колку повеќе зборуваме за тоа, толку повеќе расте притисокот врз него“, рече тренерот на Челзи, Енцо Мареска.

Челзи сезонава игра добро во Премиер лигата и по 12 кола е на третото место на табелата со 22 бода, само еден помалку од второпласираниот Манчестер сити, додека лидерот Ливерпул има 31 бодови.

Следен ривал на тимот од Лондон е Астон вила, а дуелот ќе се игра на 1 декември на „Стемфорд бриџ“.