Тренерот на Манчестер Јунајтед, Ралф Рангник зборуваше за напаѓачот Единсон Кавани и неговата иднина во клубот.

„Разговаравме за Кавани и тој знае дека дефинитивно нема да го пуштам да си замине во јануари. Ни треба Еди. Разбирам дека мора да остане. Имавме неколку разговори во текот на изминатите неколку недели. Веројатно, најчесто зборувам со него. Уште од првиот ден му кажав дека за мене тој е многу важен играч. Неговиот професионализам и однос кон работата се едноставно неверојатни. Му кажав дека навистина сакам да остане до крајот на сезоната. Тој го знае ова и знае колку многу го ценам, колку го почитувам. Мислам дека разбирате дека не сакам јавно да зборувам за поединечни играчи. Од некои играчи знам дека сакаат да си заминат. Разговаравме за Еди, тој разбира дека нема да го пуштам“, изјави Рангник.

Тренерот на Челзи, Томас Тухел, после ремито од 2:2 во дербито на 21.коло од Премиер лигата, даде одговори во врска со статусот на Ромелу Лукаку во екипата.

Белгискиот напаѓач не беше во конкуренција за настап на дуелот против Ливерпул, заради контроверзното интервју кое пред неколку денови го даде за италијански медиум, меѓутоа тренерот Тухел потврди дека ќе има состанок со Лукаку.

„Дали има враќање за Лукаку во Челзи? Тој е наш и играч, секогаш постои пат назад. Тоа ќе го расчистиме зад затворени врати. Штом донесеме решение и Ромелу го слушне тоа, тогаш и вие ќе дознаете, а не порано. Сега не е време да разговараме за тоа. Стрпете се уште малку и ќе имате информации“, изјави Тухел пред новинарите.

29-годишниот Лукаку во изјава за Скај Спорт Италија изрази незадоволство од тактиката на Тухел и од својата улога во тимот на Челзи. Притоа изјави дека му недостасува Интер и би сакал да повторно да се врати во Италија.

Руски Зенит покажува сериозен интерес за дефанзивецот на Лацио, Луис Фелипе, чиј актуелен договор е до летото 2022 година.

Според „Кориере дело Спорт“, преговорите меѓу Фелипе и Лацио за нов договор се тешки. Доколку страните никогаш не се договорат, Римјаните би можеле да го продадат 24-годишниот фудбалер на крајот од зимскиот преоден рок.

Ситуацијата конечно ќе се расчисти до 10 јануари.

Сериозен интерес за Бразилецот покажуваат Зенит и Валенсија. Двата клуба се подготвени да му плаќаат по 2,5 милиони евра годишно како плата.

Екипите на Интер и Јувентус се за одложување на натпреварот за Суперкупот на Италија. Двата клуба веќе испратиле заедничко барање до раководството на Серија А, објави „Ла газета дело спорт“.  

 Причина за барањето на италијанските фудбалски великани е усложнувањето на состојбата со коронавирусот во земјата. Одговорот на официјалните лица вели дека лигата и федерацијата ја држат ситуацијата под контрола, но засега не гледаат потреба од промена на натпреварувачкиот календар. 

Натпреварот Интер – Јувентус е закажан за 12 јануари на стадионот „Џузепе Меаца“ во Милано.

Најдобриот стрелец на Баерн Минхен, Роберт Левандовски, уште еднаш навести дека не ја исклучува можноста да го промени клубот.

Полскиот репрезентативец за време на доделувањето на Глоуб Сокер наградите во Дубаи изјави дека е секогаш подготвен за нови предизвици во животот. 

„Тоа не мора да значи дека сакам да го променам актуелниот клуб за кој настапувам, но никогаш сосема не би ја исклучил и таквата можност“.

33-годишниот Левандовски, долго време се поврзува со евентуален трансфер во шпанскиот гигант Реал Мадрид. Тој пред извесно време имаше и некој вид на преговори со клубот од Мадрид, меѓутоа Баерн Минхен го убеди да остане нудејќи му договор со подобри финансиски услови со важност до јуни 2023 година.

Ѕвездата на Вулверхемптон, Адама Траоре повторно се споменува како можно засилување на Тотенхем оваа зима.

Шпанскиот репрезентативец се поврзуваше со премин во клубот од Лондон и во текот на летото кога тренер на екипата беше Нуњо Еспирито Санто.

По се изгледа заинтересираност за доведување на крилниот напаѓач покажува и новиот тренер на Тотенхем, Антонио Конте кој во Траоре гледа одлично засилување за тимот кој би помогнал во борбата за пласман за учество во Лигата на шампионите.

На Адама Траоре му остануваат уште 18 месеци од неговиот актуелен договор со популарните „Волци“ кои доколку сакаат да заработат на играчот, големи се шансите да ја прифатат евентуалната понуда која би пристигнала од Тотенхем.

Играчот на Челзи, Конор Галагер, е трансфер цел на францускиот гигант Парис Сен Жермен.

21-годишниот Галагер привлече голема заинтересираност со своите одлични фудбалски партии кои ги прикажува во дресот на Кристал Палас, каде игра како позајмен играч од Челзи.

Според пишувањата на англискиот весник „Сан“, тренерот на парижаните Маурисио Почетино бил голем фан на младиот англиски фудбалер кој настапува на средината од теренот. 

Галагер на 17 натпревари во Премиер лигата, досега има постигнато 6 гола и 3 асистенции. Информациите од Челзи се дека ќе причекаат да видат како ќе се одвива формата на играчот во останатиот дел од сезоната па ќе одлучат дали ќе го вратат во Лондон или ќе се одлучат за негова евентуална продажба доколку пристигне богата понуда.

Според проценките, од ПСЖ се подготвени да понудат околу 30 милиони фунти за услугите на супер талентот од „Стенфорд Бриџ“.

Враќањето на Бундеслигата по божиќните и новогодишните празници може да пропадне. Речиси сите екипи имаат голем број заразени, а шампионот Баерн, кој во петок ја отвора фудбалската година со домашен натпревар против Борусија Менхенгладбах, објави четворица позитивни на коронавирусот. „Следните неколку дена ќе ги поминам во карантин бидејќи сум позитивен на коронавирус“, напиша Нојер на Фејсбук. „Се чувствувам добро и имам само благи симптоми. Ви благодарам на сите за вашите желби. Бидете здрави и внимавајте“.

Поради кризата, Баерн го откажа почетокот на тренинзите за понеделник. Сите играчи прво ќе бидат тестирани. Во Борусија (М) досега исто така има четворица позитивни играчи.

Со оглед на многуте случаи на коронавирус во тимовите, челниците на фудбалската федерација допрва треба да одлучат дали натпреварите ќе бидат одложени и дали може да биде прескокната цела прва рунда.

Гигантите како Реал Мадрид, Јувентус и Барселона и натаму се решени да го оживеат проектот наречен Суперлига на Европа.

Според „Фајненшл Тајмс“, сите три клуба остануваат посветени на идејата, разговарајќи за можно рестартирање на турнирот во 2022 година.

На 19 април 2021 година, 12 европски клубови најавија создавање на Супер лигата, но два дена подоцна, 9 екипи објавија повлекување од натпреварувањето. Гигантите најавиле неколку заеднички средби уште на стартот на оваа година за да разговараат за нови идеи околу рестартирањето на натпреварувањето.

Арменд Алими, поранешниот македонски репрезентативец и долгогодишен член на Шкендија, е првото засилување за Работнички во зимскиот преоден рок. Искусниот фудбалер за врска потпиша едногодишен договор со нашиот клуб и ќе биде големо засилување за тимот на Борче Христов во вториот дел од сезоната.

На Работнички тој треба да му донесе победнички менталитет, шампионски дух и потребното искуство, толку драгоцено за младиот состав на „романтичарите“.

„Чест ми е да го носам дресот на Работнички. Тоа е еден од најреномираните фудбалски клубови во Македонија и навистина не размислував премногу кога ја добив оваа понуда. Се надевам дека ќе ја оправдам довербата на раководството  и дека заедно ќе успееме да ги оствариме целите на клубот. Ќе се потрудам максимално да им го пренесам моето искуство на помладите фудбалери на Работнички и верувам дека напролет ќе бележиме успеси. Сакам на сите фанови на клубот и на сите останати во државата да им ги честитам празниците и да им посакам многу здравје, среќа и успеси во 2022 година“, изјави Арменд Алими.