Шпанскиот прволигаш Депортиво Алавес му врачи отказ на тренерот Хавиер Каљеха. Како што потврдија од клубот, мадридскиот стратег си заминува од Алавес откако не успеа да го извлече тимот од црвената зона на табелата во првиот дел од сезоната.

Хавиер Каљеха пристигна на клупата на Алавес на 5 април 2021 година и ја постигна целта да остане во елитата, но годинава неговиот тим не успеа да се извлече од дното и моментално е на 18-то место во Ла Лига, во зоната за испаѓање. На последните пет натпревари Алавес не освои ниту еден бод.

Дејвид Бекам кој е претседател на фудбалскиот клуб Интер од Мајами, пројавува интерес за доведување на Луис Суарез од Атлетико Мадрид.

Бекам и челниците во клубот не се задоволни од тоа како се развива тимот и од фактот што не успеа да се пласира во плејофот на МЛС лигата. Екипата веќе доведе звучни имиња како што се Игуаин и Матуиди но двајцата не ги оправдаа големите очекувања и можно е нивно заминување од Мајами.

Дејвид Бекам планира да го доведе 34-годишниот Суарез кој ја игра последната година од договорот со Атлетико Мадрид, нудејќи му 2 годишен договор кој финансиски би бил исплатлив за искусниот Уругваец.

Според податоците на порталот Трансфермаркт, Челзи е фудбалскиот клуб кој потрошил најмногу пари за трансфери во 21.век.

Лондонскиот клуб, кој од 2003 година е во сопственост на рускиот олигарх Роман Абрамович, од сезоната 2000/2001, на трансфери на играчи потрошил вкупно 2,4 милијарди евра.

На второ место е уште еден клуб од Англија-Манчестер Сити, со 2,3 милијарди евра, а третото и четвртото место го делат шпанските гиганти Реал Мадрид и Барселона, кои за овој период потрошиле 2.2 милијарди евра. 

На петтото место е италијанскиот Јувентус со 2,1 милијарди евра, а по него следува Манчестер Јунајтед со 2 милијарди евра.

Седми е италијанскиот Интер со 1,7 милијарди евра, колку што потрошил и Париз Сен Жермен кој е осми. На деветтото место е Ливерпул со 1,6 милијарди евра, а десетти е италијанскиот Милан со потрошени 1,5 милијарди евра.

Од сезоната 2000/2001 до денес, Челзи пет пати беше шампион на Англија, 5 пати го освои ФА Купот, 3 пати го освои Лига Купот и Суперкупот на земјата, по два пати Лигата на шампиони и Лига Европа, а во 2021 година беше освојувач на Суперкупот на УЕФА.

Легендарниот бразилски фудбалер Марсело Виеира направи одличен деловен потег.

Имено, левиот бек на Реал Мадрид одлучи да го купи португалскиот второлигаш, екипата на Мафре. Мафре е екипа од истоимениот град во близина на Лисабон и е стабилен второлигаш.

Ќе потсетиме, Марсело веќе има еден клуб во своја сопственост, во прашање е бразилскиот нисколигаш Азуриз кој е основан во 2018 година и со фокусот е на младинските погони. Португалските медиуми пренесуваат дека во наредниот период се очекува соработка помеѓу двата клуба.

Од фудбалскиот клуб Челзи информираат дека дефанзивецот Бен Чилвел поради повреда најверојатно ја завршува оваа фудбалска сезона.

Тој заработи повреда на вкрстените лигаменти на коленото во натпреварот од Лигата на шампионите помеѓу Челзи и Јувентус. 

Од лекарскиот тим на клубот од Лондон претходно се одлучиле за рехабилитација на повредата без хирушки зафат, но сега е потврдено дека над Чилвел ќе мора да се изврши операција.

Поради тоа 25-годишниот Англичанец ќе мора да оди на долга пауза и се претпоставува дека оваа сезона е завршена за него.

Сезонава Чилвел одигра 6 натпревари за Челзи, постигна три гола и забележа една асистенција во Премиер лигата.

Според информациите од италијанските медиуми, гигантот Милан ќе му понуди нов договор на дефанзивецот Тео Ернандез кој би го загарантирал неговото останување на „Сан Сиро“.

Со новиот договор, 24-годишниот Французин би останал во Милан до 2026 година и би заработувал годишна плата од 4,5 милиони евра.

Актуелниот договор на играчот со „црвено-црните“ истекува во 2024 и со него тој има годишна плата од 1,5 милиони евра.

За Тео Ернандез интерес покажува и екипата на Париз Сен Жермен.

Бразилскиот фудбалски интернационалец во редовите на Јувентус, Артур Мело, најверојатно ќе биде испратен на позајмица, најавуваат денеска медиумите во Италија.

Тој не влегува во плановите на тренерот, Масимилијамо Алегри и затоа првите луѓе на клубот се обидуваат да го испратат во друг состав.

Наводно, Јуве сака да го испрати Мело во Арсенал и затоа започнал преговори со англискиот состав.

Mакедонскиот дефанзивец, Никола Серафимов доби место во идеалниот тим во Унгарија на полусезоната.

Трансферот во редовите на Залагересег за Серафимов се покажа како одличен потег. Неговиот тим е петти на табелата, а Серафимов има учинок од 16 натпревари и четири постигнати гола.

Екипата на Севиља, е принудена што побргу да купи напаѓач, бидејќи Мунир и Ен-Несири ќе патуваат на Купот на афрички нации, па тимот на тренерот Лопетеги ќе остане само со Рафа Мир како единствен голгетер.

Според информациите од Скај спорт, спортскиот директор на Севиља, Мончи, ќе проба веднаш по  Нова година да го доведе Антони Марсијал од Манчестер Јунајтед. 

25-годишниот Французин, падна во втор план во екипата од „Олд Трафорд“ и постои шанса тој да ја промени средината.

Директорот Мончи верува дека доаѓањето на Марсијал ќе направи разлика во тимот бидејќи иако е млад тој има огромно искуство и гарантира постигнување на голем број голови.

Турскиот гигант Фенербахче, ќе им помогне на Барселона да се ослободи од дефанзивецот Самуел Умтити. Екипата од Истанбул е во потрага по нов тренер но сака и нови засилувања кои ќе му помогнат на тимот да прикажува подобри игри и оствари повисок пласман на табелата.

Челниците на Фенербахче се одлучија за трансфер на Французинот Умтити, кој веќе подолго време не е првотимец на „Камп Ноу“ и по се изгледа дека не е во идните планови на тренерот Чави. Од Барселона би биле задоволни доколку се во можност да се ослободат од играчот за кој издвојуваат прилично висока плата.

Фенербахче на Умтити ќе му понуди ангажман до крајот на сезоната со што играчот би се обидел да направи рестарт на формата и кариерата.