Јирген Клоп изрази незадоволство од збиената програма на Премиер лигата и го повика раководството на шампионатот да интервенира.

„Црвените“ на 26 декември ќе му гостува на Лидс во натпревар од 19. коло а два дена потоа ќе одат кај Лестер на меч од 20. коло. Клоп вели дека е дојдено време да се преземат соодветни мерки.

„Верувам дека треба да бидеме внимателни со планирањето на средбите. Немаме време за опоравување и подготовка за играчите, тоа е клучно. Мислам дека не е правилно да се инсистира тимовите да играат на секои два дена во тековнава ситуација со ковид-19“,  нагласи Клоп.

Непосредно после дознавањето на полуфиналистите, одржана е ждрепката на која се извлечени ривалите кои ќе се борат за пласман во финалето на англискиот Лига куп.

Ждрепката одлучи во полуфиналето да се сретнат Арсенал со Ливерпул и Челзи против Тотенхем.

Првите натпревари ќе се играат на трети јануари, додека реваншите седум дена подоцна.

Арсенал до полуфиналето стигна со победа над Сандерленд со 5:1, Ливерпул беше подобар од Лестер после изведување на пенали 5:4, регуларниот дел заврши 3:3, Екипата на Челзи го совлада Брентфорд со 2:0, додека Тотенхем победи на Вест Хем со 2:1.

Играчот од средниот ред на Бешикташ, Миралем Пјаниќ се чини дека ќе остане во турскиот тим до завршетокот на сезоната.

Репрезентативецот на Босна и Херцеговина за Бешикташ настапува како позајмен играч на Барселона, и затоа се појавија информации дека е можно негово враќање на „Камп Н оу“ во јануари. Меѓутоа играчот е задоволен од условите во Бешикташ и планира таму да ја одигра целата сезона.

„Пред да дојдам овде слушнав многу за турските навивачи. Сум играл на многу големи стадиони и пред голем број на публика, но да се игра за Бешикташ е посебно. Јас сум тука за да успеам и се надевам дека ќе можеме да ја возвратиме љубовта на навивачите“, изјави Пјаниќ.

Оваа сезона Пјаниќ настапи на 10 натпревари за Бешикташ во турскиот шампионат.

Англиските медиуми пренесуваат дека Ливерпул будно ја следи ситуацијата со статусот на Филипе Кутињо во Барселона и дека веќе оствариле првични разговори околу негово враќање на „Енфилд“.

29-годишниот Бразилец, претходно мина скоро пет сезони во дресот на Ливерпул пред да замине во Барселона за рекорден трансфер од 142 милиони фунти. По неговото пристигнување во каталонскиот гигант, тој со своите игри не успеа да се наметне како вистински избор за првиот тим и не доби шанса за поправка на впечатокот.

Од Барселона имаа сериозни намери да се ослободат од Кутињо со што ќе ги намалат трошоците кои ги издвојуваат за неговата висока плата.

Освен од Ливерпул, интерес за играчот покажуваат и екипите на Њукасл и Тотенхем.

Њукасл не успеа да го убеди француски Лион да му го продаде 24-годишниот бразилски офанзивен играч за врска, Лукас Пакета. Според извори од клубот, Њукасл понудил 40 милиони евра за играчот, а самиот играч добил договор со плата од 10 милиони евра годишно, за разлика од неговата сегашната плата од 5 милиони евра. Сепак, оваа понуда не го заинтересирала Бразилецот.

Во исто време, Лион не ја крие желбата да добие повисока понуда и затоа ќе почека до летниот трансфер период која Пакета веројатно повторно ќе биде на мета на големите европски тимови.

Според турските медиуми специјализирани за спортски вести, македонскиот репрезентативец Елиф Елмас е трансфер мета на Лидс Јунајтед и Борусија Дортмунд.

Овие два клуба во наредниот период подготвуваат високи финансиски понуди со кои ќе пробаат да го убедат сопственикот на Наполи, Аурелио Де Лаурентис, да го продаде Елмас.

Нашиот „Дијамант“ оваа сезона прикажува одлични партии во клубот од Серија А, со кој има договор до 2025 година. Малку е веројатно дека тренерот Спалети ќе се согласи така лесно да се ослободи од Елмас за кого во повеќе пригоди има изјавено дека многу го цени бидејќи е прав војник на теренот.

Според некои истражувања, моменталната цена на Елиф Елмас на фудбалскиот пазар изнесува околу 70 мииони евра.

Не е тајна дека феноменалниот Ерлинг Халанд е желба на повеќе европски клубови. Реал Мадрид веќе подолго време кокетира со младиот напаѓач, а планот на Флорентино Перез е да создаде пеколен тандем Халанд – Мбапе.

Но, нешто се прашува и Борусија Дортмунд. Во Боурсија немаат намера лесно да се откажат од својата прва ѕвезда која на лето ќе може да замине за 75 милиони евра. „Милионерите“ сакаат да го задржат и ќе му понудат договор кој тешко може да го одбие.

„Билд“ пишува дека Борусија е спремна двојно да му ја зголеми платата на Халанд. Халанд во овој момент заработува осум милиони евра годишно и доколку ја прифати оваа понуда би станал најплатен фудбалер во историјата на клубот. Во овој момент тоа е Марко Ројс кој заработува околу 12 милиони евра.

Хан Јоаким-Вацке не крие дека Борусија сака да го задржи Халанд, но знае дека тоа ќе биде тешко.

„Веруваме дека за Халанд уште една година во Борусија би била одлична за неговиот развој. Сепак, ако се реши да продолжи некаде на друго место ќе имаме разбирање“, изјави Вацке.

Тренерот на Тотенхем, Антонио Конте, го сподели своето мислење за доделувањето службен пораз на тимот во натпреварот против Рен (0-3) во 6. коло од групната фаза на Конференциската лига.

„Оваа одлука е неправедна. Целиот свет знае дека се соочуваме со толку голем проблем како што е Ковид. Не игравме по наша вина, туку затоа што имавме многу играчи со позитивни тестови, а владата реши да ги прекине нашите тренинзи и да го затвори тренинг центарот. Да бидам искрен, одлуката што ја донесе УЕФА е неверојатна за мене, клубот и нашите навивачи. Ова е дефинитивно неправедно. Ќе се бориме против оваа одлука. Сакаме да се бориме за учество на турнир на фудбалски терен, а не на суд“, истакна Конте за британските медиуми.

Претходно УЕФА пресуди дека натпреварот Рен – Тотенхем не се одиграл по вина на Британците и тие добија службен пораз од 0-3.

Така Рен со 14 бода стана победник во групата Г и се пласираше во плеј-офот од Конференциската лига. Тотенхем со седум бода заврши на третото место во групата и не се пласираше во следната фаза.

Сергеј Милинковиќ-Савиќ е во конфликт со тренерот Маурицио Сари, па Лацио е спремен да го продаде уште во зимскиот преоден рок.

Наводно, Милинковиќ-Савиќ е во тивка војна со Сари, а тренерот на „орлите“ сметал дека ароганцијата на Србинот не може да ја толерира и побарал од раководсвото да биде продаден.

Лацио веќе ја одредил цената и за неговата слобода бара 75 милиони евра, а три европски гиганти покажуваат силен интерес за него.

Главни кандидати за неговиот потпис се Јувентус, Реал Мадрид и Манчестер Јунајтед, кои подолго време се заинтересирани за Србинот.

Екипата на Наполи, ќе се обиде оваа зима да се засили со играч на левата бековска позиција. Тренерот Лучиано Спалети верува дека еден од можните кандидати кои би можел одлично да одговори на неговите тактички замисли е Лукас Дињ од Евертон.

Францускиот репрезентативец веќе неколку сезони е стандарден првотимец во тимот на Евертон, но во последно време тренерот Рафа Бенитез не му дава доволно шанси за настап, па затоа не е исклучена можноста тој веќе во јануари да ги напушти популарните „Карамели“ и да се пресели во Серија А.

Оваа сезона се очекува екипата на Наполи да води неизвесна борба за шампионската титула во италијанското првенство, каде во моментот се наоѓа на втората позиција.