Мохамед Салах, втора година по ред успева ја добие наградата за најдобар фудбалер во Англија во изборот на навивачите.

Во гласањето кое беше организирано преку социјалните мрежи, учествуваа околу 140.000 фанови на фудбалот. Репрезентативецот на „фараоните“ практично немаше вистинска конкуренција според бројот на освоени гласови.

Зад него во Топ 10 во изборот на навивачите место добија и Деклан Рајс, Бруно Фернандеш, Фил Фоден, Едуар Менди, Мејсон Маунт, Рубен Диаш, Кевин де Бруин, Жоржињо и Жоао Кансело.

Раководството на Арсенал синоќа поднесе пријава поради навреди врз расна основа упатени кон фудбалер на лондонскиот премиерлигаш за време на натпреварот на гостински терен против Лидс.

Инцидентот, според зборовите на тренерот на Арсенал, Микел Артета, се случил во 33. минута од натпреварот, а цел на навредите бил еден од резервните фудбалери на неговиот клуб.

„Пријавивме навреди на расна основа и менаџерот на стадионот ќе мора да се позанимава со тоа“, изјави Артета.

Тој додаде дека во прашање бил поединец, кој навредите ги упатил кон еден од фудбалерите на резервната клупа.

„Многу сум разочаран бидејќи толку многу работевме да не се случуваат вакви инциденти во фудбалот. Но, во прашање е поединец и мислам дека целиот стадион не треба да сноси санкции. И покрај тоа што станува збор за изолиран инцидент, случајот моравме да го пријавиме“, посочи тренерот на Арсенал.

Лондонскиот премиерлигаш триумфираше на гостувањето во Лидс со 4-1 и ја забележа 10. победа во 18. коло во Премиер лигата.

Италијанскиот гигант, Јувентус, искажал интерес за евентуално доведување на напаѓачот од Арсенал, Пјер-Емерик Обамејанг, во јануарскиот преоден рок.

Обамејанг во моментов е надвор од составот на лондонскиот тим поради недисциплина и не настапи на последните 3 натпревари за клубот. Него поради наведените причини му беше одземена и капитенската лента во тимот по што веќе се најавува негово заминување од Лондон.

Според „Тутоспорт“, екипата на Јувентус ќе испрати официјална понуда за трансфер на 32-годишниот голгетер со надеж дека Арсенал ќе ја прифати истата.

Освен Јувентус, сериозен интерес за Обамејанг има и од Барселона и Челзи.

Членовите на Барселона со гласање на референдум го усвоија предложениот финансиски план за иднината на клубот, кој вклучува инвестирање на 1,5 милијарди евра за реновирање на стадионот „Камп Ноу“, спортската сала „Палау Блауграна“ и целата област околу новиот спортски комплекс.

Планот доби одобрување од 48.623 членови на Барселона што претставува 87,8 проценти од пријавените гласови. 

Приоритет за Барселона е реновирањето на стадионот, кое треба да заврши до крајот на 2025 година. Работата ќе започне во 2022 година, а по завршувањето на градежните работи, капацитетот на стадионот ќе изнесува 105.000 гледачи, со што каталонците ќе го имаат најголемиот стадион во Европа.

Серхио Агуеро поради здравствените проблеми беше приморан да ја заврши играчката кариера.

Аргентинецот изминатото лето потпиша за Барселона и одигра само неколку натпревари за каталонскиот клуб. На натпреварот против Алавес кој се играше на 30 октомври Агуеро имаше проблеми со дишењето и беше пренесен во болница. После деталните прегледи докторите открија дека Агуеро има срцеви проблеми и најдобро за неговото здравје е да ја заврши со професионалното играње фудбал. Таа одлука Агуеро ја соопшти минатата недела на прес-конференција.

Сега се појави информација дека Агуеро добил понуда од Манчестер Сити. Клубот во кој Агуеро ги помина најдобрите денови од кариерата му понудил да биде клупски амбасадор. Шпекулациите во овој момент се дека Агуеро ќе ја прифати оваа понуда.

Агуеро во Манчестер Сити помина десет сезони и стана најдобар стрелец во историјата на клубот.

Италијанските медиуми пренесуваат дека е можна разделба на Лацио со српскиот играч од средината на теренот, Сергеј Милинковиќ-Савиќ.

Тренерот на екипата, Маурицио Сари, не бил задоволен од односот и залагањето на фудбалерот за време на натпреварите и изјавил дека Сергеј делува арогантно.

Претседателот на Лацио, Клаудио Лотито, во минатото веќе одби неколку понуди за Србинот, за кои некои клубови нудеа и до 140 милиони евра. Сега останува да се види дали клубот е спремен да го продаде Милинковиќ-Савиќ во јануари и колку би изнесувал евентуалниот трансфер.

Спортскиот директор на Париз Сен Жермен, Леонардо, застана во одбрана на Лионел Меси за кој се тврди дека после неговото доаѓање од Барселона во ПСЖ, тој има пад во формата и не прикажува исти партии како за каталонците.

“Квалитетот на Лионел Меси е неспорен за мене. Ако почнете да го критикувате Меси, тоа ќе биде само затоа што не разбирате ништо од фудбалот. Ако ги погледнете статистичките бројки за неговата игра, ќе видите дека првите 6 месеци на Меси во тимот се неверојатни. Тој и Килијан Мбапе се вклучени во речиси сите голови на екипата. Тој е играч за одлуки. Не потпишавме со Меси за да правиме шоу на секој натпревар. Секако дека сме поконкурентни со него. Тој може да го одлучи секој натпревар”, изјави Леонардо во интервју за француските медиуми. 

34-годишниот Аргентинец потпиша договор со ПСЖ изминатото лето откако не најде заеднички јазик со новиот претседателот на Барселона, Жоан Лапорта.

Барселона сака да го обнови договорот со својот 17-годишен играч од средниот ред Гави.

Според изворот, во блиска иднина каталонскиот клуб ќе му понуди на играчот нов петгодишен договор. Гави потекнува од школата на Барселона. Договорот на играчот од средниот ред со клубот е до јуни 2023 година. Според него, играчот добива плата еднаква на онаа што ја имал во резервниот тим на Каталонците. Според интернет порталот Трансфермаркт, пазарната вредност на играчот е 25 милиони евра.

Гави оваа сезона дебитираше за главниот тим на Барселона. Од сите натпрерварувања Гави учествуваше на 21 натпревар, постигна еден гол и три асистенции.

Филип Гачевски се врати во редовите на Вардар.

Вчера Гачевски потпиша тригодишен договор и изрази големо задоволство за враќањето во Вардар.

“Огромна чест, задоволство и мотив ми претставува враќањето во Вардар. Цврсто верувам во овој нов проект на клубот и доаѓам со цел да помогнам што поскоро да се вратиме на местото кое ни припаѓа, во самиот врв на Македонскиот фудбал. Посебна благодарност до управата на клубот, до сопственикот Слободан Крстевски и спортскиот директор Александар Бајевски со кои лесно најдовме заеднички јазик, цели и амбиции. Со нетрпение го очекувам продолжетокот на првенството повторно да заиграм пред пред најдобрите навивачи Комити“, изјави Гачевски.

Емил Форсберг ќе биде надвор од терените околу два месеци поради повреда на бутот.

Шведскиот играч беше заменет за време на натпреварот на Лајпциг против Арминија Билефилд (0-2).

„Играчот се пожали на болка во колкот, дополнителните тестови покажаа оштетување на левиот бутен мускул во пределот на колкот. Сега Емил ќе пропушти најмалку 8 недели“, објавија на официјалниот сајт на клубот.

Сезонава Емил Форсберг одигра 25 натпревари за Лајпциг во сите натпреварувања, шест пати постигна гол и двапати асистираше на своите соиграчи. Швеѓанецот настапува за германскиот клуб од 2015 година кога се пресели од Малме. По 17 кола Лајпциг со 22 бода е на 10. место во Бундеслигата. На 8 јануари, избраниците на Доменико Тедеско ќе гостуваат на Мајнц.