Претседателот на УЕФА Александар Чеферин го објасни принципот на распределба на билетите за финалето на Лигата на шампионите, во кое се пласираа Ливерпул и Реал Мадрид.

Двата тима добиваат по само 19.618 влезници, со оглед на тоа што стадионот има капацитет од 75.000. Менаџерот на Ливерпул, Јирген Клоп изрази збунетост поради овој факт, а Чеферин го објаснил принципот и договорните односи со спонзорите не дозволуваат УЕФА да ја промени распределбата. „Пред неколку дена му го објаснив истото на еден од тренерите на тимовите кои стигнаа до финалето. Сега ќе го повторам тоа. Ми требаше подолго време бидејќи ги прегледав сите бројки. Од сите приходи од финалето, УЕФА добива 6,5%.додека 93,5% добиваат клубовите. Од сите други натпревари 100% одат за клубовите. Навивачите на двата тима добиваат по 20.000 билети. Ако спонзорите кои обезбедуваат повеќе од 100 милиони евра, од кои 93,5% одат за клубовите, добиваат билети, тоа е затоа што ние сме обврзани да го направиме тоа според договорите со нив. Ако влезниците се 10 евра нема да смени многу кај нас, но ќе смени многу за самите клубови. Навистина многу“, коментираше Чеферин.

Пријателскиот натпревар меѓу јужноамериканските фудбалски гиганти Бразил и Аргентина, закажан за во јуни во Австралија е откажан.

Натпреварот беше планиран како дел од подготовките на двете селекции за Светското првенство во Катар, но координаторот на Бразилската фудбалска конфедерација Жунињо Паулиста изјави дека нивните аргентински колеги одлучиле да го откажат мечот.

Аргентинската фудбалска федерација не даде коментар за ова прашање, но се претпоставува дека откажувањето на натпреварот најверојатно е диктирано од одлуката на ФИФА да се преигра квалификацискиот натпревар за Светското првенство меѓу Бразил и Аргентина. Натпреварот меѓу двете селекции во септември минатата година беше прекинат набргу откако здравствените служби влегоа на терен, бидејќи дел од играчите во Аргентина ги прекршиле протоколите за ковид-19.

Ракометниот клуб Вардар 1961, објави вест која ќе ги израдува фановите на клубот. Имено, според информациите, Русинот Тимур Дибиров останува во екипата најмалку до јуни 2023 година, со можност за продолжување на соработката.

Дибиров е еден од најискусните играчи во Вардар и ракометар со најдолг стаж во екипата. Тој е миленик на ракометната публика и вистински лидер на тимот.

„Среќен сум што останувам во Вардар. Не можзам да се замислам да играм за друг клуб и во друг дрес. Им благодарам на сите за поддршката. Се договоривме со клубот за продолжување на соработката и заедно да постигнуваме добри резултати како и досега“, изјави Дибиров.

Медиумите во Италија објавија дека 38-годишниот Горан Пандев е во дилема дали да продолжи со играњето фудбал за уште една сезона.

Македонскиот интернационалец од јануари е член на Парма и се натпреварува во Серија Б. За клубот постигна еден гол и една асистенција на 11 натпревари. Поради повреда Пандев не го одигра последниот натпревар од сезоната која Парма го одигра на 6.мај.

Според информациите постојат изгледни шанси Пандев да одигра уште една сезона, доколку до него пристигне конкретна понуда.

Менаџерот на Евертон, Френк Лампард, призна дека доколку успее да го спаси местото на тимот во Премиер лигата, тоа ќе биде негов најголем успех во досегашната тренерска кариера.

„Кога ја доживуваш битката за опстанок, тоа целосно те исцрпува, но сакаш да ја направиш вистинската работа бидејќи гледаш колку е тоа важно за клубот“, изјави Лампард.

„Предизвикот да се спаси Евертон е поголем отколку кога станав шампион во Премиер лигата бидејќи сфаќам колку е важно за клубот. Освен тоа, финансискиот аспект е многу поважен отколку што можете да замислите“, искрен е Лампард.

Викторија Плзен стана чешки шампион по шестипат во својата историја. По победата од 2-0 како гостин кај Храдец Кралове во натпреварот од 4. коло ово доигрувањето, Викторија успеа да ја обезбеди шампионската круна.

Тимот веќе има 82 бода, а главниот конкурент Славија Прага има 78, откако на гостувањето кај Бањик Острава дозволи изненадувачко реми 1-1. Плзен е недостижен на врвот, бидејќи до крајот останува само едно коло.

Американскиот магазин „Форбс“ објави податок според кој, ѕвездата на ПСЖ и аргентинската фудбалска репрезентација, Лионел Меси е најплатен светски спортист во 2022 година, со заработка од 130 милиони американски долари.

Иако на фудбалски план, неговата сезона во ПСЖ не е баш на завидно ниво, сепак Меси од финансиска гледна точка оставрува огромни заработки.

На второто место од листата се најде Леброн Џејмс од ЛА Лејкерс со 121 милион долари, додека третата позиција му припаѓа на Кристијано Роналдо кој успеа да инкасира 115 милиони долари.

Холандскиот шампион Ајакс официјално објави дека тренерот на Бриж, Алфред Шредер ќе го замени Ерик тен Хаг на позицијата главен тренер на екипата. 

49-годишниот тренер на белгискиот тим ќе се приклучи на екипата по завршувањето на оваа сезона, а неговиот договор ќе биде на две години.

Тен Хаг веќе и официјално е назначен како нов тренер на Манчестер Јунајтед, а ќе ја преземе функцијата по завршувањето на актуелната кампања.

Шредер има работено во Ајакс и претходно, како асистент во Тен Хаг во 2018 и 2019 година.

Французинот, Клемен Турпин, ќе го суди финалето во Лигата на фудбалските шампиони меѓу Ливерпул и Реал Мадрид закажано на 28 мај на стадионот во Париз.  Тој беше во улога на четврти судија во пресметката на двата клуба во финалето пред четири години во Киев кога Шпанците победија со 3-1.

Турпин досега се покажа како „таличен “ за Реал Мадрид бидејќи се појави на дуелите со Челзи победа 3-1, потоа со Лудогорец (4-0), Рома (2:0) и Интер (3-2). Французинот им судел и на „црвените“ и тоа против Спартак (Москва) (1-1) и против РБ (Лајпциг) (2-0).

Романецот, Иштван Ковач, ќе биде судија на дуелот Рома – Феенорд во Лигата на конференциите (25 мај) а Славко Винчич од Словенија на финалето во Лига Европа меѓу Ајнтрахт – Ренџерс на 18 мај.

Фудбалерите на Интер се освојувачи на 75. издание на „Копа Италија“. Играчите предводени од тренерот Инзаги, на Олимпискиот стадион во Рим го победија Јувенус со резултат 4:2 после одигрување на продолженија. Во регуларниот дел од средбата, резултатот беше 2:2.

Јунак во тимот од Милано беше Хрватот Иван Перишиќ, кој во продолженијата ги постигна двата гола за екипата. Јувентус имаше водство на натпреварот од 2:1 до 80. минута. 

Ова е прв трофеј во Купот за Интер уште од 2011 година, а вкупно осми во клупската историја. Повеќе трофеи имаат само Јувентус, 14, и Рома со 9.