Јирген Клоп е свесен дека иако Премиер лигата се уште не е стигната
ни до половина, неговиот тим нема шанси за титулата оваа година.
„Црвените“ имаа лош старт на сезоната и играа „топло-ладно“ па во
моментов се далеку од врвот на табелата и годинава им преостанува
борба за пласман во Лигата на шампионите.
Тоа го знае и самиот Клоп кој истакна дека Арсенал и Сити ќе се
борат за титулата во Премиер лигата, а дека дури пет клубови ќе се
борат за останатите две места кои ќе водат во Лигата на шампионите.
„Оваа сезона ќе имаме топ 7 тимови затоа што знаеме дека Њукасл е
голем конкурент од оваа сезона. Само четири ќе успеат да стигнат до
целта, а се чини дека во овој момент само две места се останати.
Арсенал има неверојатна сезона, Сити е Сити, а Манчестер Јунајтед е
јасно дека се враќа. Тотенхем секогаш се бори до крај, а Челзи е се
уште тука.
Ќе биде тешко, треба да играме специјално во вториот дел од сезоната
за да имаме шанса да се пласираме во Лигата на шампионите, што е и
наша цел“, изјави Јирген Клоп.

Трансферот на Бразилецот Антони од Ајакс во Манчестер Јунајтед кој изнесуваше вкупно 95 милиони евра е најскапиот во 2022 година. 22-годишниот фудбалер потпиша петгодишен договор со тимот од Олд Трафорд.

За одбележување е фактот дека седум од топ 10 трансферите се на англиски клубови, а листата според сајтот Трансфермаркт е следната:

1. Антони – трансфер од Ајакс во Манчестер Јунајтед – 95 милиони евра
2. Душан Влаховиќ – трансфер од Фиорентина во Јувентус – 81,6 милиони евра
3. Весли Фофана – трансфер од Лестер во Челзи – 80,4 милиони евра
4. Орелиен Чуамени – трансфер од Монако во Реал Мадрид – 80 милиони евра
5. Дарвин Нуњес – трансфер од Бенфика во Ливерпул – 80 милиони евра
6. Каземиро – трансфер од Реал Мадрид во Манчестер Јунајтед – 70,65 милиони евра
7. Александар Исак – трансфер од Реал Сосиедад во Њукасл – 70 милиони евра
8. Матијс де Лихт – трансфер од Јувентус во Барн Минхен – 67 милиони евра
9. Марк Кукурела – трансфер од Брајтон во Челзи – 65,3 милиони евра
10. Ерлинг Халанд – трансфер од Борусија Дортмунд во Манчестер Сити – 60 милиони евра

Аргентинскиот фудбалер Лионел Меси и неговата шпанска колешка Алекси Путељас се прогласени за најдобри спортисти во 2022 година, а фудбалската репрезентација на Аргентина за најдобра екипа во изборот на Меѓународното здружение на спортски новинари (AIPS).

Во машка конкуренција славеше аргентинскиот капитен и член на ПСЖ, Меси, со 962 гласови, пред светскиот рекордер во скок со стап, Швеѓанецот Арманд Дуплантис (373) и францускиот фудбалер Килијан Мбапе (366).

Шпанската фудбалска ѕвезда Путељас ја освои наградата во женска конкуренција со 452 гласови, пред американската пливачка Кејти Ледецки (295) и светската рекордерка во трискок Јулимар Рохас (243) од Венецуела.

Во изборот за екипа на годината триумфираа новите светски фудбалски шампиони, Аргентинците, со 1.399 гласови, пред фудбалската репрезентација на Мароко (381) и фудбалската репрезентација на Франција (252).

Во гласањето учествуваа 420 спортски новинари од 113 држави.

Легендата на Манчестер Јунајтед, Гери Невил, се осврна на заминувањето на Кристијано Роанлдо во шампионатот на Саудиска Арабија.

Португалецот сега ќе го носи дресот на Ал Насер. Неговиот договор ќе биде наредните две години.

„Имав чувство дека тој би сакал да остане во Европа но, големите клубови не дадоа понуда. Неговиот крај требаше да биде на „Олд Трафорд“ . Изгледа дека Роналдо ќе ја заврши кариерата во Саудиска Арабија“, нагласи Невил.

Луис Суарез и официјално го реши прашањето околу тоа за кој клуб ќе настапува во 2023 година.

Суарез во изминативе месеци беше дел од неговиот матичен тим Насионал, но од претходно беше познато дека ова ќе биде кратка приказна. Голгетерот се повржуваше со враќање во Европа, имаше понуди на маса од МЛС лигата и од Саудиска Арабија, меѓутоа реши да остане во Јужна Америка со тоа што новата средина е во Бразил.

Некогашниот ас на Барселона, Атлетико Мадрид, Ливерпул и Ајакс договори двегодишна соработка со Гремио. Ова за ветеранот ќе биде нов предизвик каде се надева дека со своите партии ќе може да донесе радост за многубројните фанови на тимот од Порто Алегре.

Менаџерот на Манчестер Сити, Пеп Гвардиола, откри кога ќе го напушти клубот.

Шпанецот неодамна потпиша нов договор до 2025 година, а до тогаш ќе исполни точно девет години на „Етихад“.

„Во моментот кога ќе почувствувам дека нешто е скршено, ќе си заминам или нема да потпишам повторно. Постојано велам дека нема да останам како Алекс Фергусон или Арсен Венгер. Договорот е само на хартија. Повторно потпишав бидејќи јас чувствувам дека се уште можеме да играме добар фудбал. Но, на крајот резултатите се важни. Ако се заситиме едни од други, нема да го исполнам мојот договор”, изјави Гвардиола.

Реал Мадрид вчера славеше на гостувањето кај Ваљадолид со двата гола на Карим Бензема, но медиумите се едногласни дека играч на мечот беше младиот, Едуардо Камавинга.

Тој со влегувањето во 69-та минута го подигна темпото на „кралевите“ и кумуваше на пресвртот. За тоа доби пофалби и од Карло Анчелоти.

„Камавинга прави поголема разлика кога ќе влезе од клупата. Тој е многу млад и треба да учи за поставеноста на теренот“, изјави Анчелоти.

Манчестер Сити нема да жали пари на „Етихад“ да ја донесе ѕвездата на Милан и португалски репрезентативец, Рафаел Леао.

Најголема желба на Гвардиола е најдобриот играч од Серија А и ѕвезда на Милан, Рафаел Леао, па „граѓаните“ веќе спремиле понуда. Англиските медиуми пренесуваат дека Сити испратил понуда од 120 милиони евра за неговиот потпис, а на Португалецот му нуди плата од 12 милиони евра по сезона.

Доколку Леао не стави потпис на нов договор, тогаш Милан е спремен да ја прифати понудата. „Росонерите“ му нудат нов договор и плата од 7 милиони евра по сезона.

Англиските медиуми пренесуваат дека лидерот во Премиер лигата, Арсенал, е подготвен да испрати нова, повисока понуда за звездата на Шахтјор, Михаило Мудрик.

Првата понуда која популарните топџии ја испратија за младиот украински фудбалер изнесуваше 45 милиони фунти, но истата беше веднаш одбиена од челниците на Шахтјор.

21-годишниот Мудрик има голема желба да заигра во Арсенал, но украинскиот клуб за негова продажба бара 80 милиони фунти.

Тајсон Фјури за многумина е најдобриот боксер на денешницата, а во минатото имал бурен живот со кој не се гордее премногу. Фјури во овој момент е во брак со Париз од 2008 година и има шест деца, меѓутоа во интервјуто откри дека во животот спиел со над 500 жени, но за него тоа е нешто за кое се кае.

„Јас сум лажго и измамник. Во животот направив многу глупави работи. Сакам да ја избришам таа епизода од мојот живот. Спиев со 500 жени можеби и повеќе…Не знам одамна престанав да бројам. Не сум религиозен, но престанав да бројам, не ги правам тие лоши работи повеќе“, изјави Фјури.

Пред неколку недели Британецот го нокаутираше Чисора и така ја одбрани титулата светски шампион во тешка категорија.