Реал Мадрид е силно заинтересиран за играчот на Њукасл и бразилски репрезентативец, Бруно Гимараеш.

25-годишниот играч за врска игра фантастично и го привлече вниманието  на многу европски гиганти. После заминувањето на Каземиро, Анчелоти верува дека неговиот сонародник ќе биде идеална замена и сака да го донесе на „Сантиаго Бернабеу“.

Реал е во потрага по квалитетен играч за врска, а со оглед на фактот дека Белингам е премногу скап, „кралевите“ сега ќе се насочат кон Бруно Гимараеш.

Јувентус покажува дека е заинтересиран за 20-годишниот дански фудбалер Расмус Хојлунд кој во сезонава постигна 13 гола во дресот на Аталанта.

Станува збор за одличен напаѓач за кого се заинтересирани и луѓето од Милан и Рома.

„Старата дама“  го гледа младиот играч како евентуална замена за Душан Влаховиќ, кој веројатно во текот на летото ќе замине во друг состав.

Фудбалерот на Наполи, Квиша Кварацхелија, кој има блескава сезона, влегува во радарот на англиските состави Манчестер Сити и Њукасл, објави новинарот на „CBS Sports“ – Бен Џејкобс, во неговата последна колумна.

Интернационалецот од Грузија се уште не размислува да ја промени средината иако дел од гигантите сакаат да дојдат до неговиот потпис. Се очeкува италијанскиот тим за слободата на Кварацхелија да бара повеќе од 100 милиони евра.

„Нема сомневање дека ќе има многу опции на лето. Но, Наполи е совршен клуб за Кварацелија во моментов“, напиша Џејкобс.

Англискиот Би-Би-Си пренесува дека голманот на Вест Хем Јунајтед, Лукаш Фабијански, се здоби со скршеница на јагодичната коска и можеби е потребна да оди на операција.

Полскиот репрезентативен голман повредата ја доби на саботниот дуел во Премиер лигата против екипата на Нотингем Форест. Тренерот на популарните „чекани“, Дејвид Мојес изјави дека не знае со сигурност колкав период Фабијански ќе биде надвор од теренот.

Голот на Вест Хем во наредниот период ќе го брани вториот голман во тимот, Алфонс Ареола. Во следното коло клубот од Лондон му гостува на Брајтон.

Тренерот на Манчестер Јунајтед, Ерик тен Хаг, сака да ги доведе на Олд Трафорд Виктор Осимен и Мохамед Кудус.

После пристигнувањето на 53-годишниот тренер на клупата на Јунајтед, екипата забележува одлични резултати и конечно после подолг период освои трофеј после победата во англискиот Лига Куп. Тимот останува да се натпреварува на три фронта, и челниците на клубот сакаат да му овозможат на тренерот дополнителни засилувања за наредната сезона.

Според информациите од англиските медиуми, Тен Хаг и клубот се заинтересирани за доведување на двајца африкански фудбалери, Виктор Осимен од Наполи и Мохамед Кудус од Ајакс.

Осимен игра во извонредна форма во дресот на Наполи каде сезонава има постигнато 24 гола, додека Кудус за Ајакс има постигнато 6 гола на 32 натпревари.

Столбот во одбраната на Челзи, Тијаго Силва, заработи повреда на лигаментите од коленото, поради што ќе биде надвор од фудбалскиот терен во наредните шест недели, објави клубот од „Стенфорд Бриџ“.

Бразилецот се повреди на натпреварот од Премиер лигата против Тотенхем, кога од игра излезе во 19.минута, а неговата екипа доживеа пораз од 2:0.

Доколку 38-годишниот Силва отсуствува шест недели, тогаш тој ќе го пропушти реваншот во осминафиналето од Лигата на шампионите против Борусија Дортмунд, како и можното четвртфинале.

Европските гиганти на лето ќе водат битка за младиот талент на Леверкузен, Флоријан Вирц.

19-годишниот Вирц важи за еден од најперспективните фудбалери во Германија и сите експерти му предвидуваат голема кариера.

Леверкузен нема лесно да го пушти својот „бисер“, особено поради фактот што Вирц има договор до 2027 година.

„Билд“ тврди дека Баерн Минхен е фаворит за неговиот потпис, но треба да ја победи конкуренцијата од Барселона, Милан и Манчестер Сити.

Вирц е офанзивен играч за врска, кој оваа сезона на 9 настапи постигна 2 гола и 4 асистенции.

Англискиот премиерлигаш Челзи предводен од тренерот Греам Потер, поминува низ резултатски доста тежок период, и голема е веројатноста англискиот стручњак да добие отказ од позицијата.

Последен пораз кој екипата од Стенфорд Бриџ го доживеа во Премиер лигата беше на дуелот со градскиот ривал Тотенхем.

Евентуален пораз на Челзи од Лидс во следното коло на Премиер лигата би можело да доведе до одлука за отказ на 47-годишниот Потер.

Како тренери кои се споменуваат за можни наследници на Потер се Жозе Мурињо кој е актуелен тренер на Рома и поранешен тренер на Челзи, потоа Маурицио Почетино, Луис Енрике, Зинедин Зидан, и тренерот на Атлетико Мадрид, Диего Симеоне.

Јулијан Алварез блесна на Светското првенство и беше еден од најзаслужните за освоената титула на Аргентина.

Аргентинецот пристигна минатото лето на „Етихад“ за 18 милиони евра, но не добива голема минутажа. Напаѓачот не може да се избори за место во стартниот тим покрај Халанд, па е спремен да ја промени средината.

Таквата ситуација е спремен да ја искористи Интер, кој сака да го доведе на „Џузепе Меаца“ на местото од Ромелу Лукаку.

„Калчомеркато“ пренесува дека „нероаѕурите“ се спремни да понудат 50 милиони за неговиот потпис, меѓутоа Гвардиола не сака да се откаже од Аргентинецот.

Милан наводно тргна во поход на потписот на Данецот Јеспер Линдстром, кој го носи дреот на германски Ајнтрахт Франкфурт.

Спортскиот директор на Милан, Паоло Малдини внимателно го следи Линдстром на настапите во Лигата на шампионите и во него гледа голем потенцијал за Милан следната сезона.

Медиумите пишуваат и дека клубот ги истражува можностите летово да го ангажира Линдстром, но преговорите би почнале по завршувањето на сезоната.