Селекторот на англиската фудбалска репрезентација, Гарет Саутгејт, и официјално го продолжи договорот за водење на „гордиот албион“ до 2024 година. 

Неговиот сегашен договор со фудбалската федерација на Англија беше со важност до 2022 година и со него Саутгејт заработуваше плата од 3 милиони фунти годишно. Со новиот договор тој ќе заработува фантастични 6 милиони фунти на годишно ниво со што ќе стане најплатениот селектор во историјата на репрезентацијата.

51-годишниот Саутгејт ја води репрезентацијата на Англија од 2016 година, и најголеми успеси му се пласманите во финалето на ЕУРО 2020 и полуфиналето на Светското првенство во 2018 година.

Продолжувањето на договорот значи дека Англичанецот, ќе биде на клупата на репрезентацијата на Светското првенство во Катар  и Европското првенство во 2024 чиј домаќин ќе биде Германија.

Бараж двојките за пласман на Светското првенство во Катар 2022, ќе бидат познати во петок. Македонија ќе биде во групата на неносители што значи дека сме потенцијален противник на Русија, во натпревар кој ќе се игра на нивни терен.
Со коментар за оваа можност своја изјава даде и селекторот на руската репрезентација, Валери Карпин.

„Македонија би била идеален противник за Русија во баражот. Сите ја посакуваат македонската репрезентација за свој ривал,не само ние. Но мора да знаеме дека Македонија не е за потценување иако се во групата на неносители. Ние ќе мора да ја оправдаме улогата на фаворит доколку навистина би играле против нив“, изјави Карпин.

Интер покажува сериозен интерес кон напаѓачот на Лил, Џонатан Дејвид, пренесуваат италијанските медиуми. Тренерот Симоне Инзаги лично се залага за привлекување на напаѓачот, кого го следи уште минатата сезона.

Примарна цел на „нероаѕурите“ во летниот преоден рок ќе биде доведување на напаѓач бидејќи Џеко е во поодминати години, а Санчез е на излезна врата.

Прв на листата желби е токму Џонатан Дејвид и Интер спрема понуда за младиот напаѓач. 21-годишниот напаѓач оваа сезона постигна 10 гола на 14 меча за Лил и неговата цена изнесува 35 милиони евра.

Повеќе спортски портали во Англија известуваат за изненадувачкиот интерес на Ливерпул за фудбалерот на Челзи, Мејсон Маунт.

Според „Дејли Стар“, репрезентативецот на Англија не се чувствувал доволно ценет од раководството на Челзи и е можно негово заминување од клубот.  

Мејсон Маунт е дете на Челзи и во септември започна преговори за нов договор со тимот од „Стенфорд Бриџ“, меѓутоа неговиот менаџер изјавил дека клубот не ја покажувал потребната почит кон Маунт во споредба со останатите играчи и нивната висина на финансиски примања.

Иако неговата љубов кон Челзи и навивачите е голема, можно е тој да замине за повторно да заигра на високо ниво. Нема подобро место за тоа од Ливерпул, наводно изјавил менаџерот на играчот.

Артур Мело не успеа да се вклопи во италијанското првенство и се очекува да го напушти Јувентус во јануарскиот преоден рок. Според информациите, тој сака да се врати во Ла Лига, каде повеќе му одговара стилот на игра.

Бразилскиот играч за врска не е дел од плановите на Алегри и веќе разговарал со својот агент да му бара клуб во Шпанија, каде би продолжил со кариерата. Се зборува дека за него е заинтересирана  Севиља, бидејќи Јулен Лопетеги има симпатии кон него.

Јувентус го проценува на околу 35 милиони евра, сума која Севиља сигурно нема намера да ја плати за Артур оваа зима. Тоа значи дека трансферот може да се реализира дури на лето.

Хари Мегваер нема повеќе да биде капитен на Манчестер Јунајтед, пренесуваат медиумите на Островот.

„Црвените ѓаволи“ поминуваат низ голема резултатска криза и после поразот од Ватфорд (4-1) решија да му врачат отказ на тренерот Оле Гунер Солскјер.

Најскапиот дефанзивец на светот игра очајно оваа сезона и е еден од најголемите виновници за слабите резултати. Чашата ја прели фактот дека Мегваер после дебаклот од Ватфорд бил на забава, а го издаде една фотографија на негов пријател, со кој се сликал.

Ова челниците на Јунајтед не му го простиле, па така сега се најавува дека каптенската лента ќе оди кај Кристијано Роналдо, дека тој со својот авторитет ќе мора да го подигне тимот.

Андриј Шевченко кој дебитираше на клупата на Џенова со пораз од Рома со 0:2, после натпреварот изјави дека опстанокот на Џенова во Серија А ќе биде еднакво на освојувањето на Лигата на шампиони.

„Имаме доста проблеми со повредени играчи. Против Рома прикажавме карактер, држевме добро темпо но немавме сили за повеќе од тоа. Битно е тоа што играчите го дадоа својот максимум на теренот. Благодарам за одличниот прием од навивачите на стадионот и нивната поддршка кон тимот. До крајот на првенството имаме тешки натпревари и доколку останеме во Серија А тоа ќе биде успех како освојување на ЛШ“, рече Шевченко.

После поминати три години како тренер на тимот од „Олд Трафорд“, Оле Гунар Солскјер беше разрешен од функцијата и го напушти клубот.

Пред неговото заминување од Манчестер, норвешкиот стратег преку интервју им се обрати на фановите и даде емотивни пораки за неговото време поминато на клупата на „црвените ѓаволи“.

„Чест ми е што ја добив довербата да го однесам клубот напред и се надевам дека го оставам во подобра состојба отколку кога дојдов. Создадов одлични пријателства, а навивачите беа одлични, од првиот ден во Кардиф до последниот. Знаете колку овој клуб ми значи и што сакав да постигнам тука. Сакав да направам чекор напред во трката за титулата, сакав да освојуваме трофеи. Жалам што не успеав и затоа сега е време да си заминам. Уживав од првата до последната минута тука. Благодарам на раководството кое ми даде шанса и на навивачите кои ми даваа поддршка“, изјави Солсјкер на неговото последно интервју на ТВ каналот на Манчестер Јунајтед.

Инвестицискиот фонд од Саудиска Арабија откако го презеде Њукасл сега е спремен да вложи голема сума за реконструкција на тимот.

Англиските медиуми пишуваат дека Њукасл ќе може да потроши меѓу 200 и 250 милиони евра во зимскиот преоден рок, а така нема да го загрози финансискиот фер-плеј (ФФП).

Прва мета е Душан Влаховиќ, кој блеска во дресот на Фиорентина и за чиј потпис се борат голем број на европски гиганти. 21-годишниот напаѓач моментално е прв стрелец во Серија А, но јасно е дека ќе ја напушти Фиорентина откако одби да го продолжи договорот.

Многу европски клубови веќе ја започнаа битката за неговиот потпис, но Њукасл сака да ја победи конкуренцијата и спремил понуда од 83 милиони евра.

Притоа, Њукасл му нуди на Србинот двојно поголема плата од таа што му ја нудат Јувентус и Тотенхем во моментов.

Соочена со ескалација на бројот заразени со коронавирус, германската сојузна покраина Саксонија забрани присуство на навивачи на спортските терени до 12 декември, како дел од широк спектар на претпазливи мерки.

Саксонија во германски рамки е на дното според процентот на вакцинација на локалното население со приближно 60 отсто вакцинирани, а во оваа покраина инциденцијата на коронавирус во моментов е највисока со 584 случаи на 100.000 жители во последните седум денови.

Поради новите ограничувања, бундеслигашот Лајпциг следните два првенствени натпревари, против Леверкузен и Менхенгладбах, ќе ги игра без поддршка на своите навивачи, а зад затворени врати ќе го пречека и Манчестер сити во клучниот натпревар во Лигата на шампиони на 7 декември.

Раководството на Лајпциг остро ја критикуваше локалната извршна власт поради тоа што дозволила ескалација на состојбата со коронавирусот.

„Највисокото ниво на зараза споредено со сите други германски покраини и најнискиот процент на вакцинација, покажуваат дека власта во Саксонија досега не беше во состојба да осмисли добар план за спречување на пандемијата“, соопшти бундеслигашот од Лајпциг.