Фудбалскиот сојуз на Бразил сака Пеп Гвардиола да биде нов селектор на репрезентацијата, после Светското првенство во Катар.

Тренерот на Манчестер Сити веќе подолго време е желба на сојузот, но до сега не постоеа шанси за негов ангажман.

Репрезентацијата на Бразил, последен пат беше Светски шампион пред 20 години, и тој факт повеќе не се толерира од од нацијата која е опседната со фудбал.

Од финансиска страна Пеп како селектор би заработувал 12 милиони евра годишно, што е далеку помалку од 23 милиони евра колку што во моментот заработува во Сити. Меѓутоа од бразилската федерација се надеваат дека Гвардиола би прифатил да биде на чело на репрзентацијата која можеби го игра најатрактивниот фудбал во историјата на спортот. Договорот би бил со важност од 4 години, односно до следниот Мундијал во 2026 година.

Голманот на Реал Мадрид, Тибо Куртоа предупреди дека победата од 3-1 на теренот на Челзи не значи автоматски и пласман во полуфиналето во Лигата на фудбалските шампиони.

„Започнавме добро против екипа која игра многу интензивно. Создававме ситуации, погодивме греда а потоа промашивме уште две шанси. Не треба да мислиме дека работата е завршена. Се надевам дека со поддршка од навивачите уште еднаш ќе победиме“, изјави Куртоа по вчерашната победа во Лондон.

Јирген Клоп изјави дека не е загрижен за трансферот на норвешката ѕвезда на Борусија Дортмунд, Ерлинг Халанд, бидејќи цената на играчот е превисока.

21-годишниот Норвежанец најверојатно ќе ја напушти Борусија на крајот на сезоната, а за неговиот потпис се заинтересирани некои од најголемите тимови во Европа.

Реал Мадрид, Пари Сен Жермен и Манчестер Сити се меѓу кандидатите за Ерлинг Халанд, кој оваа сезона за Борусија Дортмунд постигна 16 гола на 18 натпревари и забележа пет асистенции. Норвежанецот постигна уште три гола на три меча во Лигата на шампионите и четири гола на два меча од турнирот во Купот на Германија, но неколку недели беше надвор од терените поради повреди.

„Не можеме да се вклучиме. Спомнати бројки за вистинско лудило. Нема шанси. И искрено, тоа е нешто што не го сакам. Воопшто не е забавно“, изјави Јирген Клоп за магазинот „Билд“.

Баерн Минхен вчера изненадувачки загуби кај Виљареал со 1-0 во првиот меч од четвртфиналето во Лигата на фудбалските шампиони. Напаѓачот на Баварците, Томас Милер, призна дека неговиот тим не бил на посакуваното ниво.

„Немавме доволно енергија, не направивме вистински шанси. Можевме да загубиме и поубедливо. Виљареал е сериозен тим. Ќе мора добро да се подготвиме за реваншот. Ние сме сепак Баерн Минхен“, изјави Милер.

Светската фудбалска федерација(ФИФА) ги демантира шпекулациите дека натпреварите на Светското првенство во Катар ќе траат подолго од 90 минути.

Претходно, некои од светските медиуми ја пренесоа веста дека од ФИФА размислувале да ги продолжат натпреварите, а претседателот Џани Инфантино ја разгледувал опцијата натпреварите да траат 100 минути, со цел навивачите да уживаат во повеќе акција.

Во извештаите се напоменуваат податоци од истражувања според кои во Лигата на шампионите активно се игра само 60,2 проценти од времето.

Но набрзо стигна и демант од Светската куќа на фудбалот.

„После објавените извештаи и гласини, ФИФА сака да истакне дека нема да има промени во правилата во врска со должината на траење на фудбалските натпревари на СП во Катар, ниту на било кое друго натпреварување“.

Фудбалска федерација на Австрија официјално ги демантираше гласините дека во почетокот на неделава директорот на организацијата, Петер Шетел, одлетал во Манчестер на средба со привремениот менаџер на „црвените ѓаволи“, Ралф Рангник.

Според шпекулациите, газдите на австрискиот фудбал имале план да го поканат Рангник за селектор. Местото е испразнето откако Франко Фода поднесе оставка по поразот од Велс во полуфиналниот плеј-оф за Светското првенство во Катар.

Австриската фудбалска федерација наведува дека немало средба меѓу Шетел и Рангник.

Тренерот на македонскиот прволигаш Академија Пандев, Ѓорѓе Стојчев, не е повеќе тренер на екипата.

Тој одлучи да се повлече од функцијата во клубот од Струмица, после двата натпревари во кои Академија Пандев беше изразит фаворит но не успеа да слави победа. Во минатото првенствено коло претрпе пораз од Скопје а во последниот натпревар играше нерешено со Борец .

„Благодарност до Горан Пандев, Фк Академија Пандев. Со срце и душа работев од создавањето на клубот па се до денес. После двата последни резултати одговорноста ја превземам јас како тренер. Посакувам на клубот, играчите во иднина исполнување на зацртаната цел и се надевам ФК Академија Пандев ќе игра во Европските натпреварувања !!!“, порача Стојчев преку пост на Фејсбук.

Тренерот на Реал Мадрид, Карло Анчелоти не ги штедеше импресиите од играта на напаѓачот Карим Бензема, кој постигна хет-трик во победата од 3:1 над Челзи во првото четвртфинале од Лигата на шампионите кое се одигра на „Стемфорд Бриџ“.

„Го контролиравме натпреварот и опасно напаѓавме преку контра напади. Беше добра фудбалска вечер, сега имаме мала пауза, но не треба да се опуштиме. Покажавме добра организација, а Бензема беше фантастичен пред голот на противникот. Имаме предност пред реваншот, но во вторник ќе имаме сосема поинаков натпревар. Сепак, Челзи е актуелен победник во Лигата на шампионите“, изјави Анчелоти после натпреварот.

Тренерот на Виљареал, Унаи Емери, упати пофалби кон своите играчи за нивниот настап на натпреварот со Баерн Минхен. 

Виљареал славеше победа со 1-0 против шампионот на Германија во првото четвртфинале од Лигата на шампионите.

“Начинот на кој играме покажува дека сме на високо ниво при соочувањето со фаворитите. Нашата цел е да се пласираме во полуфиналето. Бевме практично совршени против Баерн и можевме да оствариме и поубедлива победа”, изјави Емери.

Челниците на Париз Сен Жермен ќе се обидат да го привлечат Погба назад во неговата татковина. Според информациите клубот веќе упатил понуда до Пол Погба бидејќи договорот на Французинот со Манчестер Јунајтед истекува на крајот на сезоната и се чини дека тој нема да остане на Олд Трафорд.

Доколку 30-годишниот фудбалер се согласи со условите на ПСЖ, тој ќе се пресели на Паркот на принцовите како слободен играч.

Парижаните со сигурност ќе му понудат повисока плата од 290 илјади фунти неделно, колку што во моментот Погба заработува во Јунајтед.

Се верува дека Погба повеќе сака да се врати во својот поранешен тим Јувентус, но неговата плата е превисока за гигантот од Италија.