Тренерот на Астон Вила, Стивен Џерард потврди дека клубот сака да потпише постојан договор со Филипе Кутињо ова лето.

 Џерард го доведе поранешниот играч на Ливерпул во јануарскиот преоден рок на шест месечна позајмица од Барселона. Договорот вклучува и опција за откуп за 33 милиони фунти, која Астон Вила е подготвена да ја плати на крајот од оваа сезона.

Бразилецот веќе постигна три гола во Премиер лигата, а тренерот Џерард е задоволен од неговите настапи.

Тотенхем синоќа убедливо го совлада Евертон со 5:0 во натпревар од 28. коло на англиската Премиер лига. Англискиот напаѓач во редовите на Тотенхем, Хари Кејн постигна два гола на овој натпревар, со што играчот дојде до шестото место на листата на најдобри стрелци во историјата на Премиер лигата, оставајќи го зад себе Французинот Тиери Анри.

Севкупно, Кејн сега има 176 постигнати голови во Премиер лигата. На врвот на листата е Алан Ширер со 260 голови. Претходно беше објавено дека Тотенхем сака да го продолжи договорот со Хари Кејн, кој истекува во 2024 година.

Тренерот на Тотенхем, Антонио Конте, го смета напаѓачот за главна ѕвезда на неговиот проект. Но, одлуката на Кејн ќе зависи од трансферите и влезот на Тотенхем во Лигата на шампионите. Доколку играчот одбие да го обнови договорот, тој може да биде продаден.

Играчот на шпанскиот прволигаш Виљареал, Алберто Морено, ќе го пропушти остатокот од фудбалската сезона, поради тешката повреда која ја заработи на натреварот против Осасуна во Ла Лига.

Медицинскиот тим на екипата, информира дека 29-годишниот Морено, ги скинал предните вкрстени лигаменти од коленото, повреда која е една од најсериозните во фудбалскиот спорт. Ова сигурно ќе претставува голем проблем за екипата на Виљареал која ја очекува реванш дуел против Јувентус во осминафиналето од Лигата на шампионите.

Алберто Морено е член на Виљареал од 2019 година, кога како слободен играч пристигна од тимот на Ливерпул.

Хуан Мата не е во прв план во редовите на Манчестер Јунајтед и тоа само му ја олесни одлуката да го напушти клубот на лето.

Од поодамна Мата не е сериозните планови на Јунајтед, оваа и минатата сезона ретко го гледавме во Премиер лигата, скоро и да е заборавен. Сега Мата сака да замине од Јунајтед и верува дека на друго место може уште некоја година да игра квалитетен фудбал.

Пред се тој ја разгледува опцијата за враќање во Шпанија каде што претходно помина 11 години носејќи го дресот на Валенсија, потоа се пресели во Челзи од каде што во јанаури 2014 дојде во Манчестер Јунајтед.

Оваа сезона не одигра ниту еден натпревар во Премиер лигата. Два пати влегуваше во Лигата на шампионите, а запиша по еден настап во ФА Купот и Карабао Купот.

Тренерот на Јувентус, Масимилијано Алегри потврди дека сезоната за американскиот играч за врска Вестон Мекени е завршена. Како што е познато, 23-годишниот играч од средниот ред заработи скршеница на ногата во осминафиналето од Лигата на шампионите против Виљареал.

„Вестон ќе се врати да игра следната сезона. За него оваа е завршена“, изјави Алегри по победата од 1-0 над Специја.

Познатиот фудбалски новинар, Фабрицио Романо, ја пренесува информацијата дека играчот на Манчестер Јунајтед, Маркус Рашфорд, размислува за напуштање на клубот.

Како главна причина за неговото евентуално заминување од „Олд Трафорд“ се споменува неговото незадоволство од минутажата во првиот тим предводен од тренерот Рангник.

Договорот на 24-годишниот англиски репрезентативец со Јунајтед истекува во летото 2023 година, а како заинтересирани клубови за негов ангажман се споменуваат шпанските гиганти Реал Мадрид и Барселона. Сепак пред да ја донесе конечната одлука, се очекува Рашфорд да причека и да види кој ќе биде нов тренер на „црвените ѓаволи“.

Јирген Клоп нема намера да остане на клупата на „црвените“ по истекот на неговиот договор.

Договорот на германскиот стручњак истекува во јуни 2024 година, а како што стојат работите тој засега нема намера да го продолжи. Иако последниве години стана синоним за успесите на клубот од „Енфилд“, мали се шансите да остане и потоа.

„Планот е да останам до летото 2024 година, а потоа, благодарам многу“, изјави Клоп.

Меѓутоа, под посебни околности ја отвори вратата за да се премисли.

„Само ако имам ниво на енергија да продолжам. Го сакам тоа што го работам, но неколку пати реков дека има и други работи во светот освен што постојано размислувам за многу вешти, згодни, фантастично убави фудбалери! Сега сум полн со енергија, но мораме да се погрижиме да остане така“, вели Јирген.

Кевин де Брујне стана четвртиот Белгиец со 50 голови во Премиер лигата. Играчот од средниот ред на Манчестер сити беше двоен стрелец вечерва во дерби-триумфот со Манчестер јунајтед (4-1).   

Неговиот прв гол беше 50-ти во Премиер лигата, вториот – 51-ви. Покрај погодоците во 5. и 28. минута, Де Брујне беше и асистент при третиот гол на Сити што го постигна Ријад Марез во 68. минута. Марез се запиша уште еднаш во листата на стрелците во 90+2. минута. За Јунајтед погоди Џејдон Санчо во 22. минута. Манчестер сити со 69 бодови е лидер на табелата пред Ливерпул кој има 63 и натпревар помалку.

Капитенот на Баерн Минхен, голманот Мануел Нојер ќе биде стартер во реванш натпреварот од осминафиналето на Лигата на шампионите против РБ Салцбург, објави тренерот на Баварците, Јулијан Нагелсман.

Нојер пред околу еден месец имаше операција на коленото, а неодамна ги продолжи тренинзите со соиграчите од Баерн.

„Ако не се случи нешто неочекувано на последниот тренинг, Нојер ќе биде стартер на дуелот со РБ Салцбург“, изјави Нагелсман за Скај Германија.

Баерн Минхен игра против РБ Салцбург во вторник, а првиот натпревар заврши нерешено 1:1.

Меѓународната фудбалска федерација (ФИФА) ја разгледува опцијата за одложување на бараж натпреварот од квалификациите за Светското првенство во Катар помеѓу репрезентациите на Русија и Полска кој би се одржал во јуни, објавуваат полските медиуми.

УЕФА и ФИФА претходно донесоа одлука со која ги повлекоа руските клубови и тимови од меѓународните турнири поради ситуацијата со нападот врз Украина, но сега постои шанса репрезентацијата на Рисија сепак да настапи на баражот за СП во Катар. 

Натпреварот првично беше закажан за 24 март во Москва, но полскиот фудбалски сојуз очекува конечен одговор од ФИФА во вторник.