Пјер Емерик Обамејанг ова лето пристигна во Челзи од Барселона, но сигурно нема долго да се задржи.

Тој дојде во Челзи по барање на Тухел и не добива голема минутажа кај Потер, па сака да ја промени средината на крајот на сезоната. Интерес за него покажуваат италијанските гиганти Милан, Интер и Јувентус кои сакаат да ја искористат ситуацијата и да го доведат во своите редови.

Обамејанг на лето влегува во последната година од договорот, па Челзи е спремен да го пушти за само пет милиони фунти.

Напаѓачот е спремен да се врати во Серија А, каде ја започна својата кариера, па останува да видиме кој ќе ја добие битката за неговиот потпис.

Тренерот на Рома, Жозе Мурињо го коментираше натпреварот и победата над Емполи. Новинарите помалку ги интересираше како Португалецот го гледа овој натпревар, а повеќе за пошироката слика за клубот и односот со Николо Заниоло.

„Заниоло е проблем за клубот, јас немам ништо со тоа. Тој мора да си ги реши проблемите со клубот, а не со мене. Што се однесува до Смолинг, не можам да направам ништо за да го убедам да потпише нов договор“, рече Мурињо, а потоа одговори на прашањето за тоа дека во текот на преодниот рок имал понуди од Премиер-лигата и од бразилската и португалската репрезентација:

„Можев да ја напуштам Рома во декември, но не го сторив тоа. Ова е мојот живот, секој ден е борба. Понекогаш може да изгледа како да се мачиме, но ние сме таму горе, блиску до врвот на табелата со другите тимови кои се силни и имаат што да кажат“.

Турските фудбалски состави Фенербахче и Галатасарај покажале дека се заинтересирани да го земат Николо Заниоло кој по сите перипетии во зимскиот трансфер период не ја напушти „римската волчица“.

Одличниот напаѓач инсистираше да замине во Тотенхем или во Милан но,двата клуба го сакаа само на позајмица а Римјаните инсистираа на перманентен трансфер.

Заниоло кој има договор со Рома до јуни во 2024 година и одби да тренира, сега е надвор од списокот на Жозе Мурињо.  

Иско во последните моменти од преодниот рок беше блиску до трансфер во Унион Берлин, дури и пристигна на прегледи во овој клуб, но на крајот трансферот не се реализираше.

Двете страни се обвинуваа дека ги промениле барањата во преговорите во последен момент. Сега тој е слободен агент и може да потпише договор со било кој клуб иако не е отворен преодниот рок. Ситуацијата со Иско ќе се обиде да ја искористи Евертон и да го доведе во своите редови. Во Иско Евертон гледа замена за Ентони Гордон кој за 40 милиони евра направи трансфер во Њукасл.

Ќе потсетиме, Евертон неодамна како наследник на Лампард го промовираше Шон Дајч на клупата.

Дани Себаљос може да го продолжи договорот со Реал Мадрид.

Претставници на играчот од средниот ред му кажале на клубот дека Дани сака да остане во Мадрид.

Реал Мадрид се согласува да ја продолжи соработката и ќе му понуди на играчот договор на 4 години. Платата на играчот ќе биде зголемена. Се истакнува дека доколку предложените услови останат непроменети, договорот ќе биде потпишан во блиска иднина.

Англиски Манчестер Јунајтед веќе крои планови за летниот трансфер период. Каталонскиот весник „Спорт“ пишува дека Манчестер Јунајтед сака да го ангажира крилниот напаѓач на Барселона, Ансу Фати, кој годинава не се наигра во тимот на Чави.

20-годишниот фудбалер постигна три гола на 19 натпревари во Ла Лига досега оваа сезона. Во осминафиналето на Лига Европа ќе се сретнат Барселона и Манчестер Јунајтед. Првиот натпревар е на 16 февруари на стадионот „Камп Ноу“.

Кевин Трап го продолжи договорот со Ајнтрахт Франкфурт. Ова го соопшти прес-службата на тимот. Новиот договор е со важност до летото 2026 година. Сега голманот има 32 години. Постоечкиот договор на 32-годишниот фудбалер истекуваше во 2024 година.

Голманот настапува за својот сегашен клуб од летото 2018 година. Трап одигра 286 натпревари за Ајнтрахт Франкфурт и прими 426 гола. Заедно со тимот минатата сезона ја освои Лигата на Европа.

Претходно беше објавено дека Баерн Минхен контактирал со претставници на германскиот голман за да дознае дали е можен негов трансфер во нивните редови. Интерес кај Баерн Минхен имаше поради повредата на главниот голман Мануел Нојер. Самиот Трап не беше против преминот во големиот германски фудбалски гигант, но трансферот не се реализираше.

Манчестер Сити ова лето го доведе англискиот репрезентативец Калвин Филипс од Лидс за 50 милиони евра.

Филипс требаше да биде големо засилување за тимот на Гвардиола, но Англичанецот ретко добива шанса и не ги оправда очекувањата. Англиските медиуми пренесуваат дека иднината на Филипс на „Етихад“ е несигурна поради неговите неубедливи партии од стартот на сезоната.

Филипс е незадоволен, но Гвардиола е бескомпромисен и му порачал дека слободно може да си бара нов клуб.

Играчот за врска ќе има уште неколку месеци до крајот на сезоната да го промени мислењето на Гвардиола, во спротивно ќе биде продаден на лето.

Илкај Гундоган на крајот на сезоната може да ја промени средината и кариерата да ја продолжи во Серија А.

Гундоган влезе во последната година од договорот со Манчестер Сити и на лето ќе биде слободен агент. Германските медиуми пренесуваат дека нема најави за продолжување на соработката со „граѓаните“, а целата ситуација будно ја следат Милан, Интер и Јувентус.

Италијанските гиганти сакаат да го доведат Германецот без обештетување на лето, па наскоро ќе стапат во контакт со неговиот агент.

Гундоган е отворен за преселба во Серија А, па останува да видиме кој клуб ќе победи во трката за неговиот потпис.

Реал Мадрид на лето би можел да направи тренерска смена, а прв избор на „кралевите“ за нов кормилар е Маурисио Почетино.

Анчелоти има договор до 2024 година, но доколку ја заврши сезоната без трофеј сигурно ќе биде отпуштен, а Реал веќе размислува за негова замена.

Прв избор е Маурисио Почетино, кој е слободен после отказот кој го доби во ПСЖ и секако дека не би одбил понуда од „кралскиот“ клуб.

Почетино во Шпанија со голем успех го предводеше Еспањол од 2009 до 2012 година после што се пресели во Премиер лигата каде што беше дел од Саутемптон и Тотенхем.