Од Италија пристигнуваат информации дека капитенот на Наполи,Лоренцо Инсиње, ќе го напушти клубот по истекот на договорот ова лето. Како причина за можното заминување од Наполи се споменува незадоволството на играчот од понудените финансиски услови за нов договор. 

Ситуацијата со Инсиње будно ја следат челните луѓе од Интер кои се подготвени за негово доаѓање на „Џузепе Меаца“ да му понудат годишна плата од 6 милиони евра. 

Големи се шансите Лоренцо Инсиње да го прифати понуденото и веќе во јануари да се договори за промена на средината, односно за преоѓање во Интер.

Колумбискиот напаѓач од екипата на Рајо Ваљекано, Радамел Фалкао, е блиску до продолжување на договорот со клубот. Според изворот, во наредните денови колумбискиот напаѓач ќе склучи нов договор со важност до 2023 година.

Актуелниот договор на фудбалерот завршува на крајот на сезоната. Колумбиецот се пресели во Рајо Ваљекано во септември како слободен фудбалер.

Манчестер Сити покажува сериозен интерес за напаѓачот на Лајпциг, Кристофер Нкунку, пренесуваат медиумите на Островот. 23-годишниот Французин игра одлично оваа сезона и го привлече вниманието на многу европски гиганти.

Нкунку од почетокот на сезоната има постигнато 9 гола и 5 асистенции на 14 меча за Лајпциг. Нкунку е дете на ПСЖ и пристигна во Лајпциг во 2019 година, каде има договор на уште три години.

Гвардиола е во потрага по квалитетен напаѓач и смета дека Французинот идеално ќе се вклопи во неговата формација.

Играчот на Париз Сен Жермен, Нејмар, во тренинг кампот на бразилската репрезентација пристигна со хеликоптер.

Неговиот хеликоптер е од марката Мерцедес и истиот е брендиран и персонализиран по негова желба. Нејмар за оваа „играчка“ мораше да издвои 12 милиони долари.

Бразилецот често го користи ова превозно средство кога е во родниот Бразил, за да ги избегне метежот и притисокот од неговите фанови.

Популарниот фудбалски новинар, Фабрицио Романо, изјави дека Ливерпул е заинтересиран за напаѓачот на Виљареал, Арно Груневелд.

Од клубот од  „Енфилд“ наводно имале намера да го доведат Холанѓанецот уште во текот на летото, но битката за негов потпис ја доби шпанскиот Виљареал.

Груневелд во дресот на Виљареал оваа сезона има одиграно 15 натпревари со постигнати 7 гола и 2 асистенции.

Играчот на Манчестер Јунајтед, Пол Погба, заедно со неговиот менаџер, Мино Рајола, наводно побарале од раководството на клубот тој да стане најплатен фудбалер на „Олд Трафорд“ ако сакаат да потпише нов договор.

Тоа би значело дека Погба бара повеќе од 480.000 фунти неделно, колку што сега заработува Кристијано Роналдо кој е најплатен фудбалер во Манчестер Јунајтед.

Договорот на францускиот репрезентативец со „црвените“ од Манчестер истекува ова лето и тој има приходи од 290.000 фунти неделно. Погба моментално е повреден и ќе биде надвор од терените до нова година. Ако нема договор до јануари тој ќе биде слободен да преговара и со други клубови.

Џејдон Санчо, за кого Манчестер Јунајтед летото плати 73 милиони фунти, се подготвува за нова улога во тимот на Оле Гунар Солскјер.

Во последните две недели, 21-годишниот крилен напаѓач беше вклучен како крилен бек и наскоро може да биде искористен на овој начин во натпреварите на „црвените ѓаволи“. По тешкиот пораз од Ливерпул, Солскјер реши да ја промени шемата на игра и да се префрли на 3-4-1-2 со тројца централни дефанзивци и двајца крилни бекови. Арон Ван-Бисака, кој игра на десната страна, е критикуван за офанзивниот настап, додека во ретки случаи кога е на теренот, Санчо вложува многу енергија во дефанзивата, па има одредена логика во таквиот потег.

Сепак, фановите на Јунајтед се помалку оптимисти околу оваа информација, бидејќи сметаат дека ставањето на Санчо во ваква нетипична улога е само уште еден доказ за хаосот кој владее во последно време.

Од почетокот на сезоната, Санчо учествуваше на вкупно 13 натпревари во сите натпреварувања, на кои, сепак, на теренот беше само 564 минути. Поради тоа, тој не се најде на списокот на Герет Саутгејт за претстојните квалификации за Светското првенство.

Факијо Томори во јануари се пресели од Челзи во Милан и се етаблираше како еден од најдобрите дефанзивци во Серија А.

Томори е значаен дел од тимот на „росонерите“, кои ова лето за да го откупат од Челзи платија 29 милиони евра.

„Кога ми се јави Малдини бев во шок. Не можев да поверувам дека гигант како Милан ме сака. Кога пристигнав и го облеков дресот си реков: „Па ова е вистина, јас играм за еден од најголемите клубови во светот. Многу сум среќен и благодарен што играм за толку голем клуб. Постојано разговарам со Малдини и тој ми дава совети. Смета дека можам да напредувам уште многу, особено во позиционирањето. Самиот факт дека Малдини и Барези ме гледаат и ми даваат совети за мене е голем стимул“, додаде англискиот репрезентативец.

Јувентус го понудил играчот од средниот ред Арон Ремзи на други клубови, вклучувајќи ја и Рома, објави „Калчомеркато“.

„Старата дама“ се согласува да го позајми Рамзи бесплатно и во исто време да му плати на Велшанецот 60% од неговата плата. Така, клубот кој се согласил на зделката ќе му плати на Арон Ремзи околу 1,5 милиони евра за една и пол година преостанати од договорот. Јувентус веќе нема намера да му дава шанси на Ремзи, кој не успеа да се докаже во италијанското првенство.

Беше објавено дека Јувентус ќе го раскине договорот со Арон, а играчот сам ќе може да најде нов клуб. Не е исклучена опцијата за враќање на играчот во англиската Премиер лига. Минатата сезона во Серија А, Арон Рамзи одигра 22 натпревари, постигна два гола и четири асистенции. Велшанецот сезонава одигра само три натпревари за својот клуб во италијанскиот шампионат.

Репрезентативецот на Италија и член на Лацио, Чиро Имобиле, го напушти тренинг центарот на „азурите“ поради повреда, информираат од прес-службата на репрезентацијата.

Селекторот Манчини како замена за Имобиле, веднаш го повика Џанлука Скамака кој настапува во екипата на Сасуоло.

На репрезентацијата на Италија и останаа уште два натпревари од квалификациите за Светското првенство и тоа против Швајцарија и Северна Ирска.

Италија го дели првото место во Ц-групата со репрезентацијата на Швајцарија, со освоени 14 бода. Следуваат Бугарија со 8, Северна Ирска со 5 и Литванија со освоени 3 бода.