Златан Ибрахимоиќ има желба да игра и следната сезона, па започна преговари со раководството на Милан за продолжување на соработката.

Иако има 40 години Ибрахимовиќ не размислува за пензија, особено ако Шведска се пласира на Светското првенство, бидејќи негова желба е да игра во Катар.

Според последните информации ако Ибрахимовиќ сака да игра и следната сезона во дресот на Милан ќе мора да прифати значително намалување на платата. Ибра и понатаму прави разлика на теренот, но без него тимот игра поинаку, побрзо и со повеќе пресинг.

Според Мундо Депортиво, Барселона е уште еден клуб кој се вклучува во битката за потписот на напаѓачот Пауло Дибала.

Аргентинецот не се договори за нов договор со неговиот сегашен клуб Јувентус и на лето ќе го напушти Торино како слободен играч.

Претставниците на Барса веќе се распрашуваат за условите под кои Дибала би се преселил на Камп Ноу.

Рома за својот голгетер Тами Абрахам одреди цена од 120 милиони евра. Англискиот репрезентативец минатото лето се пресели во Рома од Челзи за 40 милиони евра и има одлична сезона со 23 гола на 37 натпревари.

Настапите на Абрахам предизвикаа интерес кај англиските клубови и некои од водечките тимови ќе се обидат да го вратат во Премиер лигата. Во Италија вчера се појави информација дека Манчестер Јунајтед размислува за понуда за него.

Рома ќе се обиде да го задржи 24-годишниот голгетер, со надеж дека ќе го пренасочи интересот на кандидатите со оваа  трансфер цена од 120 милиони евра.

Добри вести конечно доаѓаат на Стемфорд Бриџ. Челзи ќе може да продаде одредена сума на билети и да добие 30 милиони фунти од спонзорите.

Правилата според кои британската влада му даде лиценца на Челзи да го одржува клубот по воведувањето на санкциите кон Роман Абрамович и замрзнатите средства беа малку олеснети во средата.

Челзи сега ќе може да добие до 30 милиони фунти од своите спонзори и партнери, со што ќе го реши проблемот со ликвидноста на клубот и подмирување на обврските на клубот кон играчите и вработените.

Дополнително, има добри вести за навивачите – Челзи повторно ќе може да продаде одредена сума на билети, вклучувајќи го и за полуфиналниот меч од ФА Купот како и за дуелот од Лигата на шампионите со Реал, но ова олеснување не важи за натпреварите на кои Челзи е домаќин на Премиер лигата.

„Денес Владата направи одредени промени кога е во прашање лиценцата која му е дадена на Челзи. Навивачите на тој начин ќе можат да купат билети за гостувањата, куп натпреварите и дуелите на женскиот тим“, потврди министерот за спорт во британската Влада, Најџел Хадлстон.

Екипата на Вулверхемптон следниот месец ќе биде без еден од своите најважни играчи. Португалскиот репрезентативец Рубен Невес има повреда на коленото, која ја доби на натпреварот со Лидс.

Првичните прогнози беа дека повредата не е толку сериозна, бидејќи 25-годишниот играч доби повик за настап со португалската репрезентација. Таму му беа извршени дополнителни медицински прегледи, кои покажаа дека има повреда на лигаментот.

Според прогнозите, Невес ќе мора да одмора најмалку еден месец пред да се врати на теренот.

39-годишниот англиски фудбалер Џермејн Дефо соопшти дека става крај на фудбалската кариера. 

Дефо ја заврши кариерата како играч на Сандерленд, каде се врати кон крајот на јануари и потпиша договор до крајот на сезоната, но одигра само седум натпревари.

Пред да се врати во Сандерленд, Дефо играше за Ренџерс, за кој минатата сезона одигра 74 натпревари и постигна 32 гола. Дефо ја започна својата кариера во Вест Хем во 1999 година, а беше член на Борнмут, Тотенхем, Портсмут и Торонто.

Англискиот шампион Манчестер Сити е подготвен да плати рекордни 150 милиони евра за ѕвездата на Вест Хем, Деклан Рајс, тврди англискиот Дејли Мејл.

Според весникот „чеканите“ се отворени за понуди, а во моментов се чини дека најсериозно заинтересирани се челниците на Сити. Сумата што ја нуди клубот е за 30 милиони евра помала од откупната клаузула во неговиот договор.

Вест Хем веројатно нема да биде подготвен да преговара за намалување на цената, бидејќи договорот на Рајс е далеку од истекување. Играчот од средниот ред е обврзан со клубот до 2027 година.

Медиумите во Англија пренесуваат дека калчолигашот Рома одреди цена од 120 милиони евра за својот голгетер Тами Абрахам.

Англискиот репрезентативец минатото лето се пресели во Рома од Челзи за 40 милиони евра и има одлична сезона со 23 гола на 37 натпревари.

Настапите на Абрахам предизвикаа интерес кај англиските клубови и некои од водечките тимови ќе се обидат да го вратат во Премиер лигата.

Рома преку одредувањето на високата цена ќе се обиде да го задржи 24-годишниот голгетер во своите редови и во наредните сезони.

Фудбалскиот клуб Бреша му врачи отказ на тренерот Филипо Инзаги. Тимот се бори за промоција во италијанската Серија А и на 7 кола пред крајот го зазема петтото место во Серија Б. Првите две екипи одат директно во Серија А, а за третото место меѓусебно ќе разигруваат екипите од третата до осмата позиција.

 Клубот преку соопштение му се заблагодари на Инзаги за сработеното и наведе дека за негов наследник ќе го назначи поранешниот играч на Бреша, Еугенио Корини.

48-годишниот поранешен италијански репрезентативец Филипо Инзаги ја презеде Бреша минатото лето, а претходно две сезони го водеше Беневенто, освојувајќи промоција во Серија А, а потоа испадна од елитата. 

Марко Асенсио во текот на летниот трансфер период дефинитивно ќе го напушти фудбалскиот состав на Реал Мадрид.

Тој има уште една година од договорот со „белите“, но, бидејќи не е задоволен од минутажата ќе побара да биде ставен на трансфер листата.Неговата вредност на пазарот се проценува меѓу 30 и 35 милиони евра.

За неговиот потпис се заинтересирани неколку екипи од Англија како и градскиот ривал, Атлетико Мадрид.