Стефано Пиоли беше презадоволен од најновата победа на „росонерите“ во Серија А. Милан синоќа со 2-1 славеше на гости кај Рома, а Пиоли вели дека овој негов тим има карактер.

„Покажавме карактер, постапивме според нашиот план и замисли. Рома е силен тим. Кога игравме 11 на 11, бевме добри, се обидувавме да постигнеме гол. Таков карактер ни треба на вакви важни натпревари. Сега доживуваме позитивен период. Треба да го возиме овој бран, да бидеме храбри и сигурни во себе. Многу сум среќен“, изјавил Пиоли.

Лионел Меси даде интервју во кое зборуваше за неговото заминување од Барселона и коментарите на претседателот на Барселона, Жоан Лапорта, дека можеше да остане на „Ноу Камп“ доколку решеше да игра бесплатно.

„ Направив се што можев за да останам во Барса. Во ниту еден момент не беше побарано од мене да играм бесплатно. 

Од клубот ме замолија да ја намалам платата за 50 проценти и јас се согласив на тоа без никакви проблеми. Бев подготвен да му помогнам на клубот. Моја и желба на моето семејство беше да останам во Барселона. 

Никој не ме замоли ниту побара од мене да играм бесплатно, и мислам дека она што го кажа претседателот Лапорта беше несоодветно. 

Неговите коментари ме повредија бидејќи мислам дека немаше потреба да го каже тоа. Тоа само создава шпекулации и ги тера луѓето да размислуваат за работи што мислам дека не ги заслужувам“, изјави Меси за шпанскиот магазин „Спорт“.

Славниот италијански стратег Антонио Конте пристигна во Лондон на завршни преговори со премиерлигашот Тотенхем за местото тренер на екипата. Досегашниот шеф на стручниот штаб на лондонскиот клуб Нуно Еспирито Санто утрово доби отказ после само 4 месеци од неговото доаѓање во Тотенхем. 

Антонио Конте на преговори во Лондон, беше повикан од спортскиот директор на Тотенхем, Фабио Паратичи, со кого е во мошне добри односи откако двајцата работеа заедно во Јувентус од 2011 до 2014 година. Во тој период Јувентус со Конте освои три последователни титули во Серија А. Очекувањата се дека на Конте ќе му биде понуден договор на една и пол година.

Клубот од Рим најверојатно ќе биде казнет од фудбалска федерација на Италија за расистичкото однесување на нивните навивачи за време на натпреварот на Олимпико против Милан, кој заврши со победа на гостите од 1:2.

Стрелец на првиот гол за Милан беше Златан Ибрахимовиќ, на кого после постигнувањето на голот навивачите на Рома му скандираја „Ти си циган“. После овие навредливи скандирања, Ибрахимовиќ во ироничен стил побара од навивачите на Рома да викаат погласно. 

После натпреварот Ибрахимовиќ даде изјава во свој стил во која вели: „Што се однесува до навредите од навивачите на Рома, тие воопшто не ми сметаат, напротив колку повеќе викаат, толку појако се чувствувам и ме полнат со адреналин“.

Во францускиот весник „Ла Паризиен“ се објави вест во која се вели дека челниците на Париз Сен Жермен ја разгледуваат можноста за раскинување на договорот со Серхио Рамос.

Шпанскиот дефанзивец, летово пристигна како големо засилување за тимот на ПСЖ, но неговото деби во дресот на екипата од Париз никако да се оствари.

Од неговото пристигнување во ПСЖ, Рамос го следат повреди кои не му дозволуваат да настапува за екипата што е фрустрирачки како за играчот така и за управата на клубот.

Од ПСЖ велат дека ќе се почека уште некој период пред да донесат конечна одлука во врска со иднината на Рамос во клубот.

Серхио Рамос пристигна во ПСЖ од мадридски Реал и потпиша договор на две години.

Џузепе Роси е еден од оние фудбалери кои повредите го спречија да го исполни својот голем потенцијал, меѓутоа тој се уште сака да игра фудбал.

Роси денес има 35 години и според италијанските медиуми екипата на СПАЛ е подготвена да му даде нова шанса. СПАЛ беше купен од американскиот бизнисмен Џо Таколина и неговите амбиции се да го врати тимот во Серија А. Според него искуството и квалитетот на Роси можат да бидат од голема корист

Џузепе Роси е дете на Парма. После банкротот во Парма во 2004 година Роси се пресели во Манчестер Јунајтед, а потоа го носеше дресот уште на Виљареал, Њукасл, Леванте, Џенова, Фиорентина, Селта…Сепак, никаде не го исполни потенцијалот кој го поседуваше.

Фудбалскиот клуб Барселона во јануари ќе се обиде да го доведе играчот на Манчестер Јунајтед Дони ван де Бек.

24-годишниот ван де Бек никако да добие шанса од тренерот Солскјер за почести настапи во дресот на Манчестер, со што станува јасно дека не е во плановите на Оле. Поради овие причини, Дони ван де Бек му наложи на својот нов менаџер да му побара клуб каде ќе биде стандарден играч.

Според информациите од медиумите во Шпанија, Барселона ќе се обиде да го добие Холанѓанецот како позајмен играч во јануарскиот преоден рок со можност за негово купување.

Според пишувањата во шпанските спортски портали, Атлетико Мадрид сериозно се подготвува за купување на Александар Лаказет од Арсенал.

„Јорганџиите“ од Мадрид веќе долго време го следат Лаказет и се подготвени да испратат официјална понуда до Арсенал во jануари.

Договорот на Французинот со Арсенал истекува на лето и тој нема намера да го продолжи и да остане на „Емирати“. Тој факт сака да го искористи Атлетико Мадрид кој ќе му понуди пред договор на Лаказет кој ќе се официјализира во текот на летото.

Александар Лаказет пристигна во Арсенал од екипата на Лион во 2017 година. Во дресот на „топџиите“ тој запиша 178 настапи со постигнати 68 голови.

Лорис Кариус е член на Ливерпул, но дресот на „црвените“ не го носел уште од финалето во Лигата на шампионите во 2018 година кога не се прослави. Германецот бранеше на позајмица во Бешикташ, а потоа и во Унион Берлин. Турците го вратија поради пропустите, а во германскиот тим минатата сезона одигра само четири натпревари.

Ова лето не успеа да пронајде нов тим, па остана во Ливерпул, но секако нема прилика да брани. Клубот донесе одлука да му излезе во пресрет и да го пушти во јануари да си замине без оштета.

На Кариус е да пронајде клуб кој сака да го ангажира и може да се пресели бесплатно.

Тренерот на Ливерпул, Јирген Клоп, има желба во летниот период да го доведе крилниот играч на Лестер, Харви Барнс во тимот од „Енфилд“.

Клоп е голем обожавател на младиот Барнс и веќе од поодамна го следи неговиот развој како играч во тимот на Лестер.

23-годишниот Англичанец дебитира за првиот тим на бившиот шампион на Премиер лигата во 2016 година, и има 111 настапи за клубот. Оваа сезона Барнс продолжува со одличните игри во дресот на популарните „лисици“, каде на 12 натпревари има постигнато 2 гола и 2 асистенции.

Харви Барнс неодамна го продолжи договорот со Лестер до 2025 година а проценетата вредност на играчот е околу 35 милиони евра.