Њукасл се обидел да го донесе тренерот на Ајакс, Ерик Тен Хаг, пренесуваат англиските медиуми. Њукасл со доаѓањето Мохамед Бин Салман стана најбогат клуб на светот и сака да направи тим со кој ќе почне да освојува трофеи.

Реконструкцијата започна од тренерот, Стив Брус доби отказ, па сега клубот бара етаблирано тренерско име.

Токму поради тоа на Ерик Тен  Хаг му бил понуден договор тежок 13 милиони евра по сезона, но Холанѓанецот ја одбил понудата.

Мохамед Салах е фудбалерот со најдобра форма во Европа и има 10 гола и 5 асистенции во Премиер лигата. Моментално Салах е многу актуелен со оглед на фактот дека неговиот договор истекува во јуни 2023 година и се уште нема постигнато договор со Ливерпул за продолжување на соработката.

Салах на лето влегува во последната година од договорот, но неговите финансиски барања се превисоки за Ливерпул, а шпанските медиуми пренесуваат дека Клоп наводно се помирил со неговото заминување.

Реал Мадрид важи како фаворит за неговиот потпис, но наводно Клоп го советува Египќанецот да избере друг клуб. Германскиот стратег го советува да потпише за друг клуб, бидејќи во Реал Мадрид нема да биде прва ѕвезда и ќе биде во сенка на Килијан Мбапе, кој извесно на лето ќе се пресели на „Сантиаго Бернабеу“.

Иако Барселона во моментов се наоѓа во тешка финансиска криза, ќе мора да се задолжи за нови 12 милиони евра кои клубот како отштета ќе треба да му ги исплати на сега бившиот тренер Роналд Куман.

Претседателот на каталонците, Жоан Лапорта го загубил трпението по поразот од Рајо Валекано и се согласи да ги зголеми долговите на Барса само да го “избрка“ холандскиот тренер од клубот.

Хасан Салихамиџиќ го коментираше катастрофалниот пораз на тимот од Минхен во натпреварот од Купот на Германија со Борусија Менхенгладбах (0-5).

„Едноставно не бевме на теренот, во ниту еден сегмент од играта. Не добивме ниту еден дуел во првото полувреме и не успеавме да се вратиме во игра. Необјасниво е. Знаеме колку е тешко да се игра во Гладбах. Но, на овој натпревар сè што можеше да тргне наопаку, тргна наопаку. Борусија одигра многу добро, несебично се вклучи во дуел еден на еден од самиот почеток на натпреварот и правилно се прилагоди на играта“, изјави Салихамиџиќ за официјалниот сајт на Баерн Минхен.

Ова секако е еден од  најтешките порази на екипата од Минхен во последните години, а тоа се случи во натпревар од Купот на Германија.

Чави Хернандез, се согласил со понудата на раководството на Барселона да стане тренер на оваа екипа, пишува „Мундо Депортиво“.

Според изворот, Чави би можел да ги започне обврските по пауза за натпреварите на репрезентациите. За тоа време, двете страни треба да решат неколку прашања. Најпрво Чави треба да го раскине актуелниот договор со Ал Сад. Второ, мора да се договори нов стручен штаб со кој ќе работи Шпанецот.

Да потсетиме, 58-годишниот холандски стручњак Роналд Куман, кој беше на чело на Барселона, беше разрешен од функцијата доцна синоќа. Тој ја презеде Барселона во август 2020 година, откако Барселона ја активираше опцијата да го откупи неговиот договор од репрезентацијата на Холандија.

Во сезоната 2020/21, каталонскиот клуб под негово водство го освои Купот на Шпанија, завршувајќи на третото место во шпанското првенство.

Фудбалскиот клуб Милан објави дека го продолжи договорот со својот дефанзивец Симон Кјаер до 2024 година. Овој потег на “росоњерите“ беше очекуван, со оглед на фактот дека постоечкиот договор на 32-годишниот Данец истекуваше на крајот од сезоната.

Симон Кјаер пристигна на Џузепе Меаца во јануари 2020 година, и многу брзо се наметна како главен столб во одбраната на тимот под водство на тренерот Стефано Пиоли. Кјаер во дресот на Милан досега има одиграно 66 натпревари во сите натпреварувања и има постигнато еден гол

Пол Погба доби суспензија од три натпревари поради исклучувањето во 9. коло од англиската Премиер лига против Ливерпул.

Така, Погба нема да може да учествува на натпреварите од Премиерлигата против Тотенхем, Манчестер Сити и Ватфорд. Во 59. минута од средбата, играчот од средниот ред на Манчестер Јунајтед, Пол Погба направи прекршок , а откако судијата Ентони Тејлор ја погледна снимката одлучи да го исклучи францускиот играч за врска.

Погба за Манчестер Јунајтед игра од 2016 година. Договорот на играчот со клубот е со важност до 2022 година.

Од фудбалскиот клуб Барселона соопштија дека Роналд Куман не е повеќе тренер на каталонскиот тим.

Претседателот на клубот, Жоан Лапорта, ја донел оваа одлука веднаш после првенствениот пораз на Барса од Рајо Валекано кој заврши со резултат 1:0.

Куман веќе се збогувал од играчите, додека Барселона е во потрага по ново тренерско име.

Тимот на Барселона под раководство на Куман, оваа сезона забележа 5 победи, 5 порази и три нерешени резултати. Холанѓанецот ја остава Барса на 9-то место во шпанското првенство, со вкупно освоени 15 бода. Во лигата на шампиони од одиграни 3 натпревари имаат два порази.

Роналд Куман пристигна во Барселона во август 2020 и со екипата го освои само шпанскиот Kуп.

Играчот за врска на Баерн Минхен, Томас Милер собра сили и им се извини на навивачите по срамниот пораз во Купот на Германија од екипата на Борусија Менхенгладбах кој заврши со резултат 5:0.

Баварците испаѓаат од германскиот Куп втора година по ред, и тоа многу рано , во второто коло од натпреварувањето. 

„Во текот на натпреварот не најдовме начин како да го стартуваме погонскиот мотор на Баерн. Можеме само да им се извиниме на нашите навивачи и да им честитаме на Борусија Менхенгладбах на победата. Можам да истакнам дека со исклучок на гоманот Ноер, сите останати одигравме катастрофално слаб натпревар. Никогаш не сум доживеал вакво нешто. „Тешко е да разбереме.Сега мора да заборавиме што се случи, одиме напред во следниот натпревар“, изјави Томас Милер после натпреварот.

Фернандо Љоренте потпиша договор со Еибар. За тоа информира официјалниот сајт на клубот. Пред некој ден двете страни постигнаа договор за трансфер.

36-годишниот фудбалер се приклучи на Еибар како слободен играч. Неговиот претходен клуб беше италијанскиот Удинезе. Неговата сегашна екипа игра во шпанската втора лига. Минатата сезона напаѓачот одигра 17 натпревари во Серија А за Удинезе и постигна еден гол. Во текот на својата играчка кариера, Фернандо Љоренте играше за Наполи, Тотенхем, Свонси, Севиља, Јувентус, Атлетик Билбао.

Фудбалерот беше дел од репрезентацијата на Шпанија од 2008 до 2013 година, а сега како ветеран ќе игра во втората лига на Шпанија.