Фудбалерот на Манчестер Јунајтед Мејсон Гринвуд е уапсен, што го потврди и полицијата на Манчестер.

Локалната полиција соопшти дека Гринвуд останува во притвор поради дополнително испитување.

Истрагата против него е во тек, откако е обвинет дека ја силувал и брутално ја претепал својата девојка.

Гринвуд оваа сезона одигра 23 натпревари за „црвените ѓаволи“ на кои постигна шест гола.

Екипата на Париз Сен Жермен е во финални преговори со Барселона за доведување на Усман Дембеле.

ПСЖ планира трансферот да го реализира во овој преоден рок и веќе има информации дека договорот е при самиот крај.

Голем интерес за Дембеле покажуваа и англиските премиерлигаши Челзи и Манчестер Јунајтед но по се изгледа младиот напаѓач се враќа во својата татковина и ќе заигра во тимот од Париз.

Челниците на фудбалскиот клуб Евертон за нов тренер на екипата го назначија Френк Лампард. Според информациите, Лампард ќе ги води популарните „карамели“ во наредните 2,5 години.

За поранешниот англиски репрезентативец ова ќе биде второ тренерско искуство во водење клуб од Премиер лигата, после неговиот 18 месечен престој на клупата на Челзи.

Претходно Лампард беше тренер и во англискиот Чемпионшип каде ја водеше екипата на Дерби Каунти.

Екипата на Барселона е блиску до договор за ангажман на напаѓачот на Арсенал, Пјер-Емерик Обамејанг.

Преговорите за доаѓање на Обамејанг ги одложува само износот на платата која ќе ја добива играчот а изнесува 350 илјади фунти неделно.

Барселона предлага да го доведе играчот на позајмица од Арсенал до крајот на сезоната, но тие нема да имаат обврска за целосен откуп на неговиот договор по истекот на првенството.

32-годишниот репрезентативец на Габон е во лоши односи со тренерот на Арсенал, Микел Артета кој поради недисциплина го исфрли од првиот тим и му ја одзеде капитенската лента.

Кристијан Ериксен и официјално се врати во Премиер лигата и потпиша шестмесечен договор со екипата на Брентфорд.

Данскиот репрезентативец последниов период тренираше со екипата на Ајакс со цел да влезе во посакуваната форма пред неговиот нов ангажман. Тој претходно неколку сезони доста успешно го носеше дресот на Тотенхем по што ја промени средината и заигра во Италија за екипата на Интер.

29-годишниот фудбалер успешно ги помина сите медицински тестови после неговиот здравствен проблем од Европското првенство.

Во договорот на Ериксен со Брентфорд има и опција за продолжување за уште една сезона.

Македонскиот фудбалски репрезентативец, Александар Трајковски направи трансфер во клубот Ал-Фаја кој се натпреварува во првата лига на Саудијска Арабија. Трајковски со овој трансфер ќе биде вториот македонски репрезентативец во оваа лига и ќе му прави друштво на Алиоски кој настапува во тимот на Ал-Ахли.

Александар Трајковски досега настапуваше за екипата на Алборг од Данска каде беше на позајмица од Мајорка. Клубот Ал-Фаја за ангажманот на нашиот репрезентативец ќе плати околу 1,5 милиони евра.

Тотенхем и Јувентус се во завршни преговори за трансфер на Кулушенски и Бентанкур во лондонскиот тим.

Кулушевски ќе замине во Премиерлигата на позајмица од 5 милиони евра со обврска за купување за 35 милиони евра доколку лондонскиот клуб се квалификува за Лигата на шампионите, тврди „Скај Италија“.

Јувентус ќе заработи 10 милиони евра повеќе од сумата која ја дадоа на Аталанта во јануари 2020 година, и покрај тоа што Кулушевски не ги оправда очекувањата во Торино.

Блиску до трансфер во тимот на Конте е и Родриго Бентанкур, исто така на позајмица со право на откуп, а сумата на целиот трансфер ќе изнесува 28 милиони евра.

Премиерлигашите Њукасл и Брајтон постигнаа договор за трансфер на дефанзивецот на Ден Брн.

Популарните „чавки“ ќе платат 13 милиони фунти за играчот од одбраната на Брајтон кој е ќе биде партнер на Џамал Ласел во дефанзивната линија.

Тренерот на Њукасл, Еди Хау, се одлучи за ангажман на Брн, после неуспешните обиди за купување на Ботман од Лил и Диего Карлос од Севиља.

Играчот од средниот ред на Арсенал, Гранит Џака нема да го напушти англискиот тим во преостанатите денови од зимскиот преоден рок. Ова го објави новинарот Фабрицио Романо на Твитер.

Тренерот на Рома, Жозе Мурињо е голем љубител на играта на швајцарскиот играч за врска и сакаше Џака да му се приклучи на неговиот тим во летото 2021 година. Сепак, клубовите во моментов не се во преговори за реализирање на ваков трансфер. Џака (29) му се приклучи на лондонскиот клуб во летото 2016 година.

Играчот од средниот ред имаше една асистенција на 10 натпревари во Премиер лигата оваа сезона. Договорот на Џака истекува во 2024 година.

Екипата на Ливерпул и официјално го потврди доведувањето на ѕвездата на Порто, Луис Дијаз. Колумбискиот репрезентативец потпиша договор со тимот од Енфилд до 2027 година. 

Ливерпул за целосниот трансфер, на клубот Порто ќе исплати вкупно 45 милиони евра плус 15 милиони во бонуси.

Дијаз му се приклучи на Ливерпул по две и пол сезони во Порто, каде одигра 125 натпревари и постигна 41 гол.