Претседателот на УЕФА Александар Чеферин изјави дека не постои причина Белорусија да биде исфрлена од квалификациите за Европското првенство во 2024. година, како што тоа беше сторено со Русија.

Министерката за внатрешни работи на Германија неодамна испратила писмо до УЕФА со кое бара Белорусија како сојузник на Русија во војната која се води во Украина, да биде исклучена од меѓународните натпреварувања.

„Ова барање за исклучување на Белорусија делува популистички. Во овој момент не гледаме причина за такво нешто. Ако состојбите се променат тогаш сигурно ќе реагираме. Политичарите би требало да го почитуваат нашето право на одлучување“, изјавил Чеферин за Спорт Билд.

Македонската фудбалска репрезентација на 13 октомври 1993 година го имаше дебито, и тоа на пријателски меч со Словенија во Крањ, кога триумфираа со 4-1.
Селекторот Андон Дончевски ги предводеше фудбалерите до убедлив триумф од 4-1, а првиот гол беше дело на Зоран Бошковски – Чоко.
Во листата на стрелци за Македонија се запишаа и Дарко Панчев, Чедомир Јаневски и Драги Канатларовски.

Шпанските медиуми пренесуваат дека фудбалерот на Реал и германски репрезентативец Антонио Рудигер најверојатно ќе го пропушти Ел класико дуелот со Барселона.

Рудигер се повреди на натпреварот од Лигата на шампионите против Шахтјор кој се одигра во Варшава. Тој постигна гол за изедначување во 95.минута од дуелот, при што доби удар со лакт во главата од противничкиот голман. Германецот после ударот го напушти теренот и беше забележливо обилно крварење.

Според информациите, лекарскиот тим на Реал Мадрид му препорачал на Рудигер неколку дневно мирување поради што би можел да го пропушти „Ел класико“ дуелот со Барселона кој се игра на 16.октомври во Мадрид.

Хари Кејн е еден од најдобрите светски напаѓачи, а како таков дефинитивно е интересен за Баерн Минхен кој во летниот преоден рок остана без Роберт Левандовски и притоа не донесе соодветна замена за таа позиција.

Медиумите сметаат дека „баварците“ ќе ја искористат шансата ако можат да дојдат до потписот на членот на Тотенхем кој има договор до 30 јуни 2024 година. Секако многу ќе зависи од тоа што „петлите“ ќе направат во оваа кампања, па барем засега Кејн останува фокусиран на Тотенхем иако признава дека бундеслигашот е голем клуб.

„Фокусиран сум на Тотенхем и се обидувам да дадам се од себе за нас. Баерн е врвен, топ клуб – но целата моја концентрација е на Тотенхем и се обидувам да победам утре вечер“, порача Хари кој со колегите ќе се соочи против Ајнтрахт Франкфурт.

Екипата на Лестер е заинтересирана за фудбалерот од средниот ред на Манчестер Јунајтед, Дони ван де Бек.

25-годишниот Холанѓанец останува во континуитет на клупата а тоа сакаат да го искористат „лисиците“ и да го ангажираат во текот на зимскиот преоден рок. Тренерот,  Брендон Роџерс, не крие дека сака да го ангажира ВанДе Бек и дека е подготвен да им понуди на „црвените ѓаволи“  15 милиони евра. 

Играчот од средниот ред беше купен од Ајакс во 2020 година за големи 40 милиони евра.

Весникот „Билд“ наведува дека луѓето од Челзи остануваат на идејата да го ангажираат фудбалерот на Баерн Минхен, Бенџамин Павард.

Лондончани се обидоа да дојдат до потписот на  Французинот во текот на летото но, не успеаја да се договорат со колегите од Германија. Договорот на Павар истекува во 2024 година.

26-годишниот дефанзивец беше купен од Штутгарт за 35 милиони евра во 2019 година. Павар во сезонава има 11 настапи и 2 гола.

Француските медиуми пренесуваат дека наводно челниците на Париз Сен Жермен во летниот преоден рок сакале да го продадат францускиот репрезентативец Килијан Мбапе за 400 милиони евра.

Според пишувањата, адвокати и менаџери на Мбапе за време на летото преговарале со водечките луѓе на ПСЖ. Разделбата била договорена, но францускиот клуб барал обештетување од 400 милиони евра, а во исто време клубот ја одбил можноста играчот да биде продаден во Реал Мадрид. Во еден момент се јавила и можноста Мбапе да ја продолжи кариерата во Ливерпул, меѓутоа Французинот бил советуван од соработниците да остане во редовите на ПСЖ. Мбапе својот договор со клубот од Париз го продолжи до 2025.година.

Француските медиуми тврдат дека Мбапе нема намера да остане во ПСЖ и планира да го напушти клубот во јануари. Тој имал мислење дека е жртва на лажни ветувања и притисоци од клубот.

Екипата на Ливерпул вчера славеше кај Глазгов Ренџерс со фантастични 7-1 а мечот го одбележа напаѓачот на „црвените“, Мохамед Салах, кој влезе во историјата на Лигата на шампионите.

Репрезентативецот на Египет влезе во 68. минута и во периодот од 76-та до 82-та или за точно шест минути и 12 секунди го постигна најбрзиот хет-трик во елитата на Европа.

Претходниот рекорд го држеше Гомис кој во 2011 година за осум минути му даде три гола на Динамо Загреб (7-1).

Шпанскиот фудбалски тренер Хулен Лопетеги ја одби понудата за водење на премиерлигашот Вулверхемптон. Според информациите од медиумите Лопетеги понудата ја одбил поради семејни причини.

Шпанскиот стручњак кој минатата недела доби отказ од Севиља, беше главен кандидат за нов тренер на популарните „волци“. Скај Спортс пренесува дека извршниот директор на англискиот клуб водел интензивни преговори со Лопетеги во Шпанија, како и со неговиот претставник Жорж Мендеш.

Вулверхемптон после девет одиграни натпревари во Премиер лигата се наоѓа на 18.место со шест бода и само три постигнати гола.

Голманот на Манчестер јунајтед, Давид де Хеа изјави дека нема намера да го напушти клубот.     

„Сакам да останам во Манчестер јунајтед многу години. Ајде да видиме што ќе се случи во иднина. Среќен сум во клубот“, изјави голманот за „БТ Спорт“. 

Де Хеа му се приклучи на Манчестер јунајтед од Атлетико Мадрид во јули 2011 година. Актуелниот договор на 31-годишниот Шпанец со англискиот клуб е со важност до крајот на јуни 2023 година. Во сезоната 2022/23, голманот прими 18 гола на 11 натпревари за Манчестер јунајтед, а на три средби ја зачува мрежата „сува“.