Фудбалскиот клуб Џенова, за кој настапува и нашиот поранешен репрезентативец Горан Пандев, за нов тренер на екипата го назначи Германецот Александер Блесин.

48-годишниот Блесин, во тимот од Серија А, пристигна од белгискиот Остенде. Претходно тој беше тренер во младинските категории на Лајпциг.

Џенова остана без тренер после отказот кој му го врачи на Андриј Шевченко кој не успеа да постигне позитивни резултати со екипата која се бори за опстанок во лигата.

Договорот помеѓу Џенова и новиот тренер Александер Блесин е со важност до 2024 година.

Цените на билетите за Светското првенство во Катар се и до 46 % повисоки од оние за претходниот Мундијал во Русија, објавија светските агенции. Единствено пониски се цените на некои влезници од натпреварите во групната фаза на турнирот, за кои навивачите можат да се пријават преку Интернет.

Најскапите билети во продажба се за финалето на 18 декември. Тие чинат 5.850 катарски ријали, што е еквивалентно на 1.607 долари, 46 отсто повеќе од 1.100-те долари што требаше да платат навивачите за да го гледаат финалето на шампионатот во 2018 година во живо. Билетите за втора класа чинат 1.003 долари, што е за 41 отсто повеќе од пред четири години. Оние од третата категорија се околу 604 долари, една третина поскапи од претходниот шампионат.

Најниска цена имаат билети кои се во продажба по цена од 302 долари, во споредба со 220 долари кои беа на претходното СП. За граѓаните на Катар има и поевтини билети во вредност од 40 ријали или околу 11 долари. Навивачите сега можат да се пријават на лотаријата за да купат билети за Светското првенство.

После комплетирањето на првата фаза од Европското првенство во ракомет, се дозна и конечниот пласман на нашата репрезентација.

Македонија првенството го заврши на 22-то место,со 0 бодови и 3 порази, што претставува најлош пласман на нашата ракометна репрезентација на Европските првенства досега. 

Поради својот лош пласман на турнирот, нашата селекција нема да биде носител при ждрепката за Светското првенство во 2023 година и своето учество ќе го бара со играње на две бараж средби.

Шпанските медиуми ја пренесуваат веста дека екипата на Реал Сосиедад е силно заинтересирана за доведување во своите редови на Енис Барди.

Македонскиот репрезентативец и член на Леванте, со своите одлични игри го привлече вниманието на екипата од Баскија, која ќе проба да го ангажира Барди во летниот трансфер период.

Реал Сосиедад е само еден од клубовите кои покажуваат интерес за играчот од средината на теренот, кој повеќе од сигурно е дека на крајот од сезоната ќе го напушти Леванте доколку клубот се пресели во втората лига и ќе бара нов предизвик во посилен тим.

Фудбалскиот репрезентативец на Македонија, Висар Муслиу е нов член Инголштад, екипа која се натпреварува во втората германска лига.

Дефанзивецот Муслиу, во тимот од Германија пристигна после неговиот престој во унгарскиот МОЛ Фехервар каде беше член од 2019 година и забележа 60 настапи и постигна два гола.

„Среќен сум што потпишав за Инголштад. Чувството кога играш фудбал во Германија е посебно, а моите првите впечатоци тука се позитивни. Можам да ветам дека ќе го дадам максимумот од себе за да му помогнам на клубот во остварување на зацртаните цели“, изјави Муслиу при презентацијата во новиот клуб.

Екипата на Инголштад се наоѓа на последното место од табелата во втората Бундеслига, и до крајот го очекува тешка битка за опстанок.

Француските медиуми пренесуваат дека претставници на фудбалскиот клуб Париз Сен Жермен, оствариле нова средба со легендата Зинедин Зидан.

Според пишувањата, поранешниот тренер на Реал Мадрид добил уверување дека тој ќе биде нов тренер на ПСЖ во текот на летото.

Сегашниот тренер на екипата Маурицио Почетино по се изгледа дека ќе се врати во Премиер лигата и ќе ја прифати понудата од Манчестер Јунајтед.

Зидан кој моментално е без ангажман, ја напушти клупата на Реал Мадрид во летото 2021 година по 11 освоени трофеи.

Тимо Вернер е свесен за својата слаба голтерска форма во овој момент и вети дека ќе даде 100% од своите можности за да се поправи.

Германецот во Челзи стигна пред две лета како големо засилување од Лајпциг, но впечаток е дека од него повеќе се очекуваше. Ја освои Лигата на шампионите во својата прва сезона, но во актуелната сезона, посебно во Премиер лигата не блеска и тоа предизвика бројни критики, но Вернер има и поддршка од навивачите.

„Понекогаш се прашувам зошто воопшто ме поддржуваат толку. Напаѓач сум и сакам да постигнувам голови, но јас промашувам шанси. Двам се од себе на секој натпревар за екипата да оставарува добри резултати“, изјави Вернер.

Сезонава Вернер во Премиер лигата постигна само еден гол, а вкупно во сите натпреварувања има шест.

Tимот кој е најсериозен кандидат за преселба во Серија Б, Салернитана е последниот во низата клубови со кои се поврзува Илија Несторовски во овој преоден рок.

Дел од медиумите во Италија пренесуваат дека Салернитана во Несторовски гледа засилување во нападот со цел да се подобри нивниот очаен голгетерски ефект во досегашниот дел од сезоната. Сезонава Салернитана постигна само 13 голови.

Од друга страна Несторовски и во втор план во Удинезе и скоро и да не добива шанса после враќањето од тешката повреда. Несторовски во октомври се врати на терените после паузата од седум месеци и со оглед на тоа каков статус има во овој момент во Удинезе потребна му е промена.

Во претходниот период македонскиот напаѓач се поврзуваше со екипи како Виченца, Монца, Лече и Кротоне.

Репрезентативецот на Босна и Херцеговина, Сеад Колашинац е нов член на Олимпик Марсеј.

Колашинац во Марсеј пристигна како слободен играч од лондонски Арсенал и потпиша договор со важност до јуни 2023 година.

Веста за доаѓањето на новиот играч, клубот од Франција ја објави на социјалните мрежи каде истакнува декаКолашинац со својата енергија, сила и професионализам ќе му помогне на тимот во реализацијата на своите идни цели.

Лоши вести пристигнуваат за тимот на Реал Мадрид.

Имено, Марко Асенсио поради повреда на мускулот на левата нога ќе биде надвор од терените во наредните три недели. Асенсио сигурно ќе ги пропушти наредните два натпревари.

За Асенсио следува еден мини рехабилитационен период после кој ќе се знае колку е спосбен за настап.

Ќе потсетиме, Реал Мадрид изминатиот викенд го освои Суперкупот на Шпанија.