Меѓународната фудбалска федерација – ФИФА, ја одби жалбата на Чиле, во која федерацијата на оваа земја бараше да учествува на претстојниот Мундијал во Катар, на местото од Еквадор.

ФИФА го отфрли аргументот на Чиле дека играчот на Еквадор Бајрон Кастиљо е роден во Колумбија и дека немал право на настап за Еквадор на натпреварите од квалификациите на СП.

ФИФА во соопштението вели дека на основа на доставените документи, жалбените судии на федерацијата сметаат дека играчот Бајрон Кастиљо има трајно државјанство на Еквадор и дека целата процедура е во склад со правните статути на таа земја.

Со оваа одлука се потврдува учеството на Еквадор на СП во Катар каде ќе игра во групата А заедно со Катар, Холандија и Сенегал.

Грчки Олимпијакос синоќа му врачи отказ на тренерот Карлос Корберан. Засега не се познати причините за раскинувањето на договорот. Корберан ја презеде функцијата на 1 август и по неполни два месеци веќе заминува од функцијата. Под негово водство тимот одигра 11 натпревари во сите натпреварувања, на кои забележа четири победи, четири пати ремизираше и претрпе три порази.

Викендов Олимпијакос загуби од Арис во натпреварот од грчкото првенство со резултат 2-1 и веројатно тоа беше иницијална каписла за управата да ја прекине соработката со него.

Во моментов, Олимпијакос е на шестото место во грчкиот шампионат со осум бодови. Корберан претходно беше главен тренер на англиски Хадерсфилд.

Шпанскиот спортски весник АС пренесува дека УЕФА ја разгледува можноста едно од наредните финалиња од Лигата на шампионите да биде одиграно во Соединетите Американски Држави.

Весникот потсетува дека Светското првенство во 2026.година ќе се одржува во САД, Канада и Мексико, а УЕФА сака да го прошири фудбалскиот пазар со цел да ги намали несогласувањата со големите клубови.

Здружението на европските клубови смета дека проширувањето на фудбалскиот пазар ќе допринесе во порастот на приходите од продажба, спонзори и ТВ права. 

„АС“ наведува дека УЕФА добила понуда од САД за одигрување на финале од Лигата на шампионите на нејзина територија. Претседателот на УЕФА, Чеферин, сеуште се нема изјаснето околу овај предлог, а најверојатно за оваа тема ќе се расправа на генералното собрание на УЕФА во Истанбул.

Манчестер Јунајтед во текот на летниот преоден рок беше еден од најактивните клубови на трансфер пазарот.

Тен Хаг почна да прави реконструкција на тимот, а на „Олд Трафорд“ летово пристигнаа Касемиро, Ериксен, Мартинез и Антони. Сепак, тоа нема да биде крајот на засилувања за премиерлигашот, па така раководството планира да потроши уште 100 милиони евра во јануари.

Тен Хаг ќе добие 100 милиони евра за трансфери, а веќе направил листа на потенцијални засилувања.

Холандскиот стратег планира да ги троши парите на десен бек, играч за врска и напаѓач, но засега не се споменуваат имиња на фудбалери кои може да го засилат гигантот од Манчестер.

Македонската репрезентација денеска ги започнува подготовките за двата последни два натпревари од групата 3 во Лига на нации против Грузија (Тбилиси, 23 септември) и Бугарија (Скопје, 26 септември).

Поради повреда веќе е познато дека Дарко Чурлинов нема да биде во составот на селекцијата за двете пресметки, но дополнителни проблеми за селекторот на нашата најдобра репрезентација, Благоја Милевски се новите две откажувања поради повреда. Капитенот Стефан Ристовски (повреда на тетивата) и напаѓачот Ваљон Етеми (повреда на бутниот мускул),  исто така нема да можат да се стават на располагање за мечевите против Грузија и Бугарија.

Нашиот стручен штаб подоцна во текот на денот ќе соопшти за дополнителен повик во репрезентацијата.

Македонската репрезентација денес во 17:30 на тренинг центарот „Петар Милошевски“ го има првиот тренинг од подготовките.

Италијанскиот стручњак Роберто Де Зерби е нов менаџер на Брајтон. Тој седнува на кормилото на тимот кое беше испразнето по заминувањето на Грем Потер на клупата на Челзи.

Претходно беше објавено дека англискиот клуб е во преговори со неколку тренери, но решил да му ја даде довербата на екс-тренерот на Шахтјор Доњецк.

43-годишниот Де Зерби беше тренер на италијански Сасуоло од јули 2018 до мај 2021 година. Потоа седна на клупата на Шахтјор Доњецк, со кого го освои Суперкупот на Украина.

Матијас Погба добил притвор заедно со уште неколку членови на групата која го уценувала и се обидела да му изнуди пари на неговиот помлад брат Пол.

Обвинителството во Париз официјално поднесе обвинение за изнуда и криминален заговор против Матиас и остатокот од групата, која се состои од лица на возраст од 27 до 36 години.

„Ќе ја обжалиме оваа одлука. Мојот клиент нема врски со криминална организација. Не ја разбираме одлуката на судот да го држи во притвор, особено затоа што тој има алиби за ноќта на наводното киднапирање“, изјави адвокатот на Матиас, Јасин Бузру.

Според истрагата, киднапирањето се случило на 20 март кога група криминалци упаднале во станот на Матиас во Париз, го држеле како заложник, а потоа побарале пари од неговиот брат, кој во тој момент бил во Торино.

Фудбалерот од средниот ред на Манчестер Сити, Кевин Де Брујне се израмни со фудбалерот на Ливерпул и легенда на оваа екипа  Стивен Џерард по бројот на асистенции во натпреварите од шампионатот на Англија.

Белгиецот вчера, на натпреварот од 8. коло од Премиер лигата со Вулверхемптон (3-0) успеа да дојде до ова достигнување.

31-годишниот играч од средниот ред им асистираше на соиграчите во два од трите гола. Де Брујне во кариерата има 92 асистенции во англиската Премиер лига. Белгискиот репрезентативец по овој показател се израмни со легендата на Ливерпул, Стивен Џерард. За одбележување е тоа што на Кевин му беа потребни 287 натпревари за да го направи сето ова, а на поранешниот фудбалер на „црвените“  – 504 натпревари.

Лидер по бројот на асистенции во историјата на првенствата на Англија е поранешниот играч од средниот ред на Манчестер Јунајтед, Рајан Гигс. Во кариерата има 162 асистенции во Премиер лигата.

Фудбалерот на Борусија Дортмунд Марко Ројс ќе отсуствува од фудбалските терени три до четири недели, соопштува спортскиот директор на клубот, Себастијан Кел.

Капитенот на екипата од Дортмунд доживеа повреда на дерби натпреварот против Шалке и беше заменет во 32.минута. Борусија славеше на дуелот со 1:0.

Борусија Дортмунд го зазема второто место од табелата во Бундеслигата со 15 бода.

Фудбалерот на Арсенал Итан Нванери е најмладиот играч кој одиграл натпревар во Премиер лигата.

Нванери дебитира за екипата на Арсенал на натпреварот против Брентфорд во осмото коло од Премиер лигата на возраст од 15 години и 181 ден. Тој влезе во игра во 92.минута од средбата. Фудбалерот на Арсенал го собори рекордот на Харви Елиот кој дебитира во Премиер лигата со 16 години и 30 дена.

Арсенал славеше победа над Брентфорд со 3:0 и се наоѓа на првото место од табелата со 18 бодови.