Роналдо, се обиде да прогнозира за претстојната сезона во Лигата на фудбалските шампиони. Тој верува дека ПСЖ со ангажманот на Меси, се наметнува како фаворит број еден за освојување на пехарот.

„Прерано е да се каже кој ќе ја освои Лигата на шампионите. Сликата ќе започне да се формира во 1/4 финалната фаза. ПСЖ е во преден план, многу фактори влијаат на исходот на теренот. Играв речиси пет сезони во Реал Мадрид во тимот наречен –„ Галактикоси“, но, никогаш не ја освоив Лигата на шампионите. Победите никогаш не доаѓаат автоматски, дури и ако ги имате најдобрите играчи во вашиот состав“, искоментира легендарниот фудбалер од Бразил.

Арон Рамзи, одбил неколку понуди во текот на летото, бидејќи сакал да остане во Торино.

Клубот сакаше да се раздели со него и бараше купувачи, а неколку тимови од Англија покажаа интерес, но играчот ги одбил овие опции. 30-годишниот Рамзи има договор со Јувентус уште две години. Тој сака да се бори за стартно место во тимот на Масимилијано Алегри и затоа неговиот агент ги одби сите понуди летото.

Репрезентативецот на Велс започна како стартер во првиот натпревар на „бјанконерите“ оваа сезона против Удинезе (2-2). После тоа, сепак, тој доби уште една повреда и паузираше во второто коло.

Бобан Николов ќе биде во тимот на Македонија за утрешната средба со Романијa. Играчот од средниот ред тренираше индивидуално, пред подготовките беше позитивен на КОВИД и не беше во тимот за дуелите со Ерменија и Исланд.

Ова е добра вест за Благоја Милевски, бидејќи Николов играше во Романија во академијата на Хаџи и Виторул, па добро го познава менталитетот на романскиот фудбал.

Дуелот меѓу Македонија и Романија кој е од исклучително значење за двете селекции се игра утре, а почетокот е закажан за 20.45 часот.

Тотенхем ќе ги казни Аргентинците Џовани Ло Селсо и Кристијан Ромеро, како и Колумбиецот Давинсон Санчез по нивното враќање од репрезентативните настапи.

Претходно беше објавено дека клубовите од англиската Премиер лига одлучија да не ги пуштаат играчите на септемвриските натпревари на националните тимови, кои ќе се одржат во земјите вклучени во „црвената листа“ на британската влада. Ова ги вклучува сите земји во Јужна Америка.

И покрај ова, играчите на Тотенхем одлучија да играат за своите репрезентации. Тие планираа да го прескокнат само третиот квалификациски натпревар за СП – 2022 година во септември и да се вратат во Обединетото Кралство преку Хрватска за да избегнат карантин.

Јувентус од продажбата на Кристијано Роналдо во Манчестер Јунајтед ќе добие само три милиони евра годинава, објави новинарот Фабрицио Романо.

Роналдо премина во Јунајтед за 15 милиони евра, а Јувентус ќе може да очекува и додатни финансии преку бонуси. Сепак, италијанскиот великан на исплатата на целиот износ ќе чека дури пет години, а ова лето од продажбата на еден од најдобрите играчи на сите времиња доби само три милиони евра.

Бонусите кои се поврзани со трансферот се веројатно врзани за евентуални успеси на Јунајтед и Роналдо, а се претпоставува дека англискиот клуб тешко ќе го оствари тој бонус кој на Јувентус му гарантира заработка од три милиони евра.

Португалецот во 2018. година во Јувентус пристигна за 108 милиони евра, а годишно заработуваше 31 милион евра.

Серхио Агуеро летово премина како слободен играч во Барселона. Имаше долго нагодување за тоа дали каталонскиот клуб ќе може да го регистрира, со оглед на проблемите со финансискиот фер -плеј. Благодарение на неколку соиграчи кои се откажаа од дел од платата, „Блауграна“ сепак го регистрираше Аргентинскиот напаѓач.

Сепак, неговите хронични проблеми со повредите, кои започнаа во Манчестер Сити, продолжија и во новиот клуб.

Шпанските медиуми шпекулираат со времето што ќе му треба за да се опорави, но се чини дека речиси сигурно нема да го видиме на теренот во септември.

Агуеро откри дека забележал голема разлика помеѓу Сити и Барселона.

„Доаѓавме во Сити час и половина пред тренинг, но сите доаѓаат тука триесет минути порано. Се обидов да дојдам барем еден час порано за да вежбам во теретана, но таму немаше никој. Се беше затворено, не можам да го разберам тоа.“ – рече Аргентинскиот напаѓач.

На социјалните мрежи се шири видео од можеби еден од најнеобичните голови сезонава.

На натпревар од чилеанскиот нисколигашки фудбал на теренот влета куче, но никој не го забележа. Играчот изведе слободен удар и ја префрли одбраната, а кучето „одлично втрча“, со грбот ја промени насоката по која се движеше топката и го измами голманот.

Збунетиот судија не знаеше како да реагира, но набрзо го поништи погодокот, на разочарување на гледачите.

Македонската репрезентација до 21 година денеска (16:00 часот) на стадионот “Билјанини извори” во Охрид ќе одигра натпревар против соодветната селекција на Србија во рамки на квалификациите за пласман на ЕП 2023 во Романија и Грузија.

Предводникот на нашата репрезентација, Драги Канатларовски вели дека е извлечена голема поука од натпреварот со Франција кој го загубивме со 3:0 во Ле Ман. 

– Максимално сме фокусирани на дуелот со Србија. Момците се подготвени, работевме напорно овие неколку денови во Охрид, со цел подобро да огиграме на овој меч со Србија. Извлековме голема поука од натпреварот со Франција. Нема да ги повториме истите грешки. Фудбалерите се свесни дека одигравме лош натпревар и оттаму желбата за докажување на денешниот меч е голема. 

Дуелот со Србија ќе биде многу поразличен од нашиот прв со Франција во овие квалификации. Атмосферата е одлична и се надевам дека ќе ја израдуваме фудбалската јавност, изјави селекторот Канатларовски.

Во нашата Х група, покрај дуелот Македонија – Србија, играат уште и репрезентациите на Украина и Ерменија.

Марио Геце го продолжи договорот со ПСВ до 2024 година. Геце своевремено важеше за еден од најголемите таленти во Европа кога настапуваше за Борусија Дортмунд.

Направи трансфер во Баерн Минхен, но неговата кариера во Бундеслигата во последните години одеше во надолна линија

Германецот ја поврати формата во ПСВ каде се чуствува одлично и одлучи да ја продолжи соработката со холандскиот клуб.

„Многу сум среќен, ПСВ е голем клуб. Овде можам да работам под одлични услови и среќен сум што кариерата ќе ја продолжам во овој клуб“, изјави Геце.

Екипата на Шкупи го презентираше најновото засилување во името на Владица Брдаровски.

Брдаровски доаѓа во Шкупи од редовите на косовскиот тим ФК Дрита, каде минатата сезона забележа 22 настапи. Тој на 22 години дебитираше во дресот на репрезентацијата на Македонија.

„По една година се враќам во првата фудбалска лига и морам да кажам дека сум многу среќен. По многу разговори, успеавме да потпишеме едногодишен договор, бидејќи моите и амбициите на клубот се големи и заедно ќе се бориме за титулата и други успеси“, вели Брдаровски на промоцијата.

Екипата на Шкупи ова лето донесе голем број на нови фудбалери, а Брдаровски е најновиот член на тимот од Чаир кој претендира борба за шампионскиот наслов.