Угледниот „Скај Спортс“ пренесува дека напаѓачот на Манчестер Јунајтед, Ентони Марсијал, остатокот на сезоната ќе ја продолжи како позајмен играч во Севиља.

26-годишниот француски репрезентативец ги договорил личните услови со екипата од Ла Лига и се очекува двата клуба да го финализираат трансферот.

Според последните информации, Марсијал ќе биде позајмен но без опција за откуп крајот од сезоната, а Севиља ќе му ја исплати целата плата до неговиот престој во клубот.

Французинот своевремено беше најскап фудбалски тинејџер на светот откако во 2015 година Манчестер Јунајтед го доведе од Монако. До сега тој во тимот од Олд Трафорд постигна 79 гола на 269 натпревари.

Екипата на Тотенхем ќе се обиде да го доведе Џорџињо Вајналдум кој сега настапува за екипата на Париз Сен Жермен,и не е задоволен од неговиот статус на резерва во тимот.

Тимот од Лондон планира да достави понуда за размена на играчи, со која Танги Ндомбеле би заминал за Париз а Вајналдум во Тотенхем.

За оваа потенцијална трампа веќе има позитивни реакции во ПСЖ и се очекува истата да се реализира.

Ветеранот меѓу стативите, Џанлуиџи Буфон кој наскоро ќе го прослави својот 44-роденден не размислува за ставање крај на играчката кариера.

Медиумите од Италија пренесуваат дека поранешниот голман на италијанската репрезентација, по завршувањето на сезоната, ќе ја напушти екипата на Парма и ќе се обиде да заигра во клуб надвор од Италија.

Тоа би била последна фудбалска авантура пред неговото завршување со бранењето. Некои информации говорат дека тој би заминал во американската лига која би била идеален предизвик во неговата блиска иднина.

Златан Ибрахимовиќ откри дека имал разговор со Килијан Мбапе за иднината на Французинот. Според напаѓачот на Милан, Мбапе, мора да го напушти Пари Сен Жермен за да се развие како играч.

„Зависи од тоа што сака и што мисли. Јас би отишол во Реал Мадрид, но ако сум тренер на ПСЖ, ќе се обидам да го задржам. Само тој одлучува. Ме праша Мбапе и му реков: „Да бев ти, јас би одел во Реал“. Играв во различни земји и така се развивав. Ако седиш на едно место, полесно е. Ако одиш кај други луѓе, тоа е авантура“, изјави Ибрахимовиќ во интервју за „Екип“.

Златан ја коментираше и ситуацијата на Џанлуиџи Донарума во ПСЖ: „Изненаден сум што Донарума не е стартер во ПСЖ. Знам дека Почетино не е лесен. Не го познавам Навас, но и тој е одличен голман. Имаат двајца феномени на голот. Но, во мојот свет, Џанлуиџи е број еден. Без сомнение. Играв со него и знам за што зборувам“.

Швеѓанецот зборува и за тоа како се чувствува на негова возраст: „Обично, кога имаш 40 години, си дома, палиш пура и се навраќаш на кариерата што си ја имал. Но, сè уште не сум подготвен да запалам пура“.

ПСЖ извојуваше убедлива победа над Ремс во натпреварот од 22. коло на француската Лига 1. Средбата се одигра во Париз на стадионот „Парк на принцовите “ и заврши со резултат 4-0 во корист на домашната екипа.

Италијанскиот играч за врска на ПСЖ Марко Верати го отвори резултатот. Ова е прв гол на овој фудбалер во францускиот шампионат по повеќе од четири години. Верати последен пат постигна гол во Лига 1 во мај 2017 година, кога ПСЖ ја победи Бастија со 5-0.

Италијанскиот играч дојде во ПСЖ во летото 2012 година од Пескара. За францускиот клуб, играчот од средниот ред одигра 363 натпревари на кои постигна 10 гола и 58 асистенции. ПСЖ има 53 бода од 22 натпревари во францускиот шампионат и е лидер на табелата. Ница е на второто место со заостанување од 11 бода.

Екипата на Селта Виго, е уште една екипа која изразила желба за доведување на македонскиот репрезентативец во дресот на Леванте, Енис Барди.

Според шпанските медиуми, од тимот на Селта планираат да ја искористат ситуацијата со истекот на договорот на Барди и Леванте, кој истекува за 9 месеци, и ќе испрати понуда за негов трансфер.

Има извесни информации дека Леванте за Енис Барди одредил цена од 5 милиони евра, а освен Селта за него се сериозно заинтересирани и екипите на Милан и Реал Сосиедад.

Барди наводно веќе побарал од челниците на Леванте тој да биде продаден до крајот на месецот.

Одличниот крилен напаѓач на Шкупи, Матеј Цветановски и официјално ја продолжува кариерата во Унгарија.

Цветановски денес е претставен како ново засилување за унгарскиот прволигаш Ѓирмот. Во редовите на Ѓирмот Цветановски доаѓа да помогне во борбата за опстанок затоа што станува збор за последнопласираниот тим на табелата во првата унгарска лига.

За Матеј Цветановски ова е прв интернационален предизвик претходно во кариерата настапуваше уште за Вардар, Пелистер и Македонија Ѓорче Петров.

Домот на напаѓачот на Реал Мадрид, Карим Бензема , бил ограбен за време на мечот со Елче во шпанското првенство, објави „Марка“.

Според изворот, крадците влегле во куќата преку градината, сместена во луксузен станбен комплекс во Сан Себастијан де лос Рејес, во време кога куќата била празна. Самиот натпревар заврши со резултат 2-2. На оваа средба Бензема не успеа да реализира пенал. И тој се повреди и го напушти теренот во 58. минута.

Реал Мадрид има 50 бода од 22 натпревари и е на првото место на табелата во шпанската Примера. За разлика од Реал Мадрид, Елче (23) е на 15. место на табелата.

Италијанскиот фудбалски гигант ја објави информацијата дека напаѓачот на екипата Федерико Киеза е успешно опериран и дека ќе биде надвор од тимот следните седум месеци.

Киеза се здоби со тешка повреда во која ги оштети вкрстените лигаменти во коленото на првенствениот натпревар против екипата на Рома кој се одржа на 9.јануари.

Ова фактички е потврда дека италијанскиот репрезентативец ќе го пропушти остатокот од сезоната, но од клубот се сигурни дека тој ќе биде фит за стартот на новата кампања.

Киеза сезоната ја заврши со одиграни 18 натпревари во кои постигна 4 гола и 4 асистенции.

Андриј Шевченко е многу блиску до потпишување договор и превземање на улогата селекторот на репрезентацијата на Полска.

Последен пат тој ја водеше италијанската екипа Џенова, но беше ослободен само два месеци подоцна, бидејќи Џенова не игра како што посакуваше раководството на овој клуб. Според информацијата објавена денес фудбалскиот сојуз на Полска ги договорил сите детали. Украинецот ќе добива 2,5 милиони евра годишно, а сумата ќе биде поделена меѓу федерацијата и спонзорите.

Шевченко сега треба да ја среди работата со Џенова, каде што има договор до летото 2024 година, иако тој доби прекин на соработката со тимот. Се очекува официјално да биде објавено на 31 јануари. Полска не успеа директно да се квалификува за Светското првенство во Катар, па ќе мора да мине низ бараж против Русија кон крајот на март.