Од денес може да се купат влезници за квалификациските мечеви на нашите најдобри фудбалери против Ерменија на 2 септември и Романија на 8 септември на националната арена – „Тодор Проески“ во Скопје.

Влезниците по цена од 300 денари можат да се набават преку продажната мрежа на –„MKTickets“. Според протоколите за заштита од Ковид-19, на стадионот ќе може да влезат само лица кои имаат сертификат/потврда за извршена имунизација (вакцинација) од Ковид-19 односно примена најмалку прва доза, или лица кои поседуваат сертификат/потврда за прележан Ковид-19 во последните 45 дена, гледајќи од денот на оздравувањето.

Тоа не се однесува на лица под 18 годишна возраст.

Директорот на Борусија Дортмунд, Михаел Зорц е лут поради поврзувањето на Ерлинг Халанд и ПСЖ, јавуваат германските медиуми.

Зорц остро реагираше на наводите дека Халанд за 200 милиони евра ќе премине во ПСЖ, кој во норвешкиот напаѓач наводно гледа замена за Килијан Мбапе, кој има желба да премине во Реал Мадрид. Сепак, Дортмунд не размислува за продажба на играчот со кого има договор до 2024. година.

„Ние сме фудбалски клуб, а не банка! Нашиот став е јасен и не се промени. Претпоставувам дека ќе има уште наводи во наредните неколку дена, но нашиот став е јасен и нема да го повторувам секој пат.“ – вели Зорц.

За Халанд интерес покажаа сите големи европски клубови, но Дортмунд не сака да го продаде ова лето. Цената на овој напаѓач наредното лето ќе изнесува 70 милиони евра, бидејќи тогаш ќе се активира клаузулата во која стои дека ќе може за тој износ да го напушти клубот.

Жерар Пике покрај професионалната фудбалска кариера, гради и бизнис кариера.

Компанијата на Пике, „Космос Холдинг“ ја искористи шансата и ги откупи правата за пренос на натпреварите од Лига 1 во Шпанија во следните три години.

Пике повлече тактички потег со оглед на тоа дека Лионел Меси неодамна се пресели во ПСЖ, па тоа ќе му донесе многу пари на дефанзивецот.

Меси се очекува да дебитира вечерва против Ремс, а Пике сигурно ќе заработи многу пари, иако засега не се открива точната сума.

Фудбалерот на Фиорентина, Влаховиќ постигна гол во победата над Торино и доби неверојатен поздрав од трибините од навивачите.

Тој по победата посочи дека не сака да го споредуваат со најдобрите во моментов во светот, пред се со Халанд.

„Целиот стадион го пееше моето име, сонував за вакво нешто од дете, трогнат сум. Мислам дека сум на вистинскиот пат, но мора да работам напорно со понизност и посветеност. Фокусиран сум и не смеам да размислувам дека веќе сум постигнал нешто големо, тоа би било грешка. Ќе има подеми и падови, но ќе давам се од себе за клубот, градот, навивачите, тренерот. Не сакам споредби. Халанд постигнува по десет гола во Лигата на шампионите, три години игра во тоа натпреварување. Се надевам дека некогаш ќе го достигнам, но сега морам само да работам. Ги следам најдобрите напаѓачи.“ – изјави Влаховиќ.

Манчестер Јунајтед со победата над Волвс стигна до 28. натпревар по ред без пораз на гостински терен, со што испиша историја во Премиерлигата.

Екипата од Олд Трафорд го собори рекордот на Арсенал, кој во 2004. година забележа 27. натпревари без лигашки пораз на гостувањата.

Јунајтед во текот на овие 28 натпревари постигна 51 погодок, а прими 19, при што запиша 17 победи, додека Арсенал сјајната низа ја заврши со гол разлика 54:17, имајќи ист број на победи.

Единствениот погодок на натпреварот помеѓу Вулверхемптон и Јунајтед беше дело на Гринвуд во 80. минута, по асистенција на Варан, кој дебитираше за Јунајтед. Домашните фудбалери се жалеа по погодокот, бидејќи сметаа дека во текот на акциајта Погба го фаулираше Невес. Но, нити судијата, нити ВАР не ја менуваа одлуката.

„Волците“ беа поблиску до победа, но пропуштија неколку одлични шанси, за што на крајот беа и казнети.

Македонската фудбалска репрезентација до 21 година предводена од Драган Канатларовски ги започна подготовките за септемвриските квалификациски натпревари.

Во овие мечеви се очекува да настапат и Стефан Чолаковски и Метју Божиновски, кои доаѓаат од Австралија, од тимовите на Мелбурн Сити, односно Мелбурн Виктори. Едниот напаѓач со 21 година, додека вториот дефанзивец со 20 години.

Тренинзите ќе се одработуваат во Скопје на терените на ФФМ, а потоа следува деби натпреварот за Канатларовски на клупата во Ле Ман каде гостуваме на Франција.

По враќањето од Франција, нашиот стручен тим и играчите се селат во Охрид каде ќе се одигра втората средба во квалификациите за ЕП. Гостува селекцијата на Србија на „Билјанини извори“ на 7. септември, а свечено во употреба ќе биде ставена и новата трибина која ја изгради фудбалската федерација.

Реал Мадрид му даде ултиматум на ПСЖ да одговори на понудата за Килијан Мбапе, затоа што сметаат дека евентуален одговор од кога се собира француската репрезентација само би го закомплицирал трансферот.

Последната понуда на Реал Мадрид изнесува 180 милиони евра и 10 милиони сигурни бонуси, но откако истата пристигна, спортскиот директор на ПСЖ Леонардо, кажа дека баш ништо не се променило.

Многумина сметаат дека Мбапе одлучил дека сака да замине во Реал Мадрид поради пристигнувањето на Меси, затоа што не бил воодушевен од играњето со него. Сепак, Мбапе на својот Инстаграм профил објави фотографија која ги загрижи фановите на Реал Мадрид.

На неа се гледа насмеаниот Мбапе со Меси, што покрена коментари од фановите на Реал Мадрид, кои се плашат дека двете ѕвезди почнале да се согласуваат, па Французинот поради тоа би можел да се откаже од трансферот.

Со победите на Тотенхем над Ватфорд и поразот на Арсенал против Манчестер Сити, се промени историјата во Премиерлигата.

Имено, по првпат во постоењето на ова натпреварување, Тотенхем викендот го заврши на првото место, а Арсенал како последнопласиран. Целосен контраст владее помеѓу двата тима на стартот на сезоната. Тотенхем има три победи, меѓу кои и онаа над Манчестер Сити, а Арсенал има три порази, меѓу кои е и дебаклот од споменатиот Сити.

И покрај тоа што потрошија најмногу од сите европски клубови ова лето, барем засега, Арсенал не поседува конкретен стил на игра, ниту засилувањата во видот на Бен Вајт, Арон Ремсдејл, Мартин Едегард, Алберт Самби Локонга и Нуно Тавареш покажаа зошто се доведени. Се уште е рано да се прогнозира, но делува дека оваа сезона ќе биде една од оние во кои навивачите на Арсенал ќе немаат многу причини за радост.

Од друга страна, Тотенхем ги одбиваше сите налети на Манчестер Сити за Хари Кеј и како што стојат работите, капитенот ќе остане во лондонскиот клуб, иако имаше желба да замине.

Манчестер јунајтед ќе мора да донесе одлука за тоа кој ќе ја носи легендарната „седумка“ на „Олд Трафорд“ оваа сезона.

Бројот седум е заштитен знак на Роналдо, но тој број има посебна тежина и на „Театарот на соништата“ затоа што во историјата го носеа голем број легенди како Ерик Кантона, Џорџ Бест и Дејвид Беакм.

Интересно е тоа што Премиерлигата на својот официјален сајт ја додели „седумката“ на двајцата фудбалери. На профилот на играчите на Кавани и Роналдо и двајцата го имаат истиот број, но Јунајтед уште не реши официјално чиј ќе биде бројот.

Постои можност да си замине и Ентони Марсијал, па неговиот број да го добие Кавани, а бројот седум да му припадна на Роналдо, но засега ништо не е познато.

33-годишниот бразилски играч од средниот ред на Арсенал, Вилијан, е се поблиску до приклучување кон Коринтијанс.

Според информациите, бразилскиот клуб веќе се договорил со Вилијан за соработка до 2023 година, а двете страни во моментов ги договараат за конечните детали од договорот.

Претходно беше објавено дека Арсенал е подготвен да го пушти играчот бесплатно за да заштеди на неговата плата.