Италијанскиот фудбалски гигант Јувентус се соочува со нова казна поради која може да заврши во Серија Б.

Јувентус, пред две недели заработи казна од Фудбалскиот сојуз на Италија, и му беа одземени 15 бода. Сега според пишувањето на „Кориере дело Спорт“, истрагата за неправилностите во клубот се проширува и сојузот може да му одземе дополнителни 20 бода, со што бјанконерите ќе паднат на последното место во Серија А.

Ако веста за доделување дополнителна казна за Јувентус навистина се случи, тогаш клубот до крајот на сезоната ќе се бори за опстанок во лигата, бидејќи ќе остане само на три бода.

Тимовите од Ла Лига не беа особено активни во последниот преоден рок. Анализата на весникот „АС“ покажува дека шпанските клубови потрошиле најмала сума на трансфери во последните шест години, ако ја исклучиме годината по пандемијата на ковид 19.

Причина за ова е пасивноста на двата големи гиганти Барселона и Реал Мадрид, кои во јануари не потпишаа ниту еден нов играч. Останатите клубови дадоа вкупно 37,6 милиони евра за нови играчи, а во исто време продадоа играчи во вкупна вредност од 78,4 милиони евра.

Само во сезоната 2020/21, која беше погодена од пандемијата, тимовите трошеа помалку пари за нови играчи во зима. Тогаш клубовите дадоа само 20 милиони евра за нови играчи. Инаку, пред тоа, година со најмала потрошувачка беше 2017 година, кога за трансфери беа дадени 27,7 милиони евра.

Сите споменати суми изгледаат прилично ниски во однос на парите што се трошат во Англија. Само Астон Вила даде повеќе пари за нови играчи од сите тимови во Ла Лига. Од друга страна, Челзи инвестираше неверојатни 326 милиони евра, што е повеќе од сите тимови во останатите 4 големи првенства.

Се најавуваше дека Илија Несторовски може да го напушти Удинезе и да премине во Сампдорија, но сепак неговото заминување од „Фриули“ не се реализираше. Во игра беа повеќе клубови, но најблиску беше Сампдорија. Сепак, трансферот пропаднал во последен момент и тоа откако двата клуба имале договор.

Трансферот пропаднал поради новата незгодна повреда која ја заработил македонскиот напаѓач. Првичните информации се дека Нестор ќе мора да паузира најмалку еден месец. Српскиот стратег, Дејан Станковиќ инсистирал да му се доведе напаѓач кој веднаш ќе му биде ставен на располагање што немаше да биде случај со Нестор по неговата повреда.

Несторовски во Удинезе добива мала минутажа и сигурно дека во Сампдорија ќе одиграше повеќе минути до крајот на сезоната.

Челзи e „крал“ на преодниот рок и потроши неверојатни 300 милиони евра за нови засилувања.

Пристинаа неколку големи засилувања, а секако фокусот е на Енцо Фернандез, кој стана најскапо засилување во историјата на Премиер лигата. Со новите засилувања „сините“ и официјално ја започнаа реконструкцијата на тимот, замина Жоржињо, а Челзи е спремен на лето да продаде уште три големи ѕвезди.

Имено, Челзи е спремен да слушне понуди за Ковачиќ, Кулибали и Кристиан Пулишиќ, а вратата ќе му биде отворена и на Обамејанг. Кулибали не се покажа како добро засилување, па „сините“ сакаат да вратат дел од вложената сума за него.

Ковачиќ и Пулишиќ пак влегуваат во последната година од договорот и Челзи сака да ги продаде на лето.

Лука Модриќ ги одбил понудите на неименувани клубови од Саудиска Арабија и американската МЛС лига, објавија медиумите од Мадрид.

Според изворот, хрватскиот фудбалер веќе ја одбил втората понуда од арапскиот клуб. Модриќ за прв пат го одби Ал Наср за кој сега игра Кристијано Роналдо.

Модриќ одлучи дека сака да остане во мадридскиот клуб уште една година и нема намера да разгледува понуди од други тимови.

Модриќ оваа сезона одигра 17 натпревари во лигата, постигна три гола и даде две асистенции. Фудбалерот од средниот ред се пресели во Реал Мадрид од Тотенхем во 2012 година и е добитник на наградата „Златна топка“. Како што стојат работите можно е Лука Модриќ да одлучи да ја заврши кариерата во Реал Мадрид.

Арсенал има намера да го продолжи договорот со играчот од средниот ред Мохамед Елнени. Актуелниот договор на Египќанецот истекува на лето, но има опција за негово автоматско продолжување на уште една сезона и „топчиите“ имаат намера да го активираат, откриваат медиумите од Островот.

Иако не го користи многу често, Микел Артета го сака Елнени во својот тим како алтернатива на Томас Парти и Гранит Џака. Оваа сезона 30-годишниот фудбалер одигра 8 натпревари во сите натпреварувања и постигна 1 гол.

Тој неодамна заработи сериозна повреда на коленото која може да го натера да паузира до крајот на сезоната. Се вели дека предметната повреда не ги променила намерите на челниците на Арсенал и Артета, кои сепак сакаат да го задржат Елнени уште една сезона.

Николо Заниоло размислува да го тужи клубот, пренесуваат италијанските медиуми.

23-годишниот Италијанец го обвинува клубот за психичко малтретирање и притисок. Тој неодамна беше отстранет од тимот, откако побара да го напушти клубот. Меѓутоа, до трансфер не дојде, Заниоло остана во Рома, па ќе продолжи да тренира индивидуално.

Борнмут понуди 30 милиони евра, Рома ја прифати понудата, но Занило одби да се пресели во англискиот клуб.

Тоа додатно го налути раководството на Рома, па му порача дека до крајот на сезоната ќе биде исфрлен од тимот.

Челниците на Пари Сен Жермен се лути на колегите од Челзи поради неуспешниот трансфер на Хаким Зијеч. Двата клуба постигнаа договор за трансфер на Мароканецот на позајмица на „Паркот на принцовите“, а самиот фудбалер отпатува за Париз и ги помина сите задолжителни прегледи.

Сепак, серијата гафови, главно на лондончани, спречија зделката да биде завршена и играчот да биде навреме пријавен. Така се пропадна во последен момент, а Зиеш си замина дома на „Стемфорд Бриџ“. Според „Скај Спортс“, ПСЖ е крајно лут поради ваквиот развој на настаните и се заканува дека повеќе нема да работи со овој клуб.

„Синоќа беше апсолутен хаос. Челзи тешко дека повторно ќе се појави пред вратата на ПСЖ. Така не се прави бизнис и не можеш да се однесуваш така со играч“, велат извори од „Паркот на принцовите“.

Ентони Марсијал постигна еден од двата гола при победата на неговата екипа над Нотингем Форест со 2:0 во реваншот од четвртфиналето на Карабао Купот.

На овој начин Французинот му помогна на својот тим да стигне до финалето на турнирот. Тоа беше негов 85. гол за Манчестер Јунајтед во неговиот 282. натпревар во сите натпреварувања.

Така тој се израмни со Дејвид Бекам во рангирањето за фудбалери со најмногу голови во историјата на „црвените ѓаволи“. Тие двајца сега ја делат 25-та позиција на вечната ранг-листа. Сепак, Марсијал и понатаму е далеку од лидерите на оваа ранг листа, на која на чело е Вејн Руни со 253 гола, пред Боби Чарлтон со 249 и Денис Лоу со 237.

Челзи ја имаше една од најпрометните зимски трансфер периоди во својата историја. Од Челзи потрошија околу 329,5 милиони евра за јануарски засилувања, без бонуси, повеќе од сите клубови во германската Бундес лига, италијанската Серија А, Француската Лига 1 и шпанската Ла Лига заедно.

Да потсетиме дека во зимскиот преоден рок, Челзи потпиша со Енцо Фернандез (121 милиони евра), Михаило Мудрик (70 милиони евра), Беноа Бадијашиле (38 милиони евра), Нони Мадуке (35 милиони евра), Мало Густо (30 милиони евра), Андреј Сантос (12,5 милиони евра), Давид Датро Фофана (12 милиони евра) и Жоао Феликс (позајмица за 11 милиони евра).

Челзи се наоѓа на 10. место на табелата во Премиер лигата. Избраниците на Греам Потер имаат осум победи и освоени 29 поени. Следниот натпревар лондонскиот тим го игра против Фулам на 3 февруари на домашен терен.