Според информациите од европските ракометни кругови, македонскиот шампион Вардар 1961 го губи местото за настап во Лигата на шампионите за сезоната 2022/2023.

Како причина за евентуалната забрана за учество на Вардар во Лигата на шампионите, од ЕХФ ја истакнуваат несредената финансиска ситуација во клубот која трае уште од минатата сезона.

Официјалната одлука за судбината на двократниот освојувач на ЛШ, се очекува да биде донесена до крајот на оваа недела.

Голманот на македонската ракометна репрезентација, Никола Митревски, кој беше номиниран за најдобар голман оваа сезона во Лигата на шампионите, ќе остане во дресот на Порто и во следните две сезони.

Како што потврди клубот, тој ја продолжил соработката со „змејовите“ до 2024 година.

Митревски е несомнено еден од најдобрите голмани во Европа во моментов, па Португалците не размислуваа премногу пред да му понудат нова соработка.

Викендов започнува завршниот турнир во ракометната Лига на шампиони. По тој повод ЕХФ го објави идеалниот тим на сезоната во ова натпреварување.

Ол-стар тимот од клупата го предводи тренерот на Кјелце, Талант Душебаев. Голман е Никлас Ландин од Кил, крила се Гомез од Барселона и играчот на Фленсбург, Ване.

На бековската линија се најдоа Дика Мем од Барселона, како и играчите на Веспрем, Мае и Ненадиќ. Најдобар дефанзивен играч е Пекелер од Кил, а пикер е Камил Шипшак од ПСЖ.

За најдобар млад играч во ЛШ е прогласен Тобијас Грендал од Елверум.

Македонскиот ракометен репрезентативец, Жарко Пешевски, го заврши својот три годишен престој во екипата на Штутгарт, за која успешно настапуваше во Бундеслигата.

Пешевски кој од наредната сезона се враќа во Македонија и ќе настапува за битолски Еурофарм Пелистер, после одигрувањето на последниот натпревар во дресот на Штутгарт, преку порака на социјалните мрежи се збогува со клубот.

“Поминав три одлични сезони во сино – белото семејство. Изградивме мост на две различни култури, со взаемно почитување и разбирање. Никогаш не се почуствував како странец во клубот. Ви благодарам од дното на душата, и довидување до следна прилика, Вашиот Жарки“, стои во објавата на Пешевски.

Легендата на македонскиот и европскиот ракомет, Кирил Лазаров, го одигра својот последен натпревар во кариерата.

Лазаров со својот клуб Нант доживеа пораз со резултат 36:31 од екипата на Париз Сен Жермен во финалето на Купот на Франција. 

После дуелот нашиот ракометар изјави дека е горд на се што постигнал во својата богата играчка кариера, и дека му беше чест што играл во Нант и во Франција.

Најдобриот македонски ракометар на сите времиња Кирил Лазаров, го одигра својот последен домашен натпревар во тимот на Нант.

По тој повод францускиот ракометен прволигаш, после средбата со Тулуз приреди свечена церемонија со која му се заблагодари на Лазаров за неговиот придонес за клубот. 

Во салата присуствуваше и семејството на Лазаров кој по овој повод беше седнат на „кралски“ престол и беше поздравен од многубројната публика.

Голманот на ракометниот клуб Бутел Градимир Чаневски, ја напушта екипата и во иднина ќе настапува за тимот Макаби Ришон Лезион од Израел.

Според објавените информации, Чаневски со еден од најдобрите израелски клубови ќе потпише двегодишен договор.

Чаневски освен во Бутел, претходно успешно настапуваше и за екипата на Еурофарм Пелистер.

Шампионот на Македонија во ракомет Вардар 1961 и официјално ќе се натпреварува во Лигата на шампионите следната сезона.

Оваа информација ја потврдија од Ракометната федерација на Македонија.

„РФМ ја достави пријавата на РК Вардар 1961 до Европската Ракометна Федерација за учество во Лигата на шампионите во машка конкуренција за сеоната 2022/23. Им посакуваме спортски успеси во елитната категорија“, соопштуваат од федерацијата.

Машката ракометна репрезентација на Македонија вчера ги дозна ривалите на претстојните Медитерански Игри 2022 кои од 25 јуни ќе се одржат во алжирскиот град Оран.

Подмладениот тим предводен од селекторот Кире Лазаров на Медитеранските Игри ќе биде дел од групата Б во која се најдоа и селекциите на Шпанија, Турција, Грција и Алжир.

Лазаров и неговите избраници подготовките на за настап на Игрите ги започнуваат на 13 јуни.

Голманот на македонската ракометна репрезентација, Никола Митревски, е номиниран за најдобар чувар на мрежата во Лигата на шампионите за сезоната 2021/2022.

Митревски имаше одлична сезона бранејќи го голот на својот клуб Порто, а неговите успешни одбрани беа препознаени од ЕХФ поради што доби заслужена номинација.

Конкуренти за добивање на наградата ќе му бидат голманите Ландин, Буриќ, Перез де Варгас, Волф и Коралес.