Македонскиот ракометен шампион во женска конкуренција, Ѓорче Петров, во осминафиналето од Европскиот куп ќе игра против полската екипа ЈКС Јарослав 

Денешната ждрепка во Виена се покажа погодна за ѓорчепетровки, ако се суди по досегашните резултати на Јарослав оваа сезона. Тоа е екипа која се наоѓа на претпоследното место во полската лига со ефект од две победи и седум порази.

Во минатото трето коло од европскиот куп убедливо го надигра португалскиот Алвариум (претпоследна во Португалија), а предходно оствари победа и пораз против Венло од Холандија.

Првиот натпревар се игра на 7 или 8 јануари во Полска, а реваншот една недела подоцна во Скопје. Ѓорче Петров досега нема пораз во четирите натпревари од Европскиот куп. Одиграа нерешено и го совлада Тор, на Исланд, а потоа двапати беше убедлив против Румс јагс од Австрија.

Македонскиот ракометен вицешампион, Еурофарм Пелистер, одигра нерешен натпревар 29:29, на домашен терен во Битола, против шпанската екипа Бидасоа Ирун.

Освоениот бод против Бидасоа во рамките на Европската лига, го приближи Пелистер на чекор до пласман во нокаут фазата од ова натпреварување.

Тренерот на Еурофарм Пелистер, Ларс Валтер, после натпреварот изјави дека освоениот бод може да биде многу важен во расплетот на групата.

„Благодарност до публиката која што дојде на трибините и ни даде поддршка која што многу ни значеше. Добро го почнавме натпреварот, одлично трчавме без топка и имавме поволен резултат. Но, во вториот дел се почувствува тоа што Хосни не тренираше еден месец, исто така и Дејвис, Хенеберг после болест немаше енергија, а се повреди и Кукоски. Па падот во нашата игра беше очекуван. Но и покрај сите проблеми успеавме да се вратиме и да освоиме бод. Како што рече мојот колега, овој бод може многу да значи во понатамошниот расплет во групата. Мислам дека сме на правиот пат. Ако денес овој бод изгледа како лош резултат, сигурен сум дека за неколку дена ќе изгледа многу подобро“, изјави Валтер.

Ракометниот клуб Еурофарм Пелистер забележа убедлив пораз на гостувањето во Шпанија кај Бидасоа Ирун со 32:20.

Ракометарите на битолскиот клуб дуелот со Бидасоа во рамките на Лига Европа, го започнаа солидно и играа доста добро во првите петнаесет минути од средбата, но потоа настапи голем пад во нивната игра, што домаќинот од Шпанија одлично го искористи. Бидасоа уште при крајот на првото полувреме оствари одлична разлика која успеа да ја задржи до крајот на средбата.

Тренерот на Еурофарм Пелистер, Ларс Валтер, после натпреварот истакна дека уморот и повредите на неколку играчи се главна причина за поразот од Бидасоа.

„Бевме премногу уморни, а ракометарите на Бидасоа одиграа моќно. На минатите натпревари се соочивме со многу повреди и тоа ни донесе многу проблеми. Ова не треба да биде изговор за поразот, но овај натпревар ни дојде премногу. Моите играчи го направија тоа што можеа на теренот. Сега ни останува добро да се одмориме и да бидеме целосно подготвени за следниот натпревар“, изјави Валтер.

Следен натпревар за Еурофарм Пелистер во Лига Европа ќе биде реванш дуелот со Бидасоа Ирун кој ќе се игра следниот вторник во Битола од 20:45 часот.

Десниот бек на Еурофарм Пелистер, Усама Хосни, повторно се врати во ростерот на екипата, и отпатува во Дизелдорф за мечот со Мотор Запорожје во Лига Европа.

Хосни се повреди на дуелот со Агуаш Санташ во Португалија, и пропушти четири натпревари во првенството и Лигата на Европа. 

Тој сигурно нема да добие голема минутажа од тренерот Валтер, меѓутоа радува неговото опоравување и поддршката која ќе ја даде на пелистерци на гостувањето во Германија.

Македонската ракометна репрезентација, идниот месец ќе ги започне подготовките за СП 2023 година, кое се одржува во јануари, а нашата екипа групната фаза ќе ја игра во Краков. Како дел од подготовките, нашите ракометари предводени од селекторот Кире Лазаров ќе бидат учесници на турнир во Хрватска.

Според информациите кои ги објави Хрватскиот ракометен сојуз, на турнирот „Кроација Куп“ кој ќе се одржува на почетокот од идниот месец, гости на хрватската репрезентација ќе им бидат селекциите на Македонија и Израел, против кои ќе одиграат контролни средби.

Македонскиот ракометен клуб Еурофарм Пелистер го продолжи договорот со еден од најталентираните ракометари во Македонија, Павле Атанасијевиќ.

19-годишниот бек веќе трета сезона е во клубот од Битола и неговата кариера оди во нагорна линија. Неговиот нов договор со Еурофарм Пелистер е со важност до 2026 година.

“Дојдов пред три години и тоа беше ново искуство за мене. Со тек на време секоја година по година прогресирав сè повеќе и повеќе. Прво започнав со тренерот Александар Јовиќ, кој ме упати, а потоа новиот тренер Ларс Валтер ми укажува на грешките и прави да бидам подобар играч. Ми дава мотив да напредувам и да играм подобро. Атмосферата тука е многу убава, посебно кога се игра пред полна сала. За мене ова е големо искуство, посебно кога играме на европската сцена. Тоа е мотив плус за мојата работа“, изјави Атанасијевиќ.

Македонскиот ракометен тренер Стевче Алушовски ја прекина соработката со екипата на Тор од Исланд. 

Иако Алушовски на почетокот од сезоната потпиша нов тригодишен договор со Тор, сепак после слабите резултати на екипата која се натпреварува во втората исландска лига, челниците на клубот решија да се разделат со македонскиот тренер.

Пред заминувањето во Исланд, Алушовски беше тренер на Вардар со кого успеа да забележи значајни успеси, а во минатото го водеше и битолски Еурофарм Пелистер.

Екипата на Еурофарм Пелистер доживеа пораз на домашен терен од германскиот Фуксе Берлин со резултат 43:34, во натпревар од третото коло во Лига Европа.

Тренерот на битолската екипа, Ларс Валтер, после натпреварот изјави дека голем проблем за екипата било отсуството на некои стандардни играчи во тимот, но и некои проблеми во играта кои не се случуваат прв пат.

„Добро го отворивме натпреварот, но потоа имавме големи проблеми со враќањето во одбраната. Ова ни се случува втор пат оваа сезона, а за да не ни се случи повторно мора да извлечеме поуки. Ми се допадна како го одигравме вториот дел. Не се предававме и со оглед дека ни фалат неколку ракометари, а се повреди и Сери, одлично го одработивме тој дел од натпреварот“, изјави стратегот на Еурофарм Пелистер.

Нареден натпревар за Еурофарм Пелистер е гостувањето во Германија кај Мотор Запорожје.

Женската ракометна репрезентација на Норвешка ја одбрани титулата на европски шампион откако во финалето одиграно во Љубљана ја совлада Данска со 27:25.

Најдобар стрелец кај норвежанките беше Нора Мерк со постигнати осум голови, а кај Данска, Луиса Бургорд постигна шест погодоци.

Норвешка со оваа победа стана шампион на Европа по деветти пат, а Данска остана на три освоени титули.

Ракометниот клуб Вардар 1961 соопшти дека од наредната сезона екипата ќе се засили со доведување на двајца македонски ракометари.

Како нови засилувања се договорени Томислав Јагуриновски и Михаил Аларов. Двајцата ракометари потпишаа двегодишни договори. Јагуриновски е поранешен играч на Вардар кој сега повторно се враќа во старата средина, а за Аларов ова ќе биде прв настап во поранешниот европски првак.