Екипата на Вардар славеше победа против Пролет со 22:28 и е на само еден чекор до титулата во домашното првенство и освојување на двојна круна.

Пролет создаде водство од два гола на самиот почеток на натпреварот, по што Вардар до седмата минута прави пресврт (3:2), а потоа нивната предност се зголеми на три гола на паузата (14:11).

Во вториот дел се водеше голема битка, а Пролет им парираше на „црвено-црните“ до 46. минута (19:20), по што Вардар фати ритам и со неколку голови по ред му избега на ривалот на убедливи 28:22.

Најдобар во екипата на Вардар беше Иван Чупиќ со осум голови, додека Гоце Георгиевски постигна седум погодоци.

За Вардар во последното коло останува уште средбата со Металург, на која доколку слават, ќе ја освојат шампионската титулата, а Тинекс Пролет за излезот во Европа треба да слави на гости кај Прилеп.

Францускиот состав Нант ќе игра против Барселона во полуфиналето на фајнал-фор турнирот во Лигата на шампионите, одлучи ждрепката. Тоа значи дека нашиот најдобар ракометар, Кире Лазаров, по сензационалната елиминација на Веспрем во четврт-финалето, сега ќе се сретне со неговиот поранешен тим со кој триумфираше во елитната конкуренција на Европа. Во вториот меч од 1 /2 финалето силите ќе ги одмерат францускиот Пари Сен Жермен и Алборг од Данска. Така наречениот Ф4 турнир ќе биде реализиран во – „Ланксес Арена“ во германскиот град Келн од 12 до 13 јуни.

Македонија и Србија ќе одиграат две тест средби во Ниш кон крајот на следниот месец, а селекторот Кирил Лазаров допрва ќе го соопшти списокот на играчи за двомечот.
Натпреварите ќе се одиграат на 19. и 20. јуни, нашата најдобра ракометна репрезентација ќе гостува во Ниш, Србија има нов селектор, шпанскиот тренер Тони Џерона веќе го објави списокот на играчи за дуелите со нашиот национален тим.

Кире Лазаров неодамна наполни 41 година, а македонската и светска легенда во ракометниот спорт, официјално ќе игра уште една сезона за Нант.
Клубот од Франција стигна до Ф4 во Келн откако беше подобар во двомечот со Веспрем, а веднаш по изборениот пласман, претседателот на Нант, Гаел Пелетие имаше убава вест. „Чест ми е да објавам дека Кире Лазаров ќе игра уште една година за Нант“, објави Пелетие. Лазаров во Нант е од 2017. година, претходно играше за Барселона, Атлетико Мадрид, Сиудад Реал, Загреб, Веспрем, Пелистер и Борец.

На денешен ден, 19 мај 2002 година, пред точно 19 години, женскиот ракометен клуб Кометал Ѓорче Петров ја донесе првата европска титула во Македонија. Ракометарките на нашиот ракометен првак успеаја да го совладаат тимкот на Херц во реванш финалето кое се одигра пред полни трибини во СРЦ Кале и да ја обезбедат европската круна. „Кометалки“ славеа со 26-22, откако на првиот меч на гости беа поразнеи со 27-25. И денеска со задоволство се сеќаваме на фантастичните мигови кои ни ги донесе генерацијата предводена од Гордана Нацева, Индира Кастратовиќ, Олга Бујанова, Луминица Дину, Оксана Плошчиска, Ирина Калиниченко, Анжела Платон, Милева Велкова, Мирјана Чупиќ, Андријана Будимир, Лариса Ферзалиева, Ања Андрушенко, Наталија Малахова и Елена Златановска.

Сезоната во СЕХА Газпром лигата ќе заврши со осминафиналните дуели меѓу Вардар1961 и Металопластика. Победникот од тој двомеч ќе се пласира во четвртфиналето на СЕХА лигата чии дуели дополнително ќе бидат закажани, но ќе се играат во август.
Вардар1961 и Металопластика се договорија своите две средби од осмина-финалето да ги одиграат во Скопје, на 7 и 8 јуни.
Првата средба е закажана за 7 јуни со почеток во 17,30 часот.
Следниот ден, на 8 јуни ќе се игра у вториот меч, повторно во 17:30 часот. Тоа ќе бидат и последни средби за Вардар1961 сезонава бидејќи претходно планирано е домашното првенство да заврши на 3 јуни.

Француските браќа близнаци, Оливие и Кевин Ниокас, од наредната сезона ќе го носат дресот на Металург, објавија денеска дел од медиумите во нивната татковина.
Според наведеното, ракометарите кои настапуваат на бековските позиции, набрзо треба да дојдат во Скопје и да потпишат за екипата од Автокоманда. Оливие во тековнава сезона настапува во екипата на Нант додека Кевин го носи дресот на Бенфика.
Ќе потсетиме дека Металург неодамна ја продолжи соработката со Хрватот, Златко Хорват и Црногорецот, Василије Калуѓеровиќ.

Еурофарм Пелистер во финалето од Купот на Македонија ќе се сретне со големиот ривал Вардар, во потрага по титула. Пелистерци го совладаа Бутел во полуфиналето, а „зелено-белите“ се едногласни во намерата трофејот повторно да го вратат во Битола. „Се надеваме дека ги научивме поуките од поразот од Вардар 1961 во шампионатот. Тоа треба да го покажеме на терен. Кога сте комплетни е многу поразлично и ротацијата е подобра. Сите ќе го дадат максимумот за титулата да дојде во нашите витрини“. – вели капитенот на битолчани, Градимир Чаневски. „Сите клубови имаа проблеми со ковид-19, не стигнаа и повреди и не бевме комплетни баш кога требаше да бидеме вистински. Многу се радувам што сме комплетни и тренираме цела екипа. Добро ќе се спремиме и ќе бидеме силен конкурент на сите ривали и во шампионатот и во Купот. Верувам дека со ангажманот и квалитетот ќе покажеме каков квалитет имаме“, вели Стипе Мандалиниќ. Финалето помеѓу Еурофарм Пелистер и Вардар 1961 се игра во сабота со почеток од 17.30 часот.

РК Еурофарм Пелистер од сезоната 2021/22 ќе биде посилен за хрватскиот интернационалец, Јосип Божиќ Павлетиќ. Десното крило на хрватската репрезентација и сезонава член на Гепингем потпиша договор на една сезона, со опција за уште една со битолскиот суперлигаш. Јосип Божиќ Павлетиќ е роден во Сплит на шести август 1994 година. Дел од познатата хрватска ракометна школа, а име градеше носејќи го дресот на Нексе Нашице. Во 2017 година премина во ППД Загреб и неколку сезони по ред освојуваше титули од шампионатот и Купот на Хрватска. Во јануари годинава се пресели во Бундеслигата и успешно настапуваше за Гепингем, клубот од кој Јосип Периќ минатото лето дојде во Битола. Неговото доаѓање во Битола е голем чекор за клубот и уште едно репрезентативно име во ростерот на Жељко Бабиќ. Божиќ Павлетиќ е четврти хрватски интернационалец во ростерот за следната сезона на Еурофарм Пелистер по Мандалиниќ, Кушан и Мараш. Тој претставува четврто засилување за битолскиот клуб за сезоната 2021/22 по Кизиќ, Обрадовиќ и Табоада. Официјалното претставување на Божиќ Павлетиќ е закажано за почетокот на подготовките за следната сезона.

Ловро Јотиќ си заминува од редовите на РК Вардар 1961 по само една сезона.
Следната сезона Вардар дефинитивно ќе добие нешто поразличен изглед од тој кој го имаше сезонава, на клупата доаѓа Веселин Вујовиќ, а се очекуваат и понатамошни промени во таборот на актуелниот шампион.
Тимот на Лајпциг на својата официјална веб-страна го официјализираше неговото доаѓање во Бундес лигата. Јотиќ потпишува договор на една година, со опција истиот да биде продолжен за уште една сезона.
„Среќен сум што ќе бидам дел од тимот на Лајпциг следната сезона. Со доаѓањето овде, добивам шанса да настапувам во најдобрата лига во Европа. Ова е нов предизвик за мене кој со нетрпение го очекувам.“ – порача Јотиќ за официјалната страна на Лајпциг.