Ракометниот клуб Пролет потврди дека има промена на тренерската позиција. Нов шеф на стручниот штаб на клубот е Зоран Кастратовиќ, кој го наследи Никола Матлиески.
Пролет и Матлиески се разделија после четиригодишна соработка, а Кастратовиќ се врати по кратка пауза по заминувањето од Металург.
„Мило ми е што повторно ќе работам во квалитетен тим од македонскиот шампионат. Запознаен сум со квалитетите на Тинекс Пролет, верувам дека овој состав има потенцијал за да оствари добри резултати до крајот на сезонава. До крајот на сезонава имаме уште шест средби, а само со заедничка работа и максимална ангажираност можеме да стигнеме до она што сите го посакуваме – Тинекс Пролет да излезе во ракометна Европа. Благодарност до управата на клубот и верувам дека ќе ја оправдам нивната доверба“, рече Кастратовиќ.

Симе Симовски повеќе не е селектор на македонската женска ракометна репрезентација. РФМ на освојата официјална страница извести дека соработката со него е спогодбено раскината. „Ракометната Федерација на Македонија ја информира јавноста дека Македонската куќа на ракометот и Симе Симовски, на 22 април 2021 година, взаемно се спогодија да ја прекинат соработката за ангажманот на женските национални селекции. Ракометната Федерација на Македонија упатува благодарност за досегашниот ангажман на г. Симе Симовски кој ја извршуваше оваа функција непречено во периодот септември 2015 – април 2021 година. Управниот одбор на РФМ во периодот кој следи ќе назначи нов вршител на функцијата Селектор на женските национални селекции“, се вели во известувањето на РФМ.

Данските медиуми објавија дека Арон Палмарсон, еден од најдобрите ракометари во светот, ја напушта Барселона и ќе се пресели во екипата на Алборг. Палмарсон се согласил на соработка со данскиот тим во следните три сезони, а работата ќе биде официјално потврдена на лето. Исланѓанецот со години е еден од најдобрите ракометари на светот, а претходно играше за Кил и Веспрем. Тој е уште една голема ѕвезда на светскиот ракомет која се сели во данскиот тим, откако претходно за следната сезона беше обезбеден потписот и на најдобриот ракометар на денешницата, Микел Хансен. Алборг за следната сезона ги обезбеди и потписите на Мартин Ларсен (Лајпциг), шведскиот пивот Јеспер Нилсен (Рајн-Некар Ловен) и норвешкото десно крило Кристеин Бјорнсен (Вецлар).

Започнаа првите репрезентативни повици пред ЕХФ неделата која следи на крајот од месецот. Селекторот на хрватската ракометна репрезентација, Хрвоје Хорват и неговиот нов асистент, Ивано Балиќ, го објавија списокот на ракометари за Еврокупот против Словачка и Унгарија, кои ќе се одиграат кон крајот на овој и почетокот на следниот месец. На списокот на новиот предводник на „каубоите“ се најдоа 22 ракометари, меѓу кои младиот бек на Еурофарм Пелистер, Матео Мараш и кружниот напаѓач Томислав Кушан. Противници на Хрватска во оваа ЕХФ седмица ќе бидат Словачка и Унгарија, а натпреварите во Вараждин ќе се одиграат на 28 и 29 април.

Младиот голман на македонската репрезентација, Марко Кизиќ е нов ракометар на Еурофарм Пелистер за периодот од јуни 2021 до јуни 2024 година. 20-годишниот Кизиќ потпиша договор со битолскиот клуб и ќе ја зголеми конкуренцијата на голманската позиција. Овој млад голман доаѓа од Вардар, висок е 190 сантиметри, а тежок 89 килограми. Кизиќ веќе има искуство од настапи во Лигата на шампионите, а во новиот клуб ќе се приклучи по завршувањето на сезоната. Официјалната презентација на Марко Кизиќ ќе се одржи пред почетокот на сезоната 2021/22 во Битола.

Ракомет – Суперлига (плеј-оф) – Шесто коло Еурофарм Пелистер – Еурофарм Пелистер 2 28-21 (14-10) Спортска сала „Боро Чурлевски“ – Битола Судии: Даниело Божиновски и Виктор Начевски Еурофарм Пелистер ја запиша петтата победа во шестиот натпревар на плеј-офот, откако во првото битолско дерби сезонава го совладаа Еурофарм Пелистер 2 со 28-21 (14-10). Натпреварот беше коректен и натпреварувачки, а квалитетот и долгата клупа на фаворитот дојдоа до израз. Домаќините уште од самиот старт ја покажаа разликата во квалитет и во ниту еден момент не му дозволија на противникот да го доведе до прашање победникот на натпреварот. Стипе Мандалиниќ со осум гола беше прво име кај победникот, додека кај поразените Павле Атанасијевиќ заврши со четири гола.
Еурофарм Пелистер: Хендави, Чаневски 1, Мараш 2, Ојлески 3, Маркоски, Маџовски, Кукуловски 1, Мандалиниќ 8, Кушан 3, Стјепановиќ 1, Периќ 5, Костески 2, Петровски, Велковски, Граџан, Ѓукиќ 2 Седмерци: 4/4 Исклучувања: 4 минути
Еурофарм Пелистер 2: Ивановски, Бардакоски, Петковски, Пав. Атанасијевиќ 4, В. Димитровски 2, Митревски 1, Петровиќ 2, Андонов 1, И. Димитровски 2, С. Талевски 1, Стоилевски 3, Пет. Атанасијевиќ, Дрогришки 3, Блажевски, Арсеновски 2 Седмерци: 2/1 Исклучувања: 6 минути Во следното седмо коло, Еурофарм Пелистер гостува во Охрид, а Еурофарм Пелистер 2 на домашен терен го пречекува Бутел Скопје.

Женската сениорска репрезентација на Македонија денеска на пладне во хотелот „Русија“ во Скопје имаше собир пред двомечот со Романија во битката за пласман на светското првенство во Шпанија кое ќе се одржи кон крајот на оваа година.
Селекторот Симе Симовски за овој двомеч со Романките повика 20 ракометарки на скратениот список објавен минатата недела, кои денеска треба да му се стават на располагање пред првиот дуел кој треба да го одиграме на гости.
Првиот натпревар сениорките ќе го одиграат во Букурешт в сабота на 17 април во 17:00 часот, а реванш натпреварот е закажан на 21 април во 17:00 часот во СЦ „Јане Сандански“ во Скопје.

Уве Гансхајмер, кој ја има капитентската лента во тимот на Рајн Некар Левен, ќе мора да оди на операција на коленото, објавија денеска дел од германските медиуми. Тој ќе мора да го пропушти финишот од сезоната и нема да игра четвртфиналето во Европската лига против Чеховски Медведи. Во исто време, искусниот ракометар нема да се појави и во дресот на Германија на дуели против Босна и Херцеговина и Естонија во рамките на квалификациите за Европското првенство.

Селекторот на женската ракометна репрезентација, Симе Симовски, го објави поширокиот список со 35 ракометарки за бараж дуелот со Романија за пласман на Мундијалот во Шпанија.
Симовски додаде неколку нови имиња во однос на списокот кој го објави во пресрет на квалификацискиот турнир на кој Македонија победи и обезбеди пласман во баражот.
Првиот натпревар сениорките ќе го одиграат во Букурешт, Романија на 17 април во 17:00 часот, а реванш натпреварот за пласман на СП е закажан на 21 април во 17:45 часот во СЦ Јане Сандански.