Новиот ракометен суперлигаш Алкалоид ќе биде дел од традиционалниот турнир во Струга кој ќе се одржи од 16. до 20. август на познатата локација „Женска плажа“.

Досега своето официјално учество на турнирот го потврдија домашните екипи Еурофарм Пелистер, Вардар 1961 и домашната екипа Струга, а од странство учесници ќе бидат екипите на Целје Пивоварна Лашко, АЕК Атина и Татран Прешов.

Оваа година турнирот го слави јубилејното 50.издание и е еден од ретките турнири кој се одржува на отворено.

Ракометниот вицешампион на Македонија, Еурофарм Пелистер ќе има директно учество во групната фаза од Европската лига на ЕХФ.

Ракометарите од Битола нема да играат квалификациски натпревари за пласман во ова натпреварување после одлуката на ЕХФ екипата да има место заедно со тимовите на Бенфика, Фуксе Берлин, Пау, Јиштад, Кадетен Шафхаузен, Гранољерс, Балатонфуреди, Татран Прешов, Мотор Запорожје и Валур.

Во минатите две сезони на Европската лига, Еурофарм Пелистер успешно ја минуваше фазата по групи но понатаму во натпреварувањето беа елиминирани од Магдебург, односно Нексе.

Според многумина најдоброт играч на ракометниот клуб Вардар 1961, Тимур Дибиров е пред заминување од клубот.

Според пишувањата на хрватските медиуми, Русинот се договорил за трансфер во шампионот на Хрватска ППД Загреб.

Ваквиот потег на Дибиров беше за очекување после казната која ја доби Вардар од ЕХФ со која на клубот му се забранува настап во Лигата на шампионите за наредната сезона.

Тимур Дибиров го носеше дресот на Вардар девет години, и со клубот успеа двапати да ја освои Лигата на шампионите

Вчера во просториите на Ракометната федерација на Македонија беа извлечени групите за новата сезона во Женската лига.

За настап во новата сезона се пријавија 16 екипи, кои ќе бидат поделени во две групи и до крајот на годинава ќе одиграат по 14 кола.

Потоа екипите се делат на плеј-оф и плеј-аут во пролетниот дел од сезоната, кога ќе се играат по дополнителни осум кола со екипите од другата група.

Шампионот Ѓорче Петров се најде во групата Б, заедно со Металург, Стружанка и други екипи, додека вицепрвакот Куманово ќе игра во групата А заедно со Вардар, Чаир, како и новиот тим Скопје.

Првото коло од Женската лига ќе се игра на 10/11 септември.

Женска лига, сезона 2022/23:

Група А: Куманово, Вардар, Чаир, Пелистер, Шампион, Гевгелија, Спартак, Скопје

Група Б: Ѓорче Петров, Металург, Стружанка, Деспина, Овче Поле СУ, Астибо, Феникс, Кузман Вардар.

Македонскиот ракометен суперлигаш Тиквеш објави дека некогашниот репрезентативен голман на Македонија и голман на повеќе македонски клубови, како и селектор на нашата сениорска ракометна репрезентација, Данило Брестовац, ќе биде нов тренер на кавадаречкиот состав.

Брестовац до пред една година беше на селекторското место во нашата репрезентација, па по кусата интернационална кариера реши да се врати во Македонија и да го преземе тимот на Тиквеш.

Македонската ракометна репрезентација на следното СП во ракомет ќе игра во група со селекциите на Норвешка, Аргентина и Холандија.

Ждрепката сакаше Македонија да се најде во групата Ф и своите натпревари да ги игра во полскиот Краков.

Светското првенство во ракомет ќе се одржува во девет градови во Полска и Шведска од 11 до 29 јануари 2023 година.

Вчера беа формирани групите за новата сезона во ракометната Лига на шампиони во која нашава земја нема има претставник откако Вардар беше елиминиран на „зелената“ маса од страна на ЕХФ.

Во групата „А“ влегоа: Магдебург, ПСЖ, ГОГ Гудме, Веспрем, Динамо Букурешт, Висла Плоцк, Загреб и Порто за кој ќе брани нашиот, Никола Митревски. Во групата Б ќе играат: ПИК Сегед, Барселона, Целје, Кјелце, Кил, Нант, Алборг и Елверум.

Сезона ќе започне на 14 и 15 септември а ќе заврши со Ф4 турнирот во Келн на 17 и 18 јуни во 2023 година.

На ждрепката која се одржа во Виена, Европската ракометна федерација ги одреди групите во Лигата на шампионите за наредната сезона. Како што е познато Македонија сезонава што следува нема да има свој претставник во ЛШ поради одлуката за исфрлање на Вардар 1961 од натпреварувањето. Единствен македонски претставник во ЛШ останува голманот на Порто, Никола Митревски.

Група А: ПСЖ, Магдебург, ГОГ Гудме, Порто, Динамо Букурешт, Веспрем, Висла Плок, ППД Загреб.

Група Б: ПИК Сегед, Барселона, Целје, Киелце, Кил, Нант, Елверум, Алборг.

Новата сезона во најпрестижното ракометно натпреварување започнува на 15. и 16. септември.

Европската ракометна федерација денес ги објави имињата на клубовите кои ќе добијат специјална покана за настап во групната фаза од Лигата на шампионите следната сезона.

„Вајлд-карта“ за учество во ЛШ обезбедија екипите на ППД Загреб, Нант, Веспрем, Елверум, Висла Плок и Целје Пивоварна Лашко.

Овие екипи ќе им се приклучат на ГОГ Гудме, ПСЖ, Барселона, Магдебург, Кил, Пик Сегед, Киелце, Порто и Динамо Букурешт кои веќе си имаа обезбедено пласман во Лигата на шампионите.

Ракометниот клуб Еурофарм Пелистер ја информира јавноста дека за нов тренер на тимот е назначен Ларс Валтер од Данска.

56-годишниот стручњак со клубот од Битола потпиша двегодишен договор. Неговото официјално претставување ќе биде по неговото доаѓање во клубот пред стартот на подготовките.

Валтер во Македонија доаѓа од Полска каде беше тренер на Азоти Пулави. Претходно ги има водено екипите на Флензбург, Порто, Кадетен Шафхаузен, Висла Плок, Баја Маре, Горење, Емсдетен, Хилдехајм, Конверсано, и тимовите од Данска, Роар Роскилде, Есбјерг и Вирум.