Европската ракометна федерација ги одреди термините и за натпреварите од елиминациската фаза во второто по ранг натпреварување, Европската лига. Единствен македонски претставник во оваа фаза од натпреварувањето ќе биде Еурофарм Пелистер, кој ќе се соочи со некогашниот европски шампион Магдебург. Првиот натпревар ќе се игра во Битола, во спортската сала „Боро Чурлевски“ на 23 март со почеток во 20:45 часот. Реваншот ќе биде одигран една недела подоцна , односно на 30 март со почеток во 18:45 часот во „Гетек Арена“ во Магдебург.

Еден од најсимпатичните ракометари на неодамна завршеното Светско првенство во Египет беше пивотот на Конго, Тиери Готје Мвумби, горостасот од 137 килограми. Веднаш по завршувањето на првенството му пристигнаа низа понуди за продолжување на кариерата. Првенството го заврши со 20 погодоци на своето конто, а за овој член на француски четвртолигаш интерес пројавија неколку шпански клубови. Според пишувањата на шпанските медиуми, Мвумби има неколку конкретни понуди од тамошни прволигаши, но се уште не се знае за кој клуб ќе потпише. Според официјалните податоци, Мвумби е тежок 137 килограми и висок 195 сантиметри.

Одлуката на Европската ракометна федерација со која исходот на одреден број натпревари од ракометната Лига на шампиони беа решени со службен резултат, донесе многу негодувања меѓу клубовите.
Најжестоко реагираа од бундеслигашот Флензбург, кој со службен резултат го загуби натпреварот со нашиот Вардар, но и неодиграниот дуел со Порто.
ЕХФ образложи дека предвид се земени причините поради кои не се одиграни средбите, но германскиот тим е лут на федерацијата.
„Одлуката на ЕХФ е показател како ги носат одлуките без дијалог со клубовите. Ние ја одигравме најдобрата групна фаза досега, имавме три натпревари помалку и само два бода заостанување зад првопласираниот Кјелце, сега чуството е горчливо. На крајот можеме да завршиме на третото место, иако со игрите заслуживме да ја скокнеме осминафиналната фаза“, изјави тренерот Мајк Макула.

Кирил Лазаров во улога на селектор и воедно капитен на нашата ракометна репрезентација го објави скратениот списокот за квалификациските мечеви против Данска за пласман на Европското првенство во 2022 година.
Првиот список кој имаше 35 играчи сега е скратен и има 23 ракометари. Тука се крилата Дејан Манасков и Гоце Георгиевски кои не играа на СП во Египет. Собирот е закажан за 6 март.
Дуелите со Данска се играат на 11 март во Скопје и на 14 во Алборг.

Данскиот ракометен првак Алборг прави фантастична работа на трансфер пазарот. Откако нивната репрезентација го освои Светското првенство, сега данците тргнуваат во поход и по титулата европски клупски првак. Се започна откако неодамна објавија дека Микел Хансен во 2022 година ќе го напушти ПСЖ и ќе премине во Алборг. Тоа ќе биде одлично засилување за клубот во чија екипа се тројца репрезентативци на Данска (Хенрик Молгард, Магнус Саугструп и Мадс Кристенсен), и исто толку репрезентативци на Шведска (Феликс Клар, Микаел Агефорс и Лукас Сандел). Меѓутоа, Алборг не застанува тука. Веќе наредното лето им доаѓаат неколку сјајни играчи, меѓу кои се истакнува ѕвездата на Барселона, Арон Палмарсон. Со него, нови играчи на Алборг ќе бидат и капитенот на норвешката репрезентација Кристијан Бјорнсен, пивотот на Рајн-Некар, Јеспер Нилсен, Јакоб Холм и десното крило на Киелце, Сигвалди Гудјонсон. Освен Хансен, летото 2022. година ќе им се придружат уште четири вонсериски играчи. Заедно со Јеспер Нилсен, Алборг доведува уште двајца шведски пивоти, Андреас Нилсон и Макс Дарџ. Од Фленсбург доаѓа данскиот репрезентативец Мадс Менсах Ларсен, додека големо засилување на голот ќе биде и еден од најдобрите голмани на светот, Никлас Ландин. Така, за само две години Данска на сензационален начин ќе создаде нова сила во светскиот клупски ракомет, сочинета исклучиво од играчи од Данска, Шведска, Норвешка и Исланд.

Поранешниот селектор на Македонија, Ивица Обрван ќе ја води репрезентацијата на Босна и Херцегговина. Обрван на селекторот столче во БиХ седнува откако си замина Билал Шуман. Шуман беше сменет од Управниот одбор на бсанската ракометна репрезентација. Селектор на Македонија Обрван беше три години (2013-2016) и ја водеше Македонија на две Европски првенства (2014 и 2016) и едно Светско (2015).

Европската ракометна федерација (ЕХФ) го одложи натпреварот од деветтото коло на групата Д во Лига Европа помеѓу Еурофарм Пелистер и Рајн Некар Левен.
Причината е неможноста германскиот клуб да допатува во Битола, а целосно да ги испочитува мерките за заштита во ковид-криза донесени од германската влада. Рајн Некар Левен мора во рок од 48 часа да пристигне во Македонија со негативен ковид-тест, да го одигра натпреварот и да се врати дома. Клубот од Бундеслигата не пронајде таква опција и побара од ЕХФ одложување.
РК Еурофарм Пелистер ја прифаќа одлуката на Европската ракометна централа и очекува информации за нов термин за одигрување на натпреварот. Во меѓувреме клубот и тимот ќе се насочи на следните натпреварот против Татран Прешов во СЕХА Гаспром лигата и против Кадетен Шафхаузен во Лига Европа.

Откако девет години настапуваше за ПСЖ, најдобриот ракометар на светот Микел Хансен се одлучи да ја напушти Франција.
Дански ТВ2 Спорт пишува дека легендарниот 33-годишен дански ракометар од летото 2022. година ќе биде член на Алборг, со кој потпиша договор на три години.
Со оглед на тоа што со најбогатиот клуб на светот не успеа да дојде до трофеј во Лигата на шампионите, единствената титула која му недостасува во богатата ризница, се очекуваше дека ќе го загуби трпението во Париз и дека ќе замине, но шокираше со одлуката за новиот клуб, бидејќи бројни стручњаци сметаа дека ќе се приклучи на некој од великаните со кој ќе тргне по долгоочекуваниот трофеј во Лигата на шампионите.
За Хансен, Алборг ќе биде петти клуб во кариерата по Гудме, Барселона, Копенхаген и ПСЖ. Хансен три пати беше прогласуван за најдобар ракометар на светот, а со Данска беше олимписки, европски и два пати светски првак.