Денес во Атина почнува Европско првенство во кик-бокс во машка и женска конкуренција. На овој голем собир настапат петмина македонски натпреварувачи.

Во женска конкуренција, Леа Бошевска е пријавена во кик-лајт во категоријата до 50 килограми, а Андреа Костовска во кик-лајт до 55 килограми.

Во машкиот состав се Мите Ашкилов во кик-лајт во категоријата до 94 килограми, Бобан Илиоски во лоу-кик до 86 килограми и Стефан Михајловски во кик-лајт во категоријата над 94 килограми.

На Европското првенство кое се одржува до 10 ноември пријавен е настапот на 982 кикбоксери од 41 земја.

Американската пливачка Реган Смит е нов светски рекордер на 200 метри грбно.

За само два дена Смит постави два нови светски рекорди. Откако постави магично време од 54.27 на 100 метри грбно , Смит блесна и на трката на 200 метри НА Светскиот куп во Сингапур.

Таа ја заврши трката со фасцинантни 1:58,83, што сега е нов светски рекорд – 0,11 секунди побрзо од рекордот кој важеше од ноември 2020 година и го држеше Кајли МекКеон. Второто место на трката го зазеде Анастасија Шкурдаи (2:01.63), додека трета Јона Андерсон (2:01.98).

Деновиве тим од четири атлети од Специјална Олимпијада Македонија учествуваше на Европската пливачка средба на Специјална Олимпијада во Монако, под покровителство на принцезата Шарлин.

Во конкуренција од 180 натпреварувачи, атлетите – пливачи од нашата држава освоија вкупно три медали.

• Јулијана Петровска се натпреваруваше на 50 метри пливање во слободен стил, пласирајќи се на четвртото место, а ја освои бронзата во категоријата 25 метри грбно пливање.
• Катерина Петковска имаше силен настап, освојувајќи го четвртото место и на 25 метри слободен стил и на 25 метри грбно пливање.
• Стефан Трпковски се истакна со два бронзени медали, пласирајќи се на третото место во категоријата 25 метри грбно и во 25 метри пливање во слободен стил.
• Марио Мицковски покажа извонредна издржливост, натпреварувајќи се на 50 метри и на 100 метри пливање во слободен стил каде постигна најдобри времиња, но од здравствени причини не настапи на финалните трки.

Претседателката на Специјална Олимпијада Македонија, Моника Бошкоска, ја изрази својата воодушевеност од напорите на тимот и покрај огромната конкуренција.

„Нашите атлети демонстрираа дека со решителност, редовни тренинзи и посветеност, може да се постигне извонреден успех на меѓународна сцена. Ова е еден од бројните успеси на атлетите на Специјална ОлимпијадаМакедонија, кои продолжуваат да нѐ претставуваат во најдобро светло и да ја прават Македонија горда. Докажавме дека можеме да се носиме и со најголемите светски сили, да победуваме и да освојуваме медали. Ја користам оваа прилика да му честитам на тренерот и селектор Игор Димоски кој со своето искуство и посветеност е заслужен за успесите на нашата пливачка делегација. Огромна благодарност до организаторите и принцезата Шарлин што беа домаќини на ваков инспиративен настан кој во пракса ја покажува моќта на спортот и улогата која ја има во инклузијата на лицата со интелектуална попреченост“, рече Бошкоска.

Под покровителство на принцезата Шарлин, Европската пливачка средба на Специјалната Олимпијада обедини на едно место голем број атлети – пливачи од 27 европски земји на култниот стадион „Луј Втори“ во Монако. Учесниците се натпреваруваа во пливање во неколку категории: 25, 50 и 100 метри слободен стил на пливање, грбен и граден стил на пливање.

Специјална Олимпијада Македонија останува посветена на зајакнување на атлетите со интелектуална попреченост, обезбедувајќи им можности да го постигнат својот целосен потенцијал преку употреба на трансформативната моќ на спортот.

Австралиецот Оскар Пјастри од тимот на Мекларен ја освои најдобрата стартна позиција пред саботната спринтерска трка за Големата награда на Бразил на патеката Интерлагос.

Пијастри ја освои пол-позицијата со време од 1:08.899 минути. Австралиецот беше само 0,029 секунди побрз од британскиот тимски колега Ландо Норис, додека Шарл Леклер од Монако во болидот на Ферари беше трет со 0,254 секунди заостанување.

Актуелниот светски шампион и лидер во генералниот пласман Холанѓанецот Макс Верстапен во Ред Бул беше четврти.

Од третиот ред ќе стартуваат Шпанецот Карлос Саинц (Ферари) и Британецот Џорџ Расел (Мерцедес).

Спринт трката е на саботната програма, додека Бразилското ГП е в недела.

Леон Маршан на третиот митинг од Светскиот Куп во пливање во Сингапур, собори светски рекорд кој од 2012 година Рајан Лохти.

Еден од хероите на последните Олимписки игри во Париз повторно го воодушеви светот со неверојатна трка, овој пат на 200 метри мешано, која ја заврши за време од 88 минути.

Претходниот светски рекорд кој го држеше Лохти во 2012 година беше 1:49.63.

Маршан на тој начин продолжи да доминира на азиската турнеја. Пливаше во Шангај, па во Инчон без вистинска конкуренција за да блесне во Сингапур и да ја потврди својата репутација на најбрз пливач на денешницата.

Македонската футсал репрезентација до 19 години ќе игра против Естонија и Гибралтар во рамки на прелиминарната група Ц на стартот од квалификациите за пласман на Европското првенство 2025, одлучено е денеска со ждрепка во седиштето на УЕФА во Нион.

Прелиминарните квалификации ќе се одиграат од 21 до 16 јануари идната година, а само првопласираните репрезентации од трите групи напролет ќе ги продолжат евроквалификациите во главната фаза.

Победникот од прелиминарната група Ц во главната фаза ќе биде дел од групата 6 во која се домаќинот Чешка, Полска и Грција.

Домаќин на Европското првенство во футсал за играчи до 19 години, четврто по ред, ќе биде Молдавија од 28 септември до 5 октомври идната година.

Кејт Даглас повторно го собори светскиот рекорд на 200 градно во кратки базени (25 метри).

Американката на третиот митинг од серијата на Светскиот купо во Сингапур ја запре стоперката на неверојатни 2:12.72 минути.

За речиси секунда и половина го подобри сопствениот личен и светски рекорд (2:14.16), кој го постави пред само шест дена на натпреварот во Инчеон, Јужна Кореја.

Првиот ден во Сингапур го одбележа и Лео Маршанд. Четирикратниот олимписки шампион победи на 100 мешано со 49,92, што е рекорд во Светскиот куп. Светскиот рекорд и понатаму е во сопственост на Кејлеб Дресел со 49,28 секунди.

Возбудливата сезона во Формула 1 доби нов заплет во Мексико каде Карлос Саинц победи по втор пат оваа сезона и ја направи борбата за шампионската титула уште покомплицирана и во конкуренција на возачи и во конструктори.

Брилијантниот старт на Верстапен во оваа сезона навестуваше дека Холанѓанецот лесно ќе дојде до нова шампионска титула. Сепак, тоа не се случи. По последната победа на Ред Бул во Шпанија имавме четири различни победници, Ферстапен победи седум пати, по еднаш славеа Саинц, Норис и Леклерк.

Но, она што се случи по Шпанија беше сè освен очекувано на многу начини. Прво, Ред Бул се во серија од десет трки без победа, што се нема случено од 2014 и 2015 година кога имаа низа од 30 трки без победа.

Второ, добивме уште три различни победници од трката во Австрија, со што вкупниот број на победници се искачи на седум. Ова се нема случено од 2012 година кога осум различни возачи беа на највисокото скалило на подиумот.

Но, последното нешто што отиде уште подалеку во минатото е бројот на возачи со најмалку две победи, по победата на Саинц во Мексико сега е шест, две Ферари (Леклер и Саинц), два Мекларен (Норис и Пјастри), Мерцедес (Хамилтон) и Ред Бул (Верстапен).

Последен пат таква ситуација беше во 1981 година, кога исто така шест возачи имаа најмалку по две победи, првите петмина и седмопласираниот во генералниот пласман таа сезона.

Тоа беа шампионот Нелсон Пике, кој ја освои својата прва од трите титули, Карлос Ројтман, шампионот од 1980 година Алан Џонс, Жак Лафит, Ален Прост и Жил Вилнев кој беше седми.

Светски познат стручњак за пинг-пинг деновиве е во Битола. Словенецот Јозе Урх веќе два дена работи на тренинг камп со македонските надежи.

Од 28 октомври до 1 ноември шеснаесет млади пинг-понг таленти се пријавија на тренинг камп со експертот и организатор на тренинг-кампови ширум светот.

„Со оваа акција продолжуваме со вложување во младите таленти, но и истовремено помагаме на клубовите во подигнување на нивото на тренинг“, велат од федерацијата.

Тренерот од Словенија е светски познат стручњак кој во соработка со Меѓународната пинг-понг федерација (ИТТФ) организираат тренинг кампови во Европа и низ светот.

Министерот за спорт Борко Ристовски денес оствари билатерална средба со министерот за спорт и млади на Република Црна Гора, г-дин Драгослав Шќекиќ и со членови од неговиот кабинет

На средбата беа разменети мислења и искуства во реализацијата на програми и проекти кои имаат за цел подобрување на условите за спортистите и унапредување на спортските активности во двете држави.

Министерот Ристовски изрази уверување дека оваа средба ќе биде почеток на плодна соработка преку која Република Македонија и Република Црна Гора ќе успеат да ги издигнат спортските постигнувања на регионално и на меѓународно ниво.

„На средбата изразивме обострана заложба за продлабочување на спортските врски меѓу двете блиски земји. Од министерот Шќекиќ добивме покана да потпишеме меморандум за соработка помеѓу двете министерства и очекувам дека ќе имаме одлична соработка во иднина. Верувам дека преку заеднички иницијативи ќе успееме да го подигнеме спортот на повисоко ниво“ – истакна министерот Ристовски.

Министерот Драгослав Шќекиќ го поздрави формирањето на македонското Министерство за спорт и изрази огромно задоволство од денешната средба.

„Како голем вљубеник во ракометот особено задоволство ми претставува што мој колега министер во македонското Министерството за спорт е токму познат ракометар како Борко Ристовски. Сигурен сум дека ќе имаме и други вакви средби и одлична соработка“ – рече министерот Шќекиќ.