Дејан Георгиевски ја забележа и втората победа во категоријата + 80 кг. По стартниот триумф над Шпанецот Иван Гарсија Мартинез, овојпат во четвртфиналето нашиот натпреварувач славеше и против првиот носител Икаро Мигел Мартин Соарес од Бразил.

На најелитниот и најважниот турнир во теквондото, по Светското првенство, Георгиевски во две рунди со 2-0 (9-5, 6-0) го елиминираше Соарес.

Со овие две победи Македонецот има сигурна бронза, а сега ќе атакува за влез во финалето и борба за златниот медал.

Георгиевски испишува нова историја во Ријад, триумфираше против вториот и третиот таеквондист на светската ранг листа и чекори кон нови бодови кои ќе му обезбедат олимписка норма.

Австралијанецот Даниел Рикардо во наредната сезона на Формула 1 шампионатот ќе биде трет возач во екипата на Ред Бул.

33-годишниот Рикардо оваа сезона возеше за Мекларен, а сезоната ја заврши на 11.место во генералниот пласман со освоени 37 бода. Рикардо во минатото веќе возеше за Ред Бул од 2014 до 2018 година.

Наредната сезона за екипата на Ред Бул повторно ќе вози тандемот Макс Верстапен и Серхио Перез.

Седумкратниот светски шампион во Формула 1, Луис Хамилтон изјави дека се надева дека оваа тешка сезона ќе му даде сила на неговиот тим Мерцедес да тргне во предизвик за нови титули веќе следната сезона. Со трката во Абу Даби заврши сезоната во Формула 1, а годинава подиумот беше наменет за возачот на Ред Бул, Макс Верстапен, кој ја освои втората последователна титула, а неговиот тим беше најдобар и во конкуренција на конструктори.

За првпат во својата 16-годишна кариера, Хамилтон не успеа да забележи победа во една сезона во Формула 1. Сезоната ја заврши на шестото место, а Мерцедес финишираше како трет кај конструкторите.

„Во следните неколку недели, ќе се вратиме во фабриката за да почнеме со напорна работа. Се надевам дека борбите низ кои поминавме оваа година ќе ни даде сила за да се бориме за уште многу титули“, изјави Хамилтон.

„Мислам дека оваа сезона беше повеќе тест за тимска работа и јас сум многу, многу горд и благодарен на сите што продолжија да работат со мене“, додаде Хамилтон, кој го држи рекордот за најмногу победи во Формула 1 со 103.

Македонската параолимпијка Оливера Наковска Бикова, предводена од нејзиниот тренер Бранимир Јовановски и асистентот Драган Дојчиноски, го освои златниот медал на Светското првенство во стрелаштво во Ал Аин. Наковска Бикова беше најдобра и ја освои титулата светски шампион во дисциплината П4-Пиштол слободен избор.

Во квалификациите Оливера испука одличен резултат од 538 (најдобар во нејзината кариера) со што го освои второто место и си обезбеди пласман во финалето.

Во самото финале, Оливера по првите пет истрели се најде на второто место на табелата, а веќе по завршување на втората серија од пет истрели ја презеде лидерската позиција и успеа да оди до крај, до последниот куршум, иако финалето беше драматично и мошне квалитетно.

Четирикратниот шампион во Формула 1, Германецот Себастијан Фетел, во изјава за германските медиуми вели дека не ја исклучува можноста да се врати на настапите во Ф1, откако претходно најави дека ова е негова последна сезона во кариерата.

Фетел својата последна трка ќе ја има во Абу Даби, а како главна причина за повлекувањето од Ф1 ја наведува желбата за поминување повеќе време со семејството и можноста да започне некои нови проекти.

„Во моментот мојата одлука е да престанам со тркањето во Формула 1, но можеби за година или две ќе имам поинакви размислувања и не можам да исклучам враќање на трките во иднина“, изјави Фетел.

Возачот на Мерцедес, Џорџ Расел, е победник на Формула 1 трката за Големата награда на Бразил, со што ја забележа својата прва победа во шампионатот.

Расел после спринт трката, победи и во главната трка на патеката Интерлагос, а второто место му припадна на неговиот тимски колега Луис Хамилтон. Како трет на целта пристигна Карлос Саинц од Ферари.

Последната трка во сезоната се вози наредната недела во Абу Даби.

Високите трошоци за енергија ги натераа италијанските организатори да ги преместат трките од Светскиот куп во крос-кантри скијање од центарот на Милано во планинското одморалиште Ливињо, соопшти ФИС.

Италијанската федерација за крос-кантри скијање соопшти дека организирањето на спринтерските трки на 21 и 22 јануари ќе бара премногу енергија за производство и складирање на вештачки снег со оглед на очекуваните високи температури.

ФИС изврши увид на патеката во Ливињо и ја одобри програмата која ќе се одржи на 21 јануари.

Повеќекратниот Формула 1 шампион, Британецот Луис Хамилтон ја доби титулата почесен граѓанин на Бразил.

Церемонијата за доделување на признанието се случи во бразилскиот парламент, а во пресрет на одржувањето на Ф1 трката за Големата награда на Бразил.

Хамилтон изрази голема благодарност до бразилскиот народ за добиената чест што ќе биде државјанин на земјата од каде потекнува неговиот идол Аиртон Сена.

Поранешниот шаховски светски првак, Анатолиј Карпов се здобил со повреда на главата по пад во влезот од својот дом. Неговата сопруга за руските медиуми соопшти дека Карпов се здобил со повреда на главата и е во болница во Москва.     

„Во саботата го напуштивме влезот со него. Се лизна и падна. Кога стана, куцаше. Мислевме дека ја повреди нога. И отидовме во болница. Таму го задржаа. Му рекоа, дека нешто не е во ред со главата и дека има мал хематом. Според моите информации тој е свесен и не е многу страшна повредата. Треба да биде на опсервација три дена. Се надевам дека се работи за обична повреда“, изјави Наталија Буланова. 

Од друга страна, „Известија“ објави дека Анатолиј Карпов е приклучен на апарати и е во вештачка кома поради дијагностициран церебрален едем, скршеници и повеќе хематоми на главата. Покрај тоа, неговата состојба е комплицирана и од хронични заболувања.

Американската пливачка Кети Ледецки постави нов светски рекорд во кратки базени во дисциплината 1.500 метри слободен стил, испливувајќи ја патеката на ФИНА Светскиот куп во Торонто за речиси десет секунди побрзо од досегашното најдобро време кое беше во сопственост на Германката Сара Велброк.     

Ледецки, која во кариерата има освоено десет олимписки медали, ја исплива патеката во време од 15:08.24 минути, што беше за повеќе од 40 секунди побрзо од второпласираната Беатриз Дизоти од Бразил (15:48.82). 

„Ова беше прв пат да пливам во оваа дисциплина во кратки базени и не знаев што да очекувам“, изјави Ледецки, која е актуелна олимписка и светска првенка на долги патеки.