Швеѓанецот Арманд Дуплантис повторно го собори светскиот рекорд во скок со стап во сала, овој пат на планетарниот собир во Белград прескокнувајќи 6,20 метри.

Популарниот Мондо во третиот обид го собори светскиот рекорд. Тој така го надмина својот досегашен најдобар планетарен резултат од 6,19 метри, кој го направи само две недели претходно, исто така во Арената во Белград.

„За само две недели поставив два нови светски рекорди на исто место, овој град е посебен за мене“, изјави Дуплантис.

Тој и претходно го обебзеди златото, бидејќи беше единствениот натпреварувач кој прескокна шест метри (6,05). Во својата кариера Швеѓанецот има олимписко злато (2021), светско сребро (2019) и европско злато (2018) на отворено. Минатата година ја понесе титулата шампион и на континенталниот шампионат во сала.

Возачот на КТМ, Мигел Оливеира, победи на трката за Големата награда на Индонезија, која беше втора од овогодинешниот Мото ГП шампионат.

Трката се возеше по дождливо време и истата започна после повеќе од еден час одложување. Португалскиот мотоциклист на патеката „Мандалика“ ја оствари својата четврта победа во кралската класа, и вкупно 16. во кариерата.

Второто место на трката го освои бранителот на титулата, Фабио Квартараро на Јамаха, додека трет беше возачот на Прамак Дукати, Жоан Зарко.

Најпопуларното атлетско натпреварување „Дијамантската лига“ им забрани на руските и на белоруските атлетичари настап на сите митинзи од оваа атлетска лига „во догледна иднина“, соопштија организаторите.

На почетокот на овој месец, Светската атлетика им забрани на спортистите, помошниот персонал и официјалните лица на двете земји да се појавуваат на сите настани во догледна иднина.

„Дијамантската лига ја прифати препораката на одборот и сите атлетичари од Русија и Белорусија ќе бидат исклучени од сите митинзи на Дијамантската лига во догледна иднина“, соопштија организаторите.

Шефот на Ферари, Матија Биното, стави крај на претпазливите забелешки пред почетокот на сезоната во Формула 1 и најави дека Скудерија ќе се бори за победа.

„Верувам дека ќе бидеме многу силни во Бахреин, веќе постигнавме добри резултати на тестовите. Мислам дека и Ред Бул се многу силни, можеби Верстапен ќе биде во водство, но разликите ќе бидат мали. Да се задоволиме со второто место? Не, ќе започнеме со идејата за најдобар можен резултат“, изјави Биното.

До крајот на 2020 година, во Маранело им беше забрането да сонуваат за победи поради лошите перформанси на „Црните коњи“, но минатата сезона видовме дека Саинц и Леклерк се се поблиску до челото, додава изданието.

Седумкратниот светски шампион Луис Хамилтон го именуваше Ферари за сериозен фаворит за оваа сезона по првите тестови во Барселона, каде Италијанците покажаа дека нивниот нов болид Ф1-75 е брз, сигурен и стабилен.

Бразилскиот парламент размислува да му додели почесно бразилско државјанство на седумкратниот светски шампион во Формула 1, Луис Хамилтон. Британецот има комплициран однос со локалните фанови на Формула 1 – тој и Бразилците имаат заеднички идол – Аиртон Сена, но во 2008 година Луис го победи Фелипе Маса во битката за светската титула, откако во последниот круг го престигна Тимо Глок, кој едвај се движеше на патеката.

А минатата година Хамилтон забележа неверојатна победа на трката за Големата награда на Бразил во Сао Паоло, која повторно ги освои Бразилците во неговата земја. Британецот стартуваше последен во спринтерската трка, стигна до 10-тата позиција за главната трка и потоа ја освои. По финалето Хамилтон ја направи почесната турнеја со бразилското знаме, а малку подоцна со себе го искачи на подиумот.

Еден од најдобрите квотербекови на сите времиња, Том Брејди синоќа 

објави дека се враќа од пензија и дека оваа сезона ќе игра за Тампа Беј во НФЛ лигата.

„Во последните два месеци сфатив дека местото ми е на теренот, а не на трибините. Ќе има време и за тоа, но не е сега. Ги сакам моите соиграчи и го сакам моето семејство кое ме поддржува. Тие направија ова да е реално. Се враќам. И во мојата 23-та сезона ќе играм за Тампа“, изјави Брејди.

Брејди во текот на кариерата освои седум титули во Суперболот, од кои во 2020 година и со Тампа Беј.

Легендарниот Том Брејди ќе ја продолжи својата НФЛ кариера. Тој се предомисли и преку објава на социјалните мрежи потврди дека и наредната сезона ќе го носи дресот на Тампа Беј Баканирс.

„Во последниве два месеци сватив дека моето место и понатаму е на теренот, а не на трибините. Ги сакам моите соиграчи, и го сакам моето семејство кое ми дава поддршка. Без нив ништо од ова не би било можно. Се враќам за својата 23.сезона во Тампа. Имаме недовршена работа“, порача Брејди.

44-годишната легенда на спортот, претходно на 1.февруари објави дека става крај на 22 години долгата играчка кариера, во која освои седум титули, но на радост на огромниот број негови фанови, тој ја промени одлуката и одлучи да се врати на теренот.

Возачот од Велика Британија, Луис Хамилтон, има мислење дека неговиот Ф1 тим Мерцедес, нема да биде подготвен за победа на првата трка од сезоната, која ќе се вози наредниот викенд во Бахреин.

Тимот на Мерцедес се соочил со големи проблеми на последните тестирања пред стартот на новата сезона.

„Во овој момент мислам дека нема да се бориме за победа“, изјавил Хамилтон пред медиумите.

„Ќе ни биде потребен подолг период за да ги решиме проблемите кои се појавија. Сите во екипата го даваат својот максимум за да бидеме во состојба да го извлечеме најдоброто од болидот пред закажаниот старт на сезоната“, потенцира Хамилтон.

Рускиот боксер, Андреј Федосов, ќе биде новиот противник на Кубрат Пулев. Мечот е закажан за 14 мај во Форум салата со 17.000 седишта во Инглвуд, Калифорнија.

Пресметката ќе биде во 10 рунди. Федосов, кој има 32 победи од кои 26 со нокаут и само 3 порази во професионалниот ринг,  долги години, живее во САД.

Русинот има 8 последователни победи а неговиот последен пораз беше со технички нокаут од Брајант Џенингс на 14 јуни 2013 година.

Претседателот на Светската атлетика, Себастијан Коу, објави дека Белорусија доби забрана да биде домаќин на меѓународни настани.

„Светскиот атлетски совет одлучи да воведе санкции за Белоруската атлетска федерација.Тие вклучуваат забрана за организирање меѓународни натпревари“, рече Коу.

На 1 март, Светската атлетика одлучи привремено да го забрани учеството на руски и белоруски спортисти на сите собири под покровителство на организацијата. Одлуката е донесена поради воената акција во Украина.