Поминаа нешто повеќе од седум години од несреќата на Михаел Шумахер на француските Алпи, а јавноста наскоро би требала да дознае во каква состојба се наоѓа некогаш најдобриот возач на Формула 1 во светот.
Имено, веќе се снима документарец за Формула 1 великанот, кој едноставно ќе се вика „Шумахер“. Веста ја потврди и портпаролот на семејството, а освен пресек на неговиот живот и кариерата, ќе се зборува и за несреќата, а режисерите на располагање ќе добијат и фотографии од Шумахер од последните седум години по истата.
Од 2013. година, доста малку се знае за здравствената состојба на Шумахер, а информациите најмногу доаѓаат од извори блиски на семејството, не од самото семејство.
Потврдено е дека во документарниот филм ќе зборуваат и членови на семејството, сопругата на Михаел, таткото Ралф, ќерката Џина-Мариа и синот Мик, кој неодамна избори влез во Формула 1.
Шумахер веднаш по таа несреќа при скијање во 2013. година беше со хеликоптер пренесен во најблиската болница, каде докторите потврдија дека неговата состојба е сериозна. Беше пренесен во француски Гренобл, каде подлегна на две операции, а потоа беше ставен во индуцирана кома како би се сочувале што повеќе од неговиоте мозочни функции.

Сала, најстудениот град во Финска во Лапонија, објави дека ќе се кандидира за домаќин на Летните Олимписки Игри во 2032. година во рамки на кампањата за подигнување на свеста за последиците од глобалното затоплување. Малиот град кој е свестен северно од Арктичкиот круг, каде температурите од 50 степени под нулата не се невообичаени, ја најави својата кандидатура признавајќи дека тоа е „луда идеја“, но со сериозна порака. „Нашата намера тука е јасна: сакаме да ја сочуваме Сала таква каква што е, а нашите зими да останат студени и исполнети со снег.“ – изјави градоначалникот на Сала, Ерки Паркинен. „Така се роди оваа луда идеја: да се организираат летните олимписки игри во еден од најстудените градови на светот.“ Тој додаде дека доколку Сала ги организира ОИ 2032. година, тоа ќе значи дека температурите продолжиле да растат. Кандидатурата на Сала ја следат сите елементи на сериозен кандидат, вклучувајќи го логото, маскота, униформи, книга за кандидатурата и промотивни активности. Меѓународниот олимписки одбор за домаќин на Игрите во 2032. година ќе одлучува пред 2025. година, а веќе неколку градови, освен Сала, изразија интерес за домаќин. Тоа се Доха, Мумбај и регионот Рајна-Рур во Германија.

Јован Стојоски се избори за учество на Европското првенство во сала за сениори и сениорки, кое на програмата е од 5 до 7 март во Полска, откако триумфираше на Атлетскиот митинг „Црвена Звезда“, кој изминатиов викенд се одржа во Белград, соседна Србија. Стојоски прв мина низ целта на 400 метри, триумфирајќи со време 47 секунди и 57 стотинки, поправувајќи личниот рекорд. Атлетичарот на АК Охрид освојувајќи 1069 бодови според ИААФ рејтингот ја исполни нормата и ќе биде дел од континенталниот собир во Полска. Во следниов период, Стојоски, сигурно ќе го „нападне“ рекордот на Исмаил Мачев на 400 метри, стар 34 години. Стојоски на митингот во Белград заостана само осум стотинки. Покрај Стојоски, со златен медал во Белград се закити и Дарио Ивановски. Најдобриот атлетичар во Македонија победи на 3 000 метри, со време од 8 минути, 5 секунди и 98 стотинки.

Минатогодишните победници на Суперболот, Кансас Сити Чифс на свој терен ги победија Бафало Билс со 38:24 во финалето на АФЦ, па на 7. февруари во Тампа ќе се обидат да го повторат триумфот од минатата сезона, а противници ќе им бидат Баканирс, кој во НФЦ финалето славеа со 31:26 на гостувањето кај Грин Беј Пекерс.
Во Грин Беј, Тампа предводена од 43-годишниот Тмо Брејди стигна до победа и стана првак во својата конференција, па избори место на 55. Супербол кој ќе биде одигран на стадионот Рејмонд Џејмс во Тампа, каде Бакси ги играат своите домашни натпревари.
Двобојот во Грин Беј беше решен со одличната одбрана на гостинската екипа и изведбата на Брејди во првите 35 минути, по кои Тампа водеше со 28:10, а нивниот 43-годишен лидер имаше три одлични додавања за тачдаун.
Брејди во претходните девет настапи на Супербол има шест победи со Њу Ингланд, кој го напушти сезонава по цели 20 години.
Канзас Сити ќе се обиде да ја одбрани титулата, а последна екипа на која тоа и успеа беше Њу Ингланд, кој во 2003. и 2004. беше предводен до својата втора и трета титула токму од Том Брејди.

Славната италијанска Ф1 екипа Ферари, потврди дека има договор со 16-годишната холанѓанка Маја Војг, кој ќе стана првата жена дел од возачката академија на Ферари во Ф1. Војг беше победник на петдневниот камп во седиштето на тимот и на тест возењата во Маранело и Фиорано, а бидејќи како женско беше побрза од поголемиот број нејзини противници, ќе добие прилика да се натпреварува во првенството Формула 4. Директорот на Академијата, Марко Матаса изјави дека таа постигна најголем број на поени од сите во историјата на кампот. „Ова е клучен момент во историјата на Скудерија Ферари и неговата академија.“ – изјави шефот на Ф1 тимот, Матија Биното, кој додаде дека доаѓањето на Маја е јасен показател на Ферари дека мото-спортот е се поинклузивен и рамноправен. Војг е родена во Шпанија, има мајка од Белгија и татко од Холандија. Академијата на Ферари досега помогнала на пет возачи да стигнат до Формула 1, вклучувајќи го возачот на Ферари Чарлс Леклерк и дебитантот Мик Шумахер. Формула 1 немала жена возач да се натпреварува за Големата наградата уште од покојната италијанка, Лела Ломбарди во 1976. година.

Јапонските власти одлучно ја демантираат гласината дека Олимписките игри во Токио нема да се одржат годинава. Вториот бран на пандемијата на КОВИД-19 жестоко ја погоди Јапонија, а според анкетите, 77 отсто од јапонците сметаат дека Олимписките игри треба повторно да се одложат или целосно да се откажат.
Лондонски „Тајмс“, повикувајќи се на неименуван јапонски функционер, објави дека тамошните власти заклучија дека Олимписките игри, кои минатата година беа одложени, не можат да се одржат ниту годинава, а веста ја пренесуваат бројни светски медиуми.
Јапонската Влада одговори на гласините со соопштение во кое тврди дека премиерот Јошихиде Суга е одлучен дека Игрите ќе се одржат со воведување на дополнителни епидемиолошки мерки.
„Сите наши партнери, вклучувајќи ја и Владата, властите во Токио, организацискиот одбор на Игрите и Меѓународниот олимписки и параолимписки сојуз, целосно се фокусирани на одржување на Игрите годинава. Се надеваме дека секојдневниот живот ќе се нормализира што поскоро и ќе продолжиме да даваме се од себе да подготвиме безбедни Игри.“ – стои во соопштението.

Американската колеџ атлетичарка Зија Холман, минатиот викенд на атлетскиот митинг во Мичиген го изведе еден од најлудите пресврти некогаш снимени со камера. Атлетичарката на Универзитетот од Мичиген, трчаше последна за својата екипа во штафетата 4х400 метри, а кога ја презеде палицата заостануваше четири секунди зад конкуренцијата, односно 25 метри. До крајот на првиот круг, Холман ја престигна претпоследната атлетичарка, а со фуриозен финиш стигна до првото место и славеше со половина секунда предност. Холман својата делница ја истрча за време 51.79 што би бил сериозен резултат во сениорска конкуренција.

Македонските атлетичари Дарио Ивановски и Јован Стојоски извојуваа победи, зачинети со државен односно личен рекорд на Атлетското првенство во сала, кое се одржа во Белград. Ивановски со нов државен рекорд триумфираше во дисциплината 1 500 метри, со време 3 минути, 45 минути и 46 секунди, додека Стојоски прв низ целта мина на 400 метри со време 48 секунди и 11 стотинки, што беше доволно за победа и личен рекорд. Од останатите македонски атлетичари кои настапија во Белград најблиску до медал беше Александар Танески, кој заврши четвртопласиран во спринтерската дициплина 60 метри.

Макс Холовеј како победник, но и Калвин Катар како поразен, ги шокираа фановите на ММА на првиот УФЦ спектакл за годинава, одржан во Абу Даби. Во главната борба на вечерта, Холовеј во лесна категорија го победи Каар со едногласна одлукан а судиите и тоа по борба каква што не се памети во УФЦ. Холовеј победи со резулат 50:42, што во историјата на УФЦ никогаш не се случило во една главна борба. Причина е што таквата доминација инаку завршува со нокаут, но Катар чудесно преживеа еднакво чудесни 700 удари, со колку што го нападна Холовеј! По претставата која ги импресионира коментаторите, фановите, но и легендите на овој спорт, Холовеј се предложи за главна борба на вечерта идниот викенд, на која ќе бидат Конор Мекгрегор и Дастин Порие.

Бријана Ролинс-Мекнил која е олимписка шампионка на 100 метри со пречки е суспендирана на неодредено време поради кршење на анти- допинг правила. Единицата за интегритет во атлетиката соопшти дека Ролинс-Мекнил е обвинета за „мешање во процесот на утврдување на резултати“. Доколку се утврди дека е виновна, и се заканува суспензија од 4 до 8 години. Американката освои злато на ОИ во Рио во 2016 година, а во 2013-та триумфираше и на СП во атлетика. Таа во моментов го има четвртото најдобро време во историјата на 100 метри со пречки – 12,26 секунди.