Поради повредата која ја заработи во Америка, на Индијан Велс, Рафаел Надал сеуште не е во натпреварувачка форма и го откажа учеството на турнирот во Барселона кој е закажан за идната недела.

Според портпаролот на Шпанецот, постојат шанси тој да се врати на теренот во почетокот на мај, и да заигра на тенискиот турнир во Мадрид, кој е претходница на Ролан Гарос во Париз.

Францускиот тенисер Жо Вилфред Цонга објави дека ќе ја заврши кариерата по Ролан Гарос.

Цонга, кој на 17 април ќе го прослави 37. роденден, своевремено беше петти тенисер во светот, но поради бројните повреди и лошата форма падна на 220. место на АТП листата.

„Ова ќе биде мое 15-то учество на Ролан Гарос и се надевам дека ќе бидам онака како што отсекогаш сум бил на овој турнир“, рече Цонга.

Французинот во кариерата освои 18 АТП титули, а најблиску до трофејот на Гренд слем турнирите беше во 2008 година, кога во финалето на Австралија опен беше поразен од Новак Ѓоковиќ.

Беше полуфиналист на Ролан Гарос и Вимблдон, додека на УС Опен во неколку наврати стигнуваше до четвртфиналето.

Новата лидерка на светската тениска ранг-листа за жени, Ига Швјoнтек од Полска, изјави дека плачела 40 минути откако дознала дека трикратната Грен слем шампионка Ешли Барти ја завршува кариерата. Како резултат на одлуката на 25-годишната Барти, Швјонтек дојде на врвот на женската ранг листа.

„Плачев 40 минути. Не очекував дека ова ќе се случи и навистина бев изненадена. Нејзината одлука е многу храбра и почувствував многу емоции поради тоа што се случи. Дури два часа подоцна дојдов до заклучок дека треба само да продолжам да победувам“, изјави полската тенисерка.

Благодарение на тоа што Данил Медведев не влезе во полуфиналето на Мастерсот во Мајами, српскиот тенисер Новак Ѓоковиќ и овој понеделник го задржа првото место на АТП листата!

Ѓоковиќ не настапи на американската турнеја и годинава играше само во Дубаи, а при последниот рез на крајот има само 10 поени повеќе од Русинот – 8.420 наспроти 8.410.

Русинот, пак, најави дека оди на операција на кила и ќе ја пропушти сезоната на земјена подлога, несметајќи го Ролан Гарос, кој се уште е под знак прашалник. Тоа значи дека Медведев во меѓувреме ќе загуби 790 поени, а Новак во наредниот период ќе треба да одбрани 840.

Она што му треба на Ѓоковиќ за да го задржи првото место на АТП листата до Ролан Гарос е да ја освои титулата на Србија опен што се игра на крајот на април и да стигне барем до финалето на сите три Мастерси (Монте Карло, Мадрид, Рим).

Карлос Алкараз стана изненадувачки освојувач на Мастерсот во Мајами. Во финалето тој вечерва успеа да го победи Каспер Руд од Норвешка, со 7:5, 6:4.

Алкараз, кој на 5 мај наполни 19 години, е трет на листата на најмлади победници на Мастерс турнирите. Помлади од него кога освоиле Мастерс биле само Мајкл Чрнг (Торонто 1990) и Рафаел Надал (Монте Карло 2005).

Алкараз стана и најмладиот шампион на турнирот во Мајами, соборувајќи го рекордот на 19-годишниот Новак Ѓоковиќ (2007).

За Шпанецот ова е втората титула сезонава и трета во кариерата.

Данил Медевдев, инаку вториот рекет во светот, реши да оди на операција, поради која нема да игра можеби два месеци!

Имено, Медведев на своите социјални мрежи сподели информација дека има проблеми со килата и дека ќе мора да се оперира.

„Поздрав до сите. Во последните месеци играв со мала хернија, заедно со мојот тим решивме да заминам на операција за да го решам проблемот. Ќе отсуствувам меѓу еден и два месеци, ќе работам напорно за што поскоро да се вратам на терените“, порача Медведев.

Австралискиот тенисер, Ник Кирјос заработи казна од 35 илјади долари поради непримерното однесување за време на мечот со Јаник Синер во осминафиналето од турнирот во Мајами.

Кирјос на тој дуел го критикуваше судијата и го скрши својот тениски рекет, што беше доволно да заработи казна од АТП.

Неодамна Австралиецот беше казнет со 25 илјади долари и во Индијан Велс, кога после дуелот со Надал исто така го скрши својот рекет.

Италијанскиот тенисер Матео Беретини имаше операција на десната рака откако поради повреда тој се повлече од турнирот во Мајами. Светскот рекет број шест, откри дека оперативниот зафат беше успешен и сега му претстои период на рехабилитација.

„јас и мојот тим имавме разговор со лекарите после моето откажување од турнирот во Мајами поради повредата на десната рака. После неколку скенирања и лекарски проценки, одлучивме дека извршување на мала операција е најдоброто решение за потполно и брзо опоравување. Среќен сум што операцијата е извршена успешно. Ви благодарам на поддршката“, порача Беретини преку Инстаграм пост.

Серена Вилијамс, која на времето беше на челната позиција на ВТА листата, не размилува да се повлече во пензија. Таа е убедена дека може уште да покаже на големите собири.

„Нашиот  спорт е интензивен, има единаесет месеци натпреварување во една година. Живеам од ден за ден, ништо не планирам за утре“, истакна Вилијамс.

40-ет годишната тенисерка  од САД последен пат освои грен слем турнир во 2017 година и тоа на Австралија Опен.

Ерик Адамс, првиот човек на градот донесе одлука – се укинува наредбата според која на невакцинирани спортисти им беше забрането да учествуваат на натпревари во тој град!

Таа одлука е донесена пред се поради играчите на њујоршки тимови во различни спортови, но јасно е дека од сето тоа може да има корист Новак Ѓоковиќ, кој под тие услови би можел да се најде на УС Опен.

Но, од друга страна, оваа одлука не му ја отвори докрај вратата на Новак Ѓоковиќ за учество на турнирот во Њујорк, а причината е што се уште е невозможно да се влезе во САД за лица кои не се вакцинирани.

Од таа причина, првиот рекет во светот ги пропушти турнирите во Индијан Велс и Мајами, па Дубаи му беше единствениот турнир досега оваа календарска година. Останува да се види како ќе се разреши сагата со УС Опен, но ова секако е добар почеток за српскиот тенисер.