Најдобрата тенисерка на светот Арина Сабаленка успеа да ја одбрани титулата на УС Опен откако во финалето ја совлада Американката Аманда Анисимова.

Таа беше подобра во два сета со 2-0 (6-3 и 7-6/3) за да ја освои првата Грен слем титула во 2025 година или вкупно четврта во кариерата. За нејзината ривалка Анисимова ова беше второ Грен слем финале во 2025 година и повторно е поразена.

На почетокот на мечот тенисерката од Белорусија Сабаленка имаше контрола и го доби воведниот сет со 6:3 во гемови. Со таквата игра продолжи и во вториот сет. Во два наврати имаше предност, но Американката успеваше да стигне до изедначување, па сетот беше решен во тај брејк. Сабаленка ја потврди доминацијата и го доби тај брејкот со 7:3 на поени и притоа има изгубено само еден тај брејк во 2025 година од 22 одиграни.

Вечерва во Њујорк се игра машкото финале меѓу Јаник Синер и Карлос Алкараз, а почетокот е во 20 часот по македонско време.

Белоруската тенисерка број еден во светот, Арина Сабаленка и Американката Аманда Анисимова (ВТА-9) ќе играат во финалето на грен слем турнирот во Њујорк.

Сабаленка избори финале на УС Опен, откако синоќа јапобеди четвртата тенисерка во светот Џесика Пегула од САД во три сета, со 4-6, 6-3, 6-4.

Дуелот траеше два часа и седум минути.

Сабаленка, која ја брани титулата на УС Опен која ја освои минатата година со победа над Пегула, ќе игра во финалето против Анисимова, која во полуфиналето ја победи Јапонката Наоми Осака (ВТА – 24) со 6-7, 7-6, 6-3 во дуел што траеше два часа и 58 минути.

Ова е второ грен слем финале за Анисимова, откако годинава играше и во финалето на Вимблдон, додека Сабаленка трета година по ред дојде до финалето во Њујорк.

Крај на својата осумгодишна соработка, објавија денеска Данил Медведев и неговиот тренер Жил Сервара, само неколку денови по инцидентот што рускиот тенисер го предизвика во првото коло на УС Опен.

Медведев загуби со 3-6, 5-7, 7-6(5), 6-0, 4-6 од Бенџамин Бонзи во натпревар во кој 29-годишниот Русин го вербално нападна судијата и го искрши својот рекет по дуелот.

Сервара, кој беше прогласен за тренер на годината во 2019 година, му помогна на Медведев да освои 20 титули, вклучувајќи го и Отвореното првенство на САД во 2021 година, како и АТП финалето во 2020 година.

„Ти благодарам што ме водеше низ сите овие години и ќе видиме што ни носи животот во иднина“, напиша Медведев на социјалните мрежи.

Одлуката за прекин на соработката дојде по слабите настапи на грен слем турнирите оваа година, на кои Медведев загуби во првото коло на три од четирите главни турнири и во второто коло на третиот.

Сервара, од своја страна, истакна уживал во работата со Русинот – „дури и кога било тешко“.

„Данил, нашата фантастична осумгодишна авантура заедно завршува. Како симболичен животен потрес, по ова Отворено првенство на САД ја завршуваме нашата соработка. Ќе ја имам предвид твојата неконвенционална магија како играч, што е твојата сила. Повторно ќе се вратиш во својата форма, сигурен сум во тоа“, порача Сервара.

Канаѓанецот Феликс Оже-Алијасим се пласираше во осминафиналето на УС Опен, откако врати од еден сет негатива за да го победи третиот носител Александар Зверев со 4-6, 7-6(7), 6-4, 6-4.

Канаѓанецот ја забележа една од најголемите победи во својата кариера и дојде до четвртото коло на грен слемот во Њујорк прв пат по неговото полуфинале во 2021 година.

Противник на Оже – Алијасим во следното коло ќе биде Русинот Андреј Рубљов кој го победи квалификантот Колман Вон (Хонг Конг) со 2-6, 6-4, 6-3, 4-6, 6-3.

Светскиот рекет број еден, Јаник Синер, се пласираше во осминафиналето на Отвореното првенство на САД, oткако по пресврт славеше против Денис Шаповалов. Актуелниот шампион вп Њујорк победи со 5-7, 6-4, 6-3, 6-3, по повеќе од три часа борба на „Артур Еш“.

Негов следен противник ќе биде подобриот од дуелот помеѓу Александар Бублик (23) и Томи Пол (14).

Поранешниот шампион на УС Опен, рускиот тенисер Данил Медведев е казнет со 42.500 долари за неспортско однесување за време на неговиот пораз во првото коло на турнирот во Њујорк, објави денеска Би-Би-Си.

Русинот беше елиминиран од Французинот Бенџамин Бонзи по бурната реакција предизвикана од влегувањето на фотограф на теренот во клучните моменти од натпреварот.

Тениската асоцијација на САД го казни Медведев со 30.000 долари за неспортско однесување и дополнителни 12.500 долари за кршење на рекетот.

Инцидентот се случи во третиот сет, при резултат 5:4 за Бонзи, кога фотограф стапна на теренот помеѓу првиот и вториот сервис на Французинот. Судијата Грег Аленсворт пресуди дека Бонзи треба да го повтори првиот сервис, што предизвика гнев кај Медведев и бурна реакција од публиката. Дуелот беше прекинат повеќе од шест минути додека атмосферата не се смири.

Медведев успеа да се избори за петти сет, но на крајот загуби по драматична борба. По поразот, тој гневно го искрши рекетот и седеше на столчето неколку минути пред да го напушти теренот.

Самиот Медведев кратко изјави по натпреварот дека очекувал таква казна: „Добив доволно висока казна, па ако кажам нешто, ќе бидам во уште поголема неволја. Затоа нема да зборувам“.

Петра Квитова, двократната шампионка на Вимблдон, на 35-годишна возраст замина во пензија.

Во мечот од првото коло на Отвореното првенство на САД, каде што нејзиниот најголем дострел во кариерата беше четвртфиналето, Чехинката загуби од Французинката Пари со 6:1, 6:0.

Квитова го освои Вимблдон во 2011 и 2014 година, а играше и во австралиското финале во 2019 година.

Нејзиниот најдобар пласман на ВТА листата беше второто место во октомври 2011 година.

Шпанецот Карлос Алкараз ја освои титулата на Мастерсот во Синсинати. Во финалето, Алкараз славеше по само дваесет минути игра против најдобриот тенисер во светот и бранител на титулата Јаник Синер.

Синер го предаде натпреварот при водство на Алкараз 5:0 во првиот сет. Се уште не е познато за каква повреда станува збор.

Италијанецот се држеше во неколку наврати во пределот на стомакот, па може да станува збор и за вирус. Како и да е, тој донесе одлука дека е подобро да се предаде и да не го загрози својот настап на Отвореното првенство на САД.

Што се однесува до самиот натпревар, тие дваесетина минути минаа во целосна доминација на Алкараз.

За краток период, тој направи дури три брејка против противник кој, во најголем дел, само статираше на теренот.

Пред последниот гем во првиот сет, во кој Алкараз требаше да сервира, Синер седна на клупата и му рече на судијата Мохамед Лајани дека му е жал за навивачите, но дека не може да продолжи.

Тој исто така нагласи дека морал да се обиде, што имплицира дека здравствените проблеми се појавиле пред почетокот на мечот.

Италијанскиот тенисер Јаник Синер и Шпанецот Карлос Алкараз ќе се борат за трофејот на турнирот во Синсинати, САД.

Во полуфиналните натпревари, Синер синоќа го победи Французинот Теренс Атман (7-6 (7-4), 6-2), а Алкараз ноќеска беше поуспешен од Германецот Александар Зверев (6-4, 6-3).

Тенисерите ќе се сретнат во финале на АТП турнирите по четврти пат.

Финалето на турнирот во Синсинати ќе се одржи утревечер со почеток во 21 часот по македонско време.

Огромен успех постигна младиот македонски тенисер Марко Алексовски на тунрирот во Барселона (за играчи до 14 години) освојувајќи го шампионскиот пехар. Тој на патот до пехарот во последните три меча ги победи тројца од првите четири носители и сосема заслужно го освои пехарот.

Во денешното финале на турнирот во Барселона „Антонио Хернандез Куп“ (категорија 1) до победата стигна откако ривалот го предаде мечот. Вториот носител Стефан Шангичев од Шпанија го доби првиот сет во тај брејк со 7-6 (8-6 на поени) во кој решаваа нијанси, а притоа Алексовски не искористи три сет топки (две во сетот и третата во тај брејкот). Но, тоа не беше причина македонскиот тенисер да продолжи со добрата игра. Напротив во вториот сет Марко заигра уште подобро и поведе со 3-0 во гемови кога противникот го го предаде мечот.

Алексовски во финалето го победи вториот носител, во полуфиналето беше поуспешен од четвртиот носител, а во четвртфиналето го елиминираше и првиот носител

Марко Алексовски е дел од тимот на ITF-Tennis Europe кој е финансиран од Grand Slam Development Fund претходната недела играше полуфинале на турнирот во Белгија, а следната недела го очекува уште ден настап на турнир во Аликанте, Шпанија.