Сите 507 играчи и вработени на Австралија Опен, кои беа сместени во хотелот во кој работник беше заразен со коронавирус, се негативни на КОВИД-19 и добија одобрение да учествуваат на првиот гренд слем турнир сезонава, изјави директорот на турнирот, Крег Тајли.
„Сите кои се тестираа се негативни. Ова е навистина добар резултат, не само за заедницата, туку и за тенисерите.“ – изјави Тајли.
Сите од хотелот Гранд Хајат мораа на тестирање, откако еден од работниците беше заразен со вирусот. Поради тоа, 160 тенисери и тенисерки, како и тренери, мораа во самоизолација. За среќа, тоа беше само еден ден, додека не се направија тестовите.
Од повеќе од 1.200 играчи, тренери и официјални лица кои долетаа на турнирот, досега се забележани осум заразени со КОВИД-19.
Шпанската тенисерка Паула Бадоса, е единствена од натпреварувачите која се зарази со вирусот, но во средата беше пуштена од хотелскиот карантин.
Државата Викторија, чиј главен град е Мелбурн, денеска не извести за нови случаи на коронавирус.
Властите одобрија до 30 илјади навивачи дневно на Австралија Опен кој започнува во понеделник, што е околу 50 отсто од капацитетот.

Овогодинешниот Австралија Опен во женска конкуренција ќе се игра во малку поразличен облик, со оглед на специфичната ситуација со коронавирусот која ги диктира правилата.
Организаторите на неколку дена пред почетокот на Отвореното првенство на Австралија се одлучија третиот сет да се одигра „забрзано“, односно ќе се игра таканаречен тај-брејк во истиот.
Тоа значи дека доколку дојде до трет сет, тенисерките во значително пократка варијанта ќе го решаваат прашањето на победникот.
Австралија Опен започнува во понеделник, а бранител на титулата во женска конкуренција ќе биде американката Софија Кенин, која минатата година во три сета ја победи Гарбине Мугуруза.

Српскиот тенисер Новак Ѓоковиќ го купи најновиот модел на Тесла „Х“, луксузен електричен модел на автомобилот чија цена во основната понуда се движи околу 100 илјади долари.
Тесла „Х“ има пет седишта и 1020 коњски сили. До 100 километри на час забрзува за само 2.5 секунди, а максималната брзина му е 210 километри на час.
Ѓоковиќ е инаку познат како голем почитувач на ликот и делото на Никола Тесла.
Поради необичниот дизајн и начинот на кој се отвораат вратите, љубителите на автомобилот ја нарекоа Тесла „Х“ како „Бетмобил“.

Еден од тројцата најдобри тенисери на денешницата, Роџер Федерер потврди дека на терен се враќа на 8. март, кога стартува АТП турнирот во Доха.
Швајцарскиот ветеран е надвор од терените уште од почетокот на минатата година и полуфиналето на Австралија Опен против Новак Ѓоковиќ.
Кратко потоа го оперираше коленото и од време на време даваше изјави кога евентуално би можел повторно да заигра.
Сега веќе нема дилеми дека тоа ќе биде во Катар во првата половина од идниот месец.
„Размислував долго за тоа кога и каде да се вратам на терен. Турнирите во Австралија дојдоа прерано. Жал ми е, бидејќи сакам да играм таму. Сакав да се вратам на помал турнир, како би чувствувал и помал стрес.“ – вели Федерер.
Швајцарецот го најави и неговиот план за тековната година.
„Сакам да славам големи победи. Подготвен сум за тоа да одам на долг, тежок пат. Ќе се потрудам да играм и на земја, после тоа следат Хале, Вимблдон, Олимписките игри и УС Опен.“ – најави Федерер.
Роџер Федерер во август годинава ќе наполни 40 години. Во кариерата освоил 20 гренд слем титули, а на врвот на АТП листата поминал 310 недели.

Првиот понеделник во февруари годинава, предизвика насмевка на лицето на Новак Ѓоковиќ, кој ја започна 306. недела на врвот на АТП листата.
Веќе од есента беше јасно дека српскиот ас ќе остане на оваа позиција барем до март во најлош случај, а она што посебно го радува србинот е тоа што сериозно се приближи на Рожер Федерер по бројот на недеил на чело на АТП листата.
Швајцарскиот ветеран го држи рекордот во овој сегмент, бидејќи со 310 недели без прекин оствари најдолга низа во светот на тенисот.
Тоа значи дека на Ѓоковиќ му остануваат уште четири недели до израмнување на рекордот, кој би требало да падне на 8. март.
За потсетување, за седум дена започнува Австралија Опен на кој Ѓоковиќ го брани трофејот, кој го освојуваше во последните две сезони.

Не повеќе од 30.000 навивачи на ден ќе можат да присуствуваат на натпреварите на Австралија опен, пренесува Ројтерс. Ова го објави министерот за спорт на Викторија, Мартин Пакула. За последните пет дена од турнирот, не смее да има повеќе од 25 илјади гледачи на ден.
За 14 дена на турнирот ќе можат да учествуваат 390 илјади гледачи, што е околу 50% од просечната посетеност во последниве години. Се разбира, ова е различно од она што се случуваше во претходните години. Сепак, ова е најголемиот настан со гледачи во последните месеци, рече Пакула.
За потсетување, претходно стана познато дека околу 70 играчи се во карантин 14 дена во пресрет на турнирот. Тие летаа за Австралија со истите авиони со патници заразени со коронавирус.
Тенискиот Грен слем Австралија опен ќе се одржи во Мелбурн од 8 до 21 февруари.

Кирјос, кој минатата недела го нарече Ѓоковиќ „будала“, во интервју за американската телевизиска мрежа Си-ен-ен, рекол дека „Ѓоковиќ е нашиот Леброн Џејмс“.
Кирјос, во интервјуто истакнал дека се чувствува сигурно во пресрет на првиот Гренд слем во сезоната, Австралија опен. Тој рекол дека Ѓоковиќ мора да се однесува одговорно, бидејќи е пример за останатите играчи.
„Мислам дека е важно да се повикаат играчите на одговорно однесување, особено тоа треба да важи за оној кој е лидер на нашиот спорт“, рекол Кирјос.
„Технички, Ѓоковиќ е нашиот Леброн Џејмс, мора да им дава пример на останатите тенисери. Едноставно не беше вистинското време да го прави она што тој го правеше во екот на пандемијата. Сите ние правиме грешки и за нив треба да одговараме. Мораме да бидеме одговорни. Ние сме колеги, се натпреваруваме едни против други, но никој друг не го прозва за она што го правеше со својот турнир“, заклучил Кирјос.

Организаторите на Австралија Опен донесоа одлука да ја реструктуираат поделбата на парите кога наградите се во прашање. Така, победниците во машка и женска конкуренција годинава ќе добијат помала награда во однос на минатата година. Како што е соопштено, на шампионите во сингл конкуренција ќе им бидат доделени околу 2,75 милиони австралиски долари, во однос на минатогодишните 4,12 колку што добија Новак Ѓоковиќ и Софија Кенин. Наградниот фонд сепак ќе остане ист, 71,5 милиони австралиски долари, па тенисерите кои ќе бидат елиминирани во раните фази ќе добијат поголема награда во однос на минатата година. На пример, поразените во првото коло ќе заработат дури сто илјади долари, што е зголемување за 10 отсто од минатогодишното издание.

Здружението на тениски професионалци (АТП), додаде два нови турнири во својот календар како би ги зголемиле шансите за настап на играчите, кои во голема мера беа ограничени поради пандемијата на коронавирусот.
Статус на АТП турнири добија турнирот во сала во Сингапур, кој ќе се игра од 22. до 28. февруари, како и турнирот на земја во шпанска Марбела, кој на програмата е од 5. до 11. април.
Исто така, турнирот на земја кој требаше да се игра во април во Будимпешта, се преместува во Белград. Во главниот град на Србија пред десетина години се играше Србија Опен, се одржаа три изданија на турнирот, а два освои Новак Ѓоковиќ.
Од друга страна, откажан е единствениот турнир на земја во САД, оној во Хјустон кој вообичаено се игра во април.