Меѓународниот центар за спортски студии (ЦИЕС) ја објави најновата листа на најскапи фудбалери на светот. ЦИЕС својата листа ја темели на неколку параметри, како годишна возраст, траење на актуелниот договор, индивидуални резултати, резултати и статус на клубот. Според тие услови, најскап играч на светот е Маркус Рашфорд кого ЦИЕС го проценува на 165 милиони евра. На второ место е Ерлинг Халанд, кој вреди 151,3 милиони, а третото место го држи Трент Александер-Арнолд кој е проценет на 151,2 милиони евра. Лионел Меси и Кристијано Роналдо не се ниту во првите десет. Цената на Рашфорд драстично порасна годинава, со оглед на тоа што веќе има 14 погодоци и 7 асистенции, а Јунајтед по подолго време е во борба за титула. Рашфорд има договор со клубот до 2023 година со опција за продолжување на уште една година, што дополнително му ја зголемува цената. Четвртото место му припадна на Бруно Фернандеш, а Килијан Мбапе е дури петти со 148,8 милиони евра. Цената би била далеку повисока, но Мбапе се уште нема потпишано нов договор, па тоа според параметрите на ЦИЕС, му ја руши вредноста.

Ливерпул и Манчестер Јунајтед се силно заинтересирани за дефанзивецот на Лајпциг, Ибрахима Конате. Двата клуба веќе започнале разговори со агентот на Конате и сакаат да го донесат во своите редови во јануари. 20-годишниот Конате одлично ја започна сезоната и го привлече вниманието на многу европски гиганти. Клоп е во потрага по дефанзивец кој ќе може да го замени повредениот Ван Дајк, но исто така во иднина да биде и негов партнер во дефанзивната линија. Солскјер исто така е во потрага по квалитетен дефанзивец, па останува да видиме кој ќе ја добие битката за потписот на Конате.

Месут Озил изгледа ќе се врати во Турција. Арсенал сакаше да се раздели со Озил уште пред летото и истекот на неговиот договор, па искусниот играч за врса пронајде нов клуб. Озил се договори со Фенербахче и со овој клуб ќе потпише договор на три ипол години. МЛС тимовите и Фенербахче беа најголеми фаворити за доведување на Озил, но желбата на играчот беше да се пресели во Истанбул. Озил вчера на друштвените мрежи објави и фотографија, па така го најави овој трансфер. Фенербахче не ја започна баш најдобро сезоната и беше за очекување да има промени, а доаѓањето на Озил може да биде вистински потег.

Јувентус веќе работи на јануарските засилувања, а примарна цел ќе биде засилување на левата бековска позиција. Италијанските медиуми пренесуваат дека „старата дама“ веќе почнала да работи на трансферот на Емерсон Палмери од Челзи. Палмери долго време е на радарот на Антонио Конте, но „нероаѕурите“ не се спремни да ги платат бараните 20 милиони евра, па таквата ситуација ќе ја искористи Јувентус. Италијанскиот репрезентативец не добива голема минутажа кај Лампард и сака да се врати во Серија А, а Пирло верува дека идеално ќе се вклопи во неговата формација.

Оливие Жиру донесе конечна одлука околу својата иднина. Жиру е на радарот на италијанските гиганти Интер и Јувентус, но тој одлучил да остане на „Стенфорд Бриџ“, пренесуваат медиумите. 34-годишниот напаѓач беше спремен да ја промени средината во зимскиот преоден рок, но во последно време работите се променија. Жиру почна да добива се поголема минутажа кај Лампард и донесе одлука да остане до крајот на сезоната, кога и му завршува договорот. Жиру оваа сезона има одиграно само 9 меча во Премиер лигата на кои постигна 3 гола.

Напаѓачот на Барселона, Ансу Фати, може да се врати на терените во почетокот на февруари. Фудбалерот кој во ноември имаше операција на менискусот на левото колено може да биде подготвен да заигра и еден месец порано од предвиденото. Каталонците се надеваат дека Фати ќе може да се појави на мечот со Пари Сен Жермен во Лигата на шампионите. 18-годишниот Фати на стартот на сезоната одигра 10 меча и постигна 5 голови.

Џини Вајналду ја одбил и последната понуда на Ливерпул за продолжување на договорот и сега е на чекор поблиску до трансфер во Барселона. Оваа вест ја пренесоа шпанските медиуми, но и реномираниот Ливерпул Ехо, кој истакнува дека Вајналдум смета дека неговата етапа на Енфилд е завршена и негова желба е да се пресели во Барселона. Не е тајна дека Вајналдум е најголема желба на Роналд Куман, кој и летото сакаше да го доведе, но Барселона немаше средства да го реализира тој трансфер. Сега ситуацијата е поразлична, па Барселона може да преговара со Вајналдум и бесплатно да го доведе на 1. јули. Вајналдум има 30 години, еден е од клучните играчи кај Клоп, но смета дека ова му е последна шанса во кариерата за уште еден голем трансфер.