Овој викенд Охрид ќе биде домаќин на завршниот турнир на Купот на Македонија во ракомет. Титулата ја брани Алкалоид, кој ќе го отвори полуфиналето со дуел против Вардар 1961. Во второто полуфинале Еурофарм Пелистер ќе се сретне со домаќинот Охрид. Тренерот на Еурофарм Пелистер, Раул Алонсо, го најави претстојниот натпревар против ГРК Охрид. Битолскиот суперлигаш силно посакува после долго време да го врати Куп-трофејот во својот град, а со тоа се сложува и Алонсо, кој рече дека неговиот тим точно ја знае својата мисија.

Раул Алонсо
(тренер на Еурофарм Пелистер)
Ќе биде прекрасен викенд и веќе се подготвуваме за натпреварот против Охрид. Ќе имаме одлична атмосфера, а ние се фокусираме на освојување на трофејот. Сакаме да го вратиме во Битола после многу години. Сите екипи ќе бидат крајно мотивирани и мислам дека ќе решаваат мали детали. На ваквите турнири секогаш се можни изненадувања. Во моментов мислиме само на првиот меч, а со помошта на нашите навивачи, се надевам дека ќе се пласираме во финалето

Никола Митревски
(РК Еурофарм Пелистер)
Купот се два натпревари, турнирски систем и е поразлично и специфично. Се подготвуваме за полуфиналето, а двата победници имаат малку време за финалето. Моментална инспирација и индивидуален квалитет знаат да ги решаваат ваквите натпревари. Секако дека двата дена ќе бидат тешки, прво треба да се подготвиме само за мечот во сабота и да го добиеме првиот меч, а потоа ќе размислуваме за финалето. Прво да го победиме Охрид, па ќе се насочиме кон следниот предизвик.

Дуелот на Охрид и Еурофарм Пелистер се игра в сабота од 19:30 часот, а ќе го судат Ѓорѓи Начевски и Славе Николов.

Фудбалскиот клуб Фиорентина објави кратко соопштение на својата официјална веб-страница во кое наведува дека договорот, кој беше потпишан пред само неколку дена со шефот на стручниот штаб Рафаел Паладино и неговиот тренерски штаб, е раскинат.

Клубот во соопштението не ја открива причината за разделбата на двете страни, оставајќи многу простор за шпекулации.

Веста дека Паладино заминува во среда прв ја објави познатиот италијански новинар Џанлука Ди Марцио, што ја шокираше локалната јавност со оглед на тоа што тренерот потпиша нов двегодишен договор само неколку дена претходно.

Наводно, самиот тренер поднел оставка, но не затоа што има понуда од друг клуб, туку очигледно поради некои несогласувања со раководството на Фиорентина.

Под водство на Паладино, Фиорентина ја заврши сезоната во Серија А на шестото место.

Останува да се види кого клубот од Фиренца ќе доведе на тренерската клупа и која беше причината за заминувањето на Паладино.

По две децении на највисоко ниво, легендарното лево крило Тимур Дибиров стави крај на својата блескава ракометна кариера.

Рускиот интернационалец, кој најголемиот дел од својата европска приказна ја испиша токму во Македонија со Вардар, се прости од спортот со емотивна порака.

„Пријатели, ова беше последен натпревар во мојата кариера, на малото момче кое сонуваше да игра ракомет со своите другари и ништо повеќе од тоа.

Благодарност до моето семејство, сопругата, децата, родителите… кои ме поддржуваа, моите клубови, репрезентацијат и соиграчите, тие се најдобри на светот. Ќе ми недостасуваш, ракомету“, напиша Дибиров на социјалните мрежи.

Дибиров важи за еден од најдобрите странци кои некогаш настапувале во македонскиот шампионат и е вистинска икона за навивачите на Вардар. Со „црвено-црните“ освои две титули во Лигата на шампионите (2017 и 2019), бројни домашни трофеи и остави неизбришлива трага со својот харизматичен настап и несопирлив стил на игра.

Од страна на РК Вардар 1961 официјално е потврдено дека македонскиот ракометар Филип Талески повторно ќе го облече „црвено-црниот“ дрес. Вардар со кратко видео го најавија кам-бекот на поранешниот репрезентативец на Македонија, кој по двете години минати во Бенфика се враќа на добро познато место.

„Со задоволство го потврдуваме враќањето на нашиот „бомбардер“ ФИЛИП ТАЛЕСКИ во дресот на Вардар. Уште многу вакви радости заедно да прославуваме. Добредојде Филип!“, се вели во објавата на клубот.

За потписотѕ на Филип Талески беше заинтересиран и Охрид, но неговиот конечен избор е Вардар 1961. Талески потекнува од школата на Металург, а рано замина во бундеслигашот Рајн Некар Левен (освои бундеслигашка титула), а во Германија играше во Балингем.

По враќањето во Македонија, со Вардар 1961 освои три шампионати и Купа на Македонија и имаше одлични настапи во овој период. На последните две големи натпреварувања, Талески не беше во дресот на македонската репрезентација.

Арон Палмарсон одлучи да ја заврши својата кариера. Легендарниот Исланѓанец верува дека повеќе не може да игра на највисоко ниво и дека е време да се пензионира.

Палмарсон моментално е играч на Веспрем, каде што го завршува својот втор договор, а првпат играше во периодот од 2015 до 2017 година.

Малкумина очекуваа дека Палмарсон ќе се пензионира оваа година бидејќи потпиша договор со овој тим до летото 2026 година. Клубот го прифати неговото барање, сето тоа затоа што веруваат дека тој не се чувствува подготвен и не може да му помогне на тимот.

Во неговите два мандата со Веспрем, Палмарсон освои две титули во Унгарија и двапати стигна до Фајналфорот на Лигата на шампионите.

Како играч за Барселона и Кил (двапати), тој беше европски шампион, а за Исланд одигра 148 натпревари и постигна 576 гола.

Ракометарите Еурофарм Пелистер се вицешампиони на Македонија во младинска конкуренција. Во финалната средба од завршниот турнир во Бутел, Мулти Есенс го совлада битолскиот тим со 22-32 (8-17).

Екипата на Фарук Мемиќ и Кире Митревски настапи без повредениот Самоил Ристевски и без најдобриот ракометар Алем Хаџиќ, кој не настапи заради правилото странски ракометари да не настапуваат во младинските категории во домашните натпреварувања.

Во натпреварот за третото место Бутел славеше над Алкалоид со 37-30.

Еурофарм Пелистер следниот месец го чека завршниот турнир на Лигата на шампионите и полуфиналето во Дормаген против ГОГ Гудме.

Министерството за спорт донесе одлука да ги награди ракометарите на Еурофарм Пелистер, младинска екипа, со парична награда од 1,5 милиони денари за пласманот на завршниот турнир на Лигата на шампионите во Келн.

Еурофарм Пелистер го освои првото место на турнирот во Букурешт пред неполни два месеци и ќе се бори за европската титула со ГОГ Гудме, Барселона и Веспрем. Во полуфиналето на 14 јуни во 09:00 часот во Дормаген, Еурофарм Пелистер ќе се сретне со ГОГ Гудме.

Клубот се заблагодарува на наградата и ветува дека достојно ќе ја претставува Битола и Македонија на „фајнал-фор“ турнирот следниот месец.

Алкалоид денеска излезе со соопштение за навивачите кои синоќа дојдоа на мечот со АЕК кој не се одигра во СЦ Борис Трајковски откако гостите одлучија да не излезат на теренот.

–Вашите билети купени онлајн ќе бидат рефундирани во период од 15 работни дена. Средствата ќе ги добиете директно на вашата сметка преку која сте ги купиле билетите. Билетите што се купени од продажно место ќе можат да бидат рефундирани од местото на купување со приложување на соодветната фискална сметка и на билетот.

–Уште еднаш ви се заблагодаруваме за континуираната поддршка и трпение. Се надеваме дека заедно ќе славиме нови успеси во иднина, – се вели во соопштението на Алкалоид.

Ракометарите на Алкалоид се подготвуваат за реваншот натпреварот од финалето на Европскиот куп против АЕК, а македонскиот тим со позитивниот резултат од првата средба е многу блиску до историски успех и прв европски трофеј во клупската историја.

На прес-конференцијата која беше одржана денес клубот од Автокоманда го најави натпреварот против грчкиот ривал, а тренерот Кирил Лазаров зборуваше за првата средба, но и за очекувањата од дуелот кој следува во недела.

„Одигравме еден одличен натпревар во Атина, можам слободно да кажам резултатски за мене и неочекувано имаме голема предност во пресрет на реваншот. Момците беа на висина на задачата и мислам дека со голема предност влегуваме во реваншот со АЕК. Од една страна сум претпазлив поради нашиот менталитет, во тимот имаме 19 Македонци, но од друга страна чувствувајќи ја атмосферата веројатно треба порелаксирано да го дочекаме овој натпревар и да уживаме во него.

Ќе се обидеме со стручниот штаб повторно да ги растовариме играчите од притисокот и да ги релаксираме, а поради тоа еден ден пред средбата ќе одиме и во карантин, не сакам да бидат под притисок и во недела да го дадат најдоброто од себе. Работевме и на одредени грешки од првата средба и подготвени го очекуваме реваншот, се надевам дека овој млад состав нема да се изгуби поради големата поддршка во салата.

Мислам дека не потценија малку и не очекуваа дека нема да подлегнеме на тој притисок таму, па сега потрезвено ќе настапот во недела. Нашиот систем функционира и покрај слабостите, ни недостасуваат и неколку играчи, но така функциониравме и досега“, изјави Лазаров.

Натпреварот меѓу Алкалоид и АЕК се игра во недела од 20:30 часот, а македонскиот претставник на првата средба победи со 29-25.