Драма во Милано: Црвен картон за Алегри и магичен гол на Леао во ремито со Комо

Во сезона во која отпорноста стана нивен заштитен знак, фудбалерите на Милан уште еднаш успеаја да избегнат пораз, иако ремито од 1:1 против борбениот тим на Комо вчеравечер повеќе наликува на изгубени два бода отколку на добиен еден. „Росонерите“ ја продолжија импресивната серија од 24 натпревари без пораз во домашното првенство, но заостатокот од седум бодови зад градскиот ривал Интер сериозно ги загрозува нивните амбиции за Скудетото.

Натпреварот започна со претпазлив ритам, но тишината на Сан Сиро за малку ќе беше прекината уште во 25-тата минута кога голот на Мергим Војвода беше поништен поради офсајд. Сепак, гостите не чекаа долго за водство, а тоа дојде по една нетипична грешка. Мајк Мањан, кој важи за столбот на одбраната на Милан, во 32-рата минута направи редок „кикс“ при обидот да ја изнесе топката од сопствениот шеснаесетник. Неговото невнимателно додавање го пресече младиот Нико Паз, кој ладнокрвно ја смести топката низ нозете на Мањан за свој деветти гол сезонава, предизвикувајќи шок на трибините.

По паузата, домаќините излегоа со комплетно поинаква енергија, предводени од креативноста на Лука Модриќ и неуморниот Ардон Јашари. Израмнувањето стигна во 64-тата минута како плод на чиста индивидуална генијалност. Јашари упати прецизна долга топка преку одбраната на Комо, пронаоѓајќи го Рафаел Леао во полн трк. Португалското крило забележа дека голманот Жан Буте е неколку чекори пред својата линија и со супериорен лоб-удар ја затресе мрежата. Со овој осми погодок, Леао веќе го израмни својот учинок од целата мината сезона, иако сме на половина од првенството.

Последните петнаесет минути се претворија во вистинска рововска битка. Милан силно притискаше за целосен пресврт, Леао дури ја погоди и рамката од голот, но тензијата го достигна врвот покрај теренот. Во 81-вата минута, тренерот на Милан, Масимилијано Алегри, доби директен црвен картон поради жестоки протести кон судиите, оставајќи го својот тим без дирекни инструкции во клучните моменти. И покрај доцните закани од Родригез и Вале за тимот на Цеск Фабрегас, резултатот остана непроменет. Комо со овој бод се искачува на шестото место, додека Милан ќе мора сериозно да се преиспита пред следните предизвици.